صرخة قوية

القس. أفضل وليم | 2010-11-27 00:00:00

بقلم افضل وليم
يله يا بابا اتكلم كفاية سكوت يلة اتكلم مش هنموت
ياما قولنا وطن فينا بيعيش وسكتنا وقولنا ادينا عايشين
ياما قولت جرجس وحسين ده دول واحد مش اتنين
ده حتى رصاصة اكتوبر مفرقتشي بين دمين
نيجي اليوم وينزف دمي، لاني مسيحي ليوم الدين
يا مصر كفاية ظلم، ساد عليكي من سنين
كنت مع صاحبي حسين في الجامعه بقانا سنين
واتخرجنا بيوم عظيم والوظيفة مرجا العين
يعني هو مقبول وانا درجتي امتياز مع شرفين
وهناك في طابور كبير وقفت ومعايا اليقين
دانا علامتي فوق الكل محدش قدي في التعليم
والموظف عينه بعيني لما شاف تعب السنين
لكن قالي يا ابني امشي هات بطاقتك أشوف الدين
دينك ايه واسمك مين؟
رديت عليه وقولت أنا مصري وهيه بلدنا من سنين
قالي روح من هنا بسرعة وهات حسين اللي بعديك
وبسرعة قاله مبروك ورقك كله سليم ومتين
ياه ياه يامصر ده أبويا بدمه وقف بحدودك
ودافع عنك بكل يقين
ولما عدوك حاول يغزيكي كان هو الضحية بدون تأجيل
وانا اليوم مش قادر اعيش وحتى كنيسة مابنبنيش
هصرخ صرخة مش لرئيس ولا لحكومة ولا لوزير
صرخة قوية لرب كبير شايف قادر سامع عارف
شايف ظلم المسكين
يله يا بابا اتكلم كفاية سكوت يلة اتكلم مش هنموت

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع