رسالة شهيد لداعشي

حليم أسكندر | 2015-03-01 11:11:42

حليم اسكندر

فاكر انك بتموتني ؟
لا يا اخويا انت بتحييني
موتي علي اسم الهي حياه
واكليل شهاده مستنيني

بتكرهني ؟ انا بحبك
وباصلي النور يدخل قلبك
وتعرف ان " الله محبه "
وتزول الغشاوه اللي ف عينك

اوعي تفكر اني باخاف
ده وعد الهي واضح شفاف
اني مكاني معاه في سماه
وانا متشال فوق الاكتاف

مهما تعاند مهما تكابر
ومن المحبه دايما ساخر
لكن عند الهنا خلاص
وحب ابدي مالوش اخر

فرصه عمرك اوعي تضيع
وتتوه في زحمة مواضيع
ارفع قلبك حالا صلي
تلقي الهنا مجيب وسميع