بقلم : مينا ملاك عازر

قبلما أخط خطاً في هذا المقال، أحب أن أقدم للمواطن المصري عمر محمد محمد مرسي العياط نجل مندوب الإخوان بقصر الرئاسة، ومنفذ أحلامهم بخراب البلاد، يا عمر أنا لقيت لك حل لإثبات كفاءتك وأحقيتك بالتعيين في الإعلان الداخلي بالشركة القابضة للمطارات، الحل ده سيمكنك كما مكن أبوك رجالته من مفاصل الدولة من إنك تتوظف بدون شائبة محاباة لأبوك مندوب المحظورة بالاتحادية أو بقصر القبة أينما يقيم هارباً من المظاهرات، والحل ده في إيد أبوك يا عمر، وهو إن أبوك يستقيل وتتقدم إنت كمواطن عادي مثلك مثل أي شاب تاني أبوه لا بينفذ طلبات جماعة محظورة، ونشوف لو نجحت خير وبركة، تبقى كسبت مرتبك وآهي سبوبة تعيش منها، ولو سقطت يبقى إنت كنت بتاخد حق مش حقك ويبقى كده ضميرك ارتاح.

عارف يا عمر الفكرة إللي قلتها لك دي، لو أقنعت بيها أبوك حاتبقى ضربت عصفورين بحجر واحد، أثبت للناس كفاءتك وأبوك بقى لما يستقيل حايتشال من عليه الحراسة ومن على جماعته ساعتها حايبان لأبوك ولجماعته مدى حب المصريين ليهم، يا عمر اسمع كلامي، وبيتهيأ لي إن عمو الشاطر حايوافق على الحكاية دي، بس هو تلاقيه حايعمل حاجة من إتنين يا إما حايقول لكم اعملوا كده يوم كذا الساعة كذا، والموعد ده طبعاً حايكون بعد ما تكون طائرته غادرت الأجواء المصرية بتذكرة ذهاب دون عودة أو حايبقى مبسوط بينه وبين نفسه، إنه حايبقى ضمن لنفسه الترشيح بنفسه دون أن يكون واضع حد في الصورة يقوم بدوره، ويبقى هو الرئيس ويبقى أبوك يا عمر ارتاح من معارضة الناس له وهجومهم عليه، شفت بقى يا عمر إن الحل بسيط ومليان فوائد.

بالك يا عمر أبوك تعب، ده ما بقاش مركز حتى وهو بيختار مواعيد الانتخابات البرطمانية إللي حاتعملوها عشان تدوا لنفسكم شرعية مزيفة، بجملة شرعياتكم المزيفة المغتصبينها ما أخدشي باله يا عيني عليه، إنها تتوافق مع أعياد ناس معاكم في الوطن تخيل يا عمر أكيد أبوك ما كانشي مركز، ولا إنت ليك رأي تاني وعايز تقول لي إنه قاصدها عشان مصر كلها تبقى واخدة أجازة بسبب الانتخابات وتعيد مع المسيحيين، وده حلمه إللي نفسه يعمله بس خايف من المتأسلمين إللي بيحموه يتهمونه بالكفر وإنه بيعيد على المسيحيين فقرر أن يلتف عليهم ويضحك عليهم، بس المسيحيين ما فهموش كده، وبوظوها عليه، عارف يا عمر لو قلت لي كده حاقول لك إيه "نعم يا عمر ناقص تقول لي إنه بعدها حايعمل ميعاد الانتخابات دي أجازة رسمية كل سنة عشان تبقى اعياد القيامة أجازة رسمية في الدولة من غير المتأسلمين ماياخدوا بالهم!" عارف ليه يا عمر مش حاتنفع الحكاية دي لأبوك؟ لإن ببساطة يا عمر عيد القيامة في كل سنة بيتغير ميعاده يعني مش حاتنفع إلا إذا كان أبوك كل سنة حايعمل انتخابات جديدة متزامنة مع عيد القيامة خصوصاً مع احتمالية بطلان الانتخابات دي بسبب العوار الذي سيشوبها من تزوير والتفاف على المحكمة الدستورية إللي ستحكم ببطلانه كالعادة، وحاتفضل دي عادتنا السنوية إجراء انتخابات برطمانية كل عام مع عيد القيامة.

المختصر المفيد دكتور مرسي كن أباً حنوناً واعط ابنك فرصة ليثبت كفاءته، ولشعبك أن يتنفس الصعداء وللشاطر أن يظهر على حقيقته.
مينا ملاك عازر
 

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :