بقلم : هانى رمسيس

معجزة تحويل الماء إلى خمر
(يوحنا 2 : 1-11)

(الشخصيات : البهلوان – الراوى – يسوع المسيح – السيدة العذراء- العريس – رئيس المتكأ – أصدقاء العريس )

(يُفتح الستار .. المسرح فى إظلام تام إلا من بقعة ضوء دائرية ... تتحرك بقعة الضوء من طرف المسرح وبداخلها البهلوان الحاوى وهو يتراقص و يغنى ضاحكاً ... بيده زجاجة عصير يرتشف منها فى نهم و تلذذ )

البهلوان : ياااه العصير ده حلو قوى قوى قوى ... مين ياخد شوية ... عصير ببلاش
ينظر إلى الجمهور : لأ مش ح أديك

( يرتشف العصير حتى النهاية ... يرفع الزجاجة بعيداً عن فمه ويخرج لسانه ويحركه فى إنتظار آخر قطرات تتساقط من الزجاجة )
البهلوان بغضب صارخاً : العصير خلص ... خلص ... لأ لسه عندى إزازة تانية

(يعبث بجيوبه حتى يُخرج زجاجة أخرى .. يلقى بالزجاجة الفارغة )
البهلوان محدثاً نفسه : انا البهلوان العجيب ، أنا الحاوى الغريب

(يرفع الزجاجة الثانية إلى فمه )
البهلون باشمئزاز : يع ... دى مش عصير دى ميه ... انا عايز عصيرى ... يبدأ فى البكاء والصراخ

(يصمت فجأة كأنه يتسمع أحداً... ثم يبدأ فى الغناء و الضحك )
البهلوان : أنا البهلوان العجيب أنا الحاوى الغريب

(يضع زجاجة الماء على الأرض ويلف حولها وهو يتمتم بكلمات غير مفهومة .. ثم يرفع الزجاجة ليشرب منها )
البهلوان يائساً : الله ... دى لسه مية مبقتش عصير

(يُقرب الزجاجة من فمه ويحدثها راجياً )
البهلوان : أنا البهلوان العجيب أنا الحاوى الغريب... يلا يا مية خليكى عصير برتقان ... طيب عصير تفاح ... او حتى عصير لمون .

(يرفع الزجاجة وهو يصرخ باكيا )
البهلوان : دى لسه ميه ... ميه ... ميييييه .

****************
(يدوى صوت الراوى من خارج المسرح)
الراوى : و حتفضل ميه

( تُسلط بقعة ثانية من الضوء على جانب المسرح يساراً يظهر داخلها الراوى )
الراوى : و حتفضل مية
البهلوان : ليه متبقاش عصير
الراوى : علشان أنت مش يسوع ... يسوع هو الوحيد اللى يقدر يخلى الميه عصير ، ويخلى الميه خمر (wine) ويخلى الخمر (wine) دم ، وهو الوحيد اللى يقدر يحول القربان لجسد .

(تظلم البقعة المضيئة حول البهلوان بينما تظل حول الراوى )
الراوى إلى الجمهور : فى مرة يسوع كان معزوم فى فرح هو و العدرا ، و لما الخمر خلص يسوع حول المية لخمر .

( يُظلم المسرح و ينزل الستار )

*****************

(يُفتح الستار على مسرح منقسم إلى جزءين ، أيمن و ايسر )
(يضئ الجزء الأيسر ... على مظاهر حفل .. العريس و حوله أصدقاءه و فى مكان بارز يجلس رئيس المتكأ)

العريس : أهلا بيكم فى الحفلة
صديق أول : مبروك يا صاحبى
صديق ثانى وبيده كوب : الخمر خلصت
رئيس المتكأ : فين المشروبات
العريس كمن يحدث نفسه : الخمر خلصت أعمل ايه أعمل ايه .. مين ينقذنى من الورطة دى

(يظلم الجزء الأيسر ويضى الجزء الأيمن ..على مظاهر حفل وبعض الأجران .. يسوع وامه العذراء و احد التلاميذ)

العذراء مقتربة من يسوع : ما عندهمش خمر
يسوع : لسه مجاش وقتى
العذراء : كل اللى يقولكم عليه اعملوه
يسوع : املوا الأجران مية

(يقترب يسوع من الأجران )
يسوع : اشربوا ... الميه بقت خمر

(يظلم الجزء الأيمن و يضئ الجزء الأيسر ... العريس يقدم كوباً لرئيس المتكأ )

العريس : تفضل ، اشرب
رئيس المتكأ : ياه ... دا طعمه حلو قوى .. دا أحلى مشروب شربته فى حياتى

)يلتف الأصدقاء حول العريس فى بهجة وبيدهم الأكواب(
الجميع من حوله : ياااه دا أحلى مشروب ... شكراً ليك ...وشكرا ليسوع… شكرا ليسوع

(يُظلم المسرح و ينزل الستار )

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :