دَمَّعى

رمزى بشارة | 2010-08-25 00:00:00

بقلم : رمزي بشارة
أنا إللى قلت لِك زَمان مالِك يا ست الكل دَمعِك عالخُدود
أنا إللى قلتلِك زمان ماتدمعيش وبلاش يا غاليه تعيَّطى
جاى النهارده عشان آقول لِك دمَّعى
صعبان علىَّ إنى أشوفِك كُل ده بتتوجَعى
صعبان علىَّ كل يوم
تِمسِكى الألبوم تِفِرِّى فى الصِّوَر
وإن حَد لَمَحِك .. تِضحَكى . بس الحقيقة وَقتها بتتقَطَّعى
دَمَّعى
صَعبان علىَّ تكون دموعِك جوه عينِك محبوسين
تِلبِسى الإسوِد وسايبه ألف هِدمه فى الدولاب مش ملبوسين
إسمعى ..
سيبى الدموع تنزل وِتُحفُر سِكَّة فوق خَدِّك تِكون
زَى سِكِّة الحَق إللى غاب . مِتعَوِّجَة
سيبى الدموع تِنزِل وِيِمكِن تِطفى نارِك إللى والعه
من يوميها ولِسَّه قايده موَجوِجَه
فيه سؤال يا أمَّه أخَد كُل إنشِغالى
للدرجة ديَّة كمونهم عزيز
أغلى من دَمِّى قولى لى . وللا دَمِّى ماكانشى غالى
أصل كمونهم بينفع
ممكن بإيدهم يُفرُكوه
وعلى طَبق غلبان قوى فيه فول مِدَمِّس يِطلِقُوه
ويغَمِّسوا
ويعملونا ساندوتش وكل بق ياخد له قطمة
يعنى مـ الآخِر علينا يخَمِّسوا
دمى سايل بين سنانهم . كُل واحد كلنى غُول
جِتِّتى مِتقَطَّعة بين ألف غُول
لأ مش هاأسكت لأ هاأقول
خلاص أنا بَطَّلت أخاف مـ التهديدات دِيَّه
هو الفقير فى الغابه دى مابيبقالوش دِيَّه !
جِتِّتى مِتقَطَّعة بين ألف غُول
إقلعوا كل الوشوش كله على أصله يبان
إللى كان قاعد بعيد وِحَرَّك اللعبه بإيديه ده غول جَبان
وإللى لِعِب ده غول مالوش بين البشر أبداً مكان
وإللى سِكت وكان شايفنى باأتظِلم ده غول كمان
كلهم عاملين ملايكة وهُمَّ فى الآخر غِلان
وِسَّعى
عَدِّى يا أمَّه البيه وقُومى عَظمى له
سقفى له بعد ما يخلَّص وِينهى كلمته
سقفى له بعد ما يخلص وينهى بلوِّته
مين عنده ياأمَّه الجُرأه دى! شُجاع . بيقتل القتيل ويروح يِعَزِّى فـ خَرجِتُه
ولا حد يقدر يِمسِكُه ولا يعارضُه فـ سِكِّتُه
يضرَب ولا حَدِّش يحوش
أصل فيه فـ ضَهرُه وحوش
واقفين وساندين حَضرِتُه
محمى بيهم أصلهم أهله وناسه وعِزوِته
بَعد ما إتعَرَّى قُصادنا لِسَّه هُمَّ كِسوِتُه
وإللى يقول له عينيك دى حَمرا. يدوس رقبته بجزمِته
دَمَّعى
إوعى الدموع تِحِب تُخرُج فَتحُوشيها
وِجَمَّعى
كل الدموع دى يا حبيبتى وحَوِّشيها
وتعالى قدام ربِّنا وإرميها
هُوَّ الوحيد سامع دُعا المَظلوم وحاسِس باللى فيه
هُوَّ الوحيد دَمع الغلابه مايهونشى عَليه
دَمَّعى

ramzybeshara@yahoo.com