بقلم: مينا ملاك عازر
يا سيد يا إللي راكب البلد، وسايقها وقاعد فوق واصل صوتي عندك؟؟ بأقول لحضرتك إيه، أنا بقى لي بتاع تسعة أشهر بأنادي أنا وناس كتير بنكلمك، وحضرتك باين مش سامع أو مطنش مش عارف، مش بتسمع غير ناس بعينها، مالك يا سيدنا سايق البلد كده زي إللي سرق منكم المدرعة، ونزل دهس في خلق الله، أيوه حضرتك ماشي عمال تروح يمين وشمال كده، ومش عارفين لك سكة، وبنكلمك مش بترد، ولا بتعبرنا، نقول يمين تعمل شمال، نقول شمال تعمل يمين، مش بتعمل غير إللي في دماغك، ولا بتعمل إيه، هل تسمعني؟ سامعني فوق عندك صوتي واصل لك ولا لأ؟ إيه ده مين إللي جانبك دول؟ مين إللي مطولين دقونهم ومقصرين جلاليبهم دول؟ حاسب يا با حاتدوسني، هما بيشاوروا لك عليَّ ليه؟ حاسب هما بيقولوا لك تدوسني ولا إيه؟ حاسب حاسب هل تسمعني؟

البلد كلها حاتتقلب زي المدرعة إللي اتقلبت في ماسبيرو، بسب السواقة دي، بس ما تخافشي مش حانزلك منها لو إتقلبت، حاخد بالي منك، بس بالك عارف مين إللي حايقلبوك؟ إللي جانبك دول منظرهم كده حايسرقوا منك البلد إللي المفروض تحميها، زي ما اتسرقت منك المدرعة في "ماسبيرو".. إلا قول لي بالحق: إزاي المدرعة إتسرقت؟ هي المدرعة مافيهاش جهاز إنذار ولا فيها جهاز أمان؟ هي الدنيا سايبة كده خالص؟ وإزاي ثبتوا رجالتك في المدرعة؟ بالحق على فكرة، هي ما كانتشي مدرعة واحدة دول كانوا بتاع ست مدرعات، هما رجالتك ما إتدربوش إزاي يدافعوا عن معداتهم، هو حضرتك مش حاتحاكمهم على إهمالهم وتقصيرهم في حماية عهدتهم؟ مش برضه المدرعة دي عهدة ولا لاقوها في كيمو كونو؟!.

هل تسمعني حضرتك؟ اسمعني، سيبك من إللي جانبك حبة، مش كفاية عملت لهم كل حاجة هما عايزنها، مش معقولة تدوسني زي ما هما عايزين، عارف دول منظرهم عايزين يلبسوك تهمة دوس كاتب، وساعتها ينزلوك من قيادة البلد زي البلطجية الوحشين مانزلوا رجالتك من مدرعاتهم، صحيح إنت معاك ذخيرة، ولا زي رجالتك مش معاك ذخيرة؟ إلا قول لي صحيح: إزاي منشأة حيوية زي التليفزيون قوات حراستها ليس معها ذخيرة؟ أمال لو حصل لا قدر الله انقلاب يدافعوا إزاي؟ مش لازم تبقى مسلحهم وهم بيحموا مباني البرلمان ومجلس الوزراء ووزارة الدفاع ومبنى الإذاعة والتليفزيون عشان يحموا البلد، ما داهية يكون حضرتك كمان مش معاك ذخيرة، طب قل لي وأنا أحميك، ده أنا أفديك بدمي، يعني دمي مش غالي عليك، ده أخواتي سفكوه لأجل الوطن، مش حايغلى على حضرتك. الناس إللي جنبك بتسمع كلامهم هما بس ليه؟ ما بتقدرشي عليهم ليه؟ مش بتدوسهم ليه؟ عشان هما قاعدين فوق جانبك، نزلهم خلينا كلنا زي بعض، ما تخليش حد أحسن من حد، مش ده العدل؟؟ هل تسمعني فوق، ولا أنا بأكلم نفسي؟؟ حرام بقى، إحنا هنا زي بعض، بكره يغدروا بيك أول ما يسيبوك القيادة، وابقى افتكر كلامي.

هل تسمعني؟ عندك صوتي واصل ولا أعلي صوتي أكتر من كده؟ صوتي إتنبح، قلت لك الدستور أولًا، طنشت وعملت الانتخابات أولًا، قلت لك شيل الراجل شرف ده طنشت وسايبه، ما تقوليش أنا إللي طلبته، أولًا أنا خيرتك بين تلاتة، إنت أخترت أضعفهم وأنعمهم، وبعدين مش أنا إللي اخترته على حد قولك، ماشي يا عم، أنا عيل، أنا اكتشفت إنه وحش بأقول لك الآن نزله مشيه، إشمعنى سمعت كلامي في مجايبه، والآن مش عايز تسمع كلامي في تمشيته؟ ولا هو حلو على قلب أصحاب الجلايب القصيرة والذقون الطويلة، عشان كده اخترته من بين التلاتة ومخليه علشان مش حاتلاقي حد أحسن منه، ما يهمهوش الثورة ولا الثوار، وتقدر تمشيه على مزاجك وبيخاف على كرسيه؟؟.

هل تسمعني فوق، ولا أطلع لك وزي ما تيجي تيجي؟ ولا حاتدهوسني؟ حاسب حاتدوسني بجد.. حرام بقى مش كفاية إللي ماتوا؟ صحيح، إللي ماتوا دول، وإللي إتصابوا دول، إنت مصدق إنه كان غصب عنك، وإن المدرعة إتخطفت؟؟ ولو مصدق، إنت شايف إن ده سبب مقبول؟ بالذمة ده كلام؟ قوات مسلحة تبقى مش مسلحة، والبلطجية هما إللي يبقوا مسلحين؟ هل تسمعنييييي؟! حَوِّل.

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :