رمضان بيجمعنا

مايكل دانيال | 2014-07-03 09:56:07

بقلم : مايكل دانيال
صباحكم او مساءكم بكل الخير و ده طبعاً علي حسب توقيت قراءتكم للمقال ، و بجد وحشتوني و بعتذر عن غيابي و عدم كتابه مقالي الاسبوعي العدد اللي فات .

طبعاً كلنا مبسوطين بأننا بنعيش شهر من أجمل شهور السنة و هو شهر رمضان و ده لأن ليه طعم خاص جدا و خصوصا في مصر ..
عارفين يعني ايه رمضان ..

يعني انك تشوف الفوانيس حواليك في كل مكان و في كل البلكونات بغض النظر عن اصحاب الشقق دي مسيحيين ولا مسلمين .
يعني تشوف زينه متعلقة في كل الشوارع و تسمع اغنيه (وحوي يا وحوي و رمضان جانا) في كل مكان و حتي و انت راكب ميكروباص او تاكسي .
يعني ان خالتي أم أحمد تبعتلنا صينيه كنافة و قطايف ، فتقوم جدتي تبعتلها قمر الدين و مهلبيه عملتها مخصوص علشانها هي و اولادها و اللي علي لسان الاثنين كلمه واحدة و بس هي (رمضان كريم) .

يعني اننا نفطر كل يوم في بيت واحد مننا و ناكل و نشرب و نهذر و نضحك سوا .. لأن كلنا واحد و كلنا مصريين .
يعني نتسحر عند (الجحش) و ناكل فول و احنا بنقول نكت و نروح مع صوت أذان الفجر و نحاول ننام ساعتين قبل ما ننزل علي شغلنا .. و طبعاً نقوم مرهقين لكن مبسوطين بقعدتنا الحلوة مع أحلي اصحابنا .

يعني نلم بعضنا كلنا و نروح نسهر في خيمة رمضانيه و نستمتع بالسهر علي انغام الأنشاد الديني او اغاني الست أم كلثوم و العبقري محمد عبد الوهاب بصوت شاب موهوب .. علي انغام موسيقي هادية .

يعني المسيحي يستخبي و هو بيشرب شوية مياه في الحر او بيشرب سيجارة ، كما لو كان بيسرق !
يعني لما تكون في المترو و قاعد ، تلاقي نفسك قمت علشان تقعد راجل كبير و تقوله اتفضل ارتاح علشان انت صايم و رمضان كريم .. رغم انك من الاساس ما تعرفش اذا كان هو مسلم و لا مسيحي !

يعني انك تلاقي كل الكافيهات و المطاعم سهرانه لحد السحور علشان الناس مستمتعه بقعدتهم مع بعض .
يعني انك تلاقي قبل الفطار لو حد راكب عربيته و التاني كسر عليه ، هو اللي بيسبق و ينزل يقوله معلش و رمضان كريم و الحمد لله جت سليمة المهم ان احنا الاثنين كويسين ، رغم انه في الاساس مش غلطان .

يعني انك تلاقي الناس متابعه التليفزيون و كل واحد مستني ابطال هو بيحب يتفرج عليهم و بيستني يشوف اعمالهم علي الشاشه من السنه للسنه .
رمضان في مصر يعني زحمة الحسين و الغورية .. يعني قهوة الفيشاوي
يعني ناس مصر الطيبين اللي الخير جواهم ...

و هي دي مصر الحقيقية اللي رجعت لينا تاني .. و اللي نفسي تكون كل الايام فيها رمضان
و في النهاية كل سنة و كلنا بحب .. خير و سلام .. و رمضان كريم و بيجمعنا كلنا .