طباعة الصفحة

عــــزز نفسك

فايز البهجوري | 2013-11-27 14:37:10

فايز البهجورى

ياللى مالكش كبير اعمل كبير نفسك

وفى مجلس الكبارات عزّز كتير نفسك

زرعك تروح تزرعه وتجمّعه بنفسك

شغلك تروح تعمـلـه وتكمّلـــــه بنفسك

والرزق لـو تشتغــل حتكتّــــره بنفسك

والنصر حيكون نصيبك لو تصون نفسك

فتــح عينيـك للزمـن وخــلـى لك مقــدار

على الزمن تنتـــصر لو الزمن نافســـك

*------------------***----------------*

وطلبت من كل مصرى أن ينطلق للعمل ، ولا يتواكل . وقلت له :

2 - إجرى يا عبد ... وأنا أعينك

ما دام انت نايم... يا ابن آدم... راح تنام على طول

حتموت فى بيتك جعان... مش لاقى " طبق الفول"

دا الشغــــــل للجدعان ... زى العباد بتقول

ولامتى تفضل تقول ... رزقى على ربّى

والرب قال إشتغل ... يا عبد ... وأنت تنول

دا الرزق يا ما يزيد للى يكون شغّال

يكتر فى إيده الخير ويزيد فى جيبه المال

أما " العويل" حيضيع طول ما فضل بطّال

مين اللى راح يخدمــه .. وده لم خدم نفسه

ميـــن اللى قـالــه ينام .. بالذمــة ديه اصــول؟؟؟

---------------------------------------------------------------

(العويل هو من يكون عالة على غيره فى معيشته. وهو قادر على أن يعمل ولكنه لا يعمل .)

وقد نشرالموالان بجريده مصر بالقاهرة فى أغسطس 1963

*------------------***----------------*

** وفى هذا الزمن الردئ . وجدت نفسى أكتب مواويلى فى ألم وفى حسرة على الحالة التى وصلنا اليها فى وطننا الحيبب مصر .

3 - مفتى الارهاب يدعو للاستشهاد ويرفض أن يستشهد

ليه البشر فى الزمن ده بياكـلـوا بعضيهم

زى السمك فى المحيـط .. ضاع الصغير فيهـم

"القـرش" يـبـلعهم.. و"الحـوت" مضيعهم

ولا حـد يقـدر يقـاومـه منّهم فيهـم

-------*------

ليه البشر فى الزمن ده الحـقـد أعـمـاهم

فـلـت زمـامهـم وضـاع الحــب ويـاهـم

وكل يــوم تكـبر جــذور الشـرّ جـوّاهـم

-------*------

ومـيـن زرع فى عـقـولهم بـذرة الارهـاب

وكل يـوم ينقـضى.. قتـلى.. وجرحـى.. وخـراب

والدم بيسيل بحـــور.. أطفـال .. نسـا..عـواجيـز

مرضى ..أطـبـا .. شباب .. حاجه صحيح بتغيـظـ

وان سألت السبب تسمع كلام له عجـب

قـال ايـه .. ده اسمه جهـاد

و حسب كلام المفتـى: "الانتحــارى شهـيد

وله ثـواب الجهـاد ".

-------*------

وفى يوم سألت المفتى .. طب وأنته ياللى فتـيت ..

مش ناوى تبقى شهيد؟

المفـتى رد وقـال .. أنا مش غبى ومخبـول ..

الشـر بـرّه وبعـيـد

دول كلهم دراويش .. وأنا يابنى لازم أعيش ..

عشان أفتى للدراويش

لكن ما أكـونشى شهـيـد

*------------------***----------------*

4 - الارهاب يغزو مصر ويقتل الأبرياء

ليه مـيـتــك يانـيــل .. لما وصلت مصر ..

اتـلـوّثـــت بالــدم ؟

و ليه ولادك يامصر... قـلبـوا الحياة فيها ..

نـكـد وحـزن وغـمّ

ومين يقـــول للى فجــــر... واللى افــتــــرى : اتـــلـــمّ

وليه سمائك يامصر.. بعد الصفـا فيها ..

سيطر عليها الجـــراد ؟

جـه من خـــرابة الجيران.. أسراب ورا أسراب ..

ينشر رقاب العـبـاد.

ويـهـــدد الآمنـــين .. والمسئولين ساكـتــيـن ..

وكـلـه باسم الجـــهـــاد

وليه حضــارتك يامصر.. طمسوا معـــالمها ..

بفـكـــر وهـــابــــى.

بــــدّل ثقافتـــها ..هــــدد سلامتـــها..

بسجـــل ارهــــابــــى

وصنـفــــوا ولادهـــا .. كافـرين ومؤمنـــين

والعاقلين ساكتين .. والمسئولين نـــايـــمــــين .

على مـفتــــى ارهــابـــى

والفــكـر وهــابــى

ولا أعرف ماذا سيكون موّالى غدا ؟؟؟