آه يا بلد ماشيه بفتاوى !!!

حليم أسكندر | 2016-06-07 09:14:23

حليم اسكندر
خليك فاكر لما تصوم
إن صومك ده شئ بيخصك
ومالكش دعوه بباقي القوم
اللي بيحاسب الناس ربك

بلاش بصيامك تتفاخر
وتطلع ع الناس ظرابينك
وتكون واكل شارب فاطر
والناس عارفينك هارشينك

الحكاية مش تظاهر بالصوم
عايز الناس تديلك أجرك
ناسي إن الحي القيوم
عالم بيك وكاشف سترك

ممكن تخدع بعض الناس
بالتحايل ويا الغش
لكن كاشفك رب الناس
مهما حاولت تركب وش

آه يا بلد ماشيه بفتاوى
وللخلف بتجري بإصرار
شبعتونا تسامح ف غناوي
وولعتوا في بيوتنا النار !

أنا باراعيك من ذوقي وحبي
مش بالإجبار والفرض
أنا ديانتي الحب وربي
قاضي كل شعوب الأرض

مهما عملتوا ومهما إن كان
بنصلي علشانكم من القلب
وبندعي لرب الأكوان
يغمركم بفيض من الحب

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع