يا أم الولد

أشرف فايز | 2010-10-04 00:00:00

بقلم: أشرف فايز

رايحه فين يا أم الولد؟؟
دي الشمس لسة مغربة
والخوف صَبَح مالي البلد
والعتمة جاية مقربة
والحزن سارح ع الحيطان
داير يكسر في البيبان
يفرش شراعه ع البيوت
الريحة موت
وأنده بأعلى وأعلى صوت
ومفيش مدد

يا أم الولد
الخطوة تايهة ع الطريق
والليل بيفرش ع المكان
ولا عادشي فيه حضن لصديق
ولا عادشي فيه مطرح أمان
الخطوة تاهت والسلام
ولا عادلهوش معنى الكلام
وآه وآه من اللي جاي
دا مالوهشي زي
إعصار هياكل كل حي
وتبقى ذكراكي هدد

يا أم الولد
يا أم الولاد الطيبين المليانين
حب وإيمان
تشهد حجارتك من سنين
على اللي حاصل واللي كان
فاتحة ديارك للغريب
حضن وأمان
مادة إيديكي لكل محتاج
زاد حنان
إيه اللي بدل خطوتك؟؟
إيه اللي غير قبلتك؟؟
إيه اللي حجَّر دمعتك؟؟
جاوبي وقولي بذمتك
هي البلد نفس البلد؟

يا أم الولد
كل القلوب الحلوة ليه صبحت حجارة؟؟
والكُره عفريته بقى في جتتنا لابس
والنار أساسها في البدايه أصغر شرارة
تكبر وتاكل في الحياة أخضر ويابس
لِمّي الولاد تحت العلم
من قبل ما يصيبهم صمم
وما يسمعوش صوتك
ويومها...
تعضي في صوابع الندم
ولا تلقي ليكي في الوجود أي سند

يا أم الولد

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع