خلّي الرّوح

زهير دعيم | 2010-09-16 00:00:00

بقلم: زهير دعيم

لمّا الشّرّ براسو يطُلّ
والهمّ يرفع أصواتو
بصرُخ ليسوع ربّ الكُلّ
ت يغطّيني بدمّاتو

ما بِتأخَّر ما بِخِلّ
بوعدو وبجوابتو
بيجي قبل نْزول الطَّلّ
وبِغْلب الليل وعتماتو

جَرِّب وازرع حوضك فُلّ
واقلع منّو شوكاتو
وخلّي الرّوح لمّا يهِلّ
يسقي بالحُبّ زرعاتو

لا تيأَس وإيّاك تمِلّ
وتقول بعدت طلاتو
خلّيك مؤمن وظلَّك طُلّ
على الكون ونجماتو

نصيحة منّي يا خِلّ
ادرس واحفظ كلماتو
هو الفادي ، هو الكلّ
الّلي فدانا بحياتو

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع