حمد الله تمام

صايم ؟ اه الحمد الله

استعديت ازاى بقى للصيام ؟ حمد الله ميت فل وعشرة الكريمر موجود والأكل بنظبطه ومش هنحس بيه ان شاء الله وهتبقى ايام زى الفل 

ايه ؟؟ لا واحدة واحدة عليا انت فاهم الصيام ده يعنى ايه ؟

ايه ياباشا صيام عادى زى الناس بنبطل ناكل اكل فيه روح ومش بناكل لا فراخ ولا بيض ولا نشرب لبن ونقضيها بقى بكريمر ولانشون صيامى وبسطرمة صيامى وحتى الجبنة صيامى وبرضو لو عايزيين نحلى دلوقتى فى جاتوه صيامى يعنى على ماتفرج  كدة

طب وبالنسبة للصلاة ؟ انا اصلا مبصليش كتير , والقداسات ؟ بروح بس حسب الصحيان , و والكتاب المقدس ؟ انا اصلا طهقان من كتب المذاكرة , طب بتصوم انقطاعى ؟ اه ساعات بصحى متأخر فابعتبر نفسى صومت , لكن مبنصومش وانت صاحى ؟ صراحة الصداع بيبقى ماسكنى وحاسس ان دماغى عاملة زى مزلقان السكة الحديد لو ماضربتش نسكافيه الصبح عالريق كدة 

يعنى انت كدة حاسس انك صايم ؟؟؟ نعمة من عند ربنا فات يوم من ال 55 الواحد تبع شوية بس ربنا يعيننا عالباقى

اسمحلى اقولك ده مش صيام على فكرة

احنا اصلا بنصوم عن الاكل ده كدليل ان احنا بنحب ربنا ومش بنكسر وصاياه وبنعبرله بكدة باأبسط حاجة نقدر نقدمها وهى الأكل ولأنه صام عننا على الجبل 40 يوم منقطع تمام عن الاكل 

وكمان احنا بنصوم لأن ربنا قالنا ان هذا الجنس لايخرج الا بالصلاة والصوم 

عشان كدة لازم يكون فى الصوم ده صلوات اكتر من الاول 

والصوم ده لازم ميكونش فيه اشتهاء لأطعمة معينة حتى لو صيامى فعلا مش بالمكسبات وغيره زى ما بتقول , ويكون كمان فيه فترة انقطاع علشان نقدر بيها نتحكم على جسدنا ونهذب نفسنا ومنسيبهاش كدة ماشية ورا شهواتها وخلاص ومش مجرد تغيير اكل من سمنة لزيت او من بيض لبطاطس فاحنا فى الاساس بنصوم واحدة واحدة عن مشتهيات العالم وغرائزالجسد

وخلى بالك كمان ان من شهوات العالم دى التلفزيون والانترنت اللى لازم نتعوود اننا نقللهم شوية بشوية فى فترات الصيام لانها عادات بتتحكم فينا وكمان عشان لازم نلاقى وقت فى صيامتنا نقرا فيها لانجيل وصلواتنا وحتى ساعتها مش هنسهر كتيير وهنقدر نصحى بدرى نروح القداسات 

صدقنى جرب الصيام من اعماق قلبك وبكل طاقتك وبكل طاعة لربك وانت هتحس ساعتها ببركة الصوم وخزين البركة المقدسة اللى هنتبارك بيه باقى ايام السنة