حملة
لنضافة الشوارع والميادين
شاملة
الكل... مفيش فرق بين دين ودين
ادينا..
مسحيين ومسلمين
أولاد مصر
طل.... رافعين أيدينا
بعلامة النصر
ذي الفل
لا تقول حقد ولا غل
ولا في فتنه
اغتالنا كل أغلال
الحكمة
واللى يدل
صليب وهلال
على باب بيتنا
.....................................
واتقال
اللي مش هيشارك في التجميل
ويبقى زبال
عقله استقال
يا إما عميل
واهو كله استهبال
...................................
وان العلامات
تشير
لتغييرات
اعجوبيه
ذي ما قال المشير
الاشيه
هتبقى معدن
واللي بيتاؤه هيدندن
وظهرت كلمات
سلبيه . . . . ايجابيه
أنا قلت العملية ماشيه
من غيري أو بيا
........................
وارتفع شعار
الوحدة الوطنية
واتقال من العار
والجهل
متثبتش حسن النية
خليك في السهل
وبلاش تبقى عبيبط

انا قلت هاوضح
شئ بسيط
و هاطرح
حبه اسئله
بس المشكلة
انى بفضح
من غير تبسيط
...........................
يا مسهل
هل من السهل
الإخوان يتغيروا؟
طب صيت الإخوان أيه؟
ولا نسيت؟
كيف يفكرون وماذا يروا؟
متتغروش
بابتسامه الوشوش
وان كراهية الإخوان
خلاص الكون ساعها
وان فلان
اللي في قلبه أحقاد باعه
متتغروش
بابتسامه الوشوش
دى ناس ساعة الشر
مش بشر
مبيرحموش

النهارده
ده
بيقولك فينك
وعشيه
سافك دم أبناء دينك
حتى من غير دية
وانا شخصيا لا يكفيني الله يعينك
ولا أكاذيب
الوحدة الوطنية
فين الوحدة الوطنية
في قتل كاهن
وتعذيب
كائن
وهدم سور
وضرب نار .... رشاش
على أهل الدار.... في الدير
يبقى مين فينا اللي حمار
وشوفه طشاش ؟
.......................................
على كل حال...عادى
أنا موافق
اعمل اشتراك نادي
وأتناسى دينه السادى
وانسي كلمه عداء
واللي معادينا
واعتبر دميانه ذي أسماء
واحمد اخو مينا
والكل بلفظ أخوات
ينده ينادينا
واجمع الناس عشان
نضافه الشوارع
اللي اشتكت حالها
من اللي شان
طهرها وجمالها
.........................
وهبدا بالشارع ده.. شارع اللي سابونا
وانضف دم على سكينه
دبحت أبونا
وسكينا
على الموضوع
واختفى صاحبها بدون قصاص
وقالوا عليه هربان

وهنا هاشيل فوارغ رصاص
حي مضروب على الرهبان
وقالوا الضرب مشروع
وهازور شارع كنيسة القديسين
وأمشى على دمهم خدي
واخد معاهم وأدى
واحكيلهم ع اللي بودي
واهمسلهم أحنا مش ناسيين
قضيتكم في النية
وحقكم مش سراب

وأمر ع العمرانية
وأقدم بوكيه ورد وياسمين
هديه
للي راحوا بغدر الغادرين
و أشيل من حيطان
الكنيسة ريحه البارود
وانثر في هواها البخور
وشتان
الفارق بين البخور والبارود
وأقول هيا الحيطان بتحس؟
ولا مجرد صخور صايبها البرود
سمعت صوت اااه
صوت أنين
صوت أم ابنها تاه
أو في أيدها ومش لاقياه
يااااه كل ده تجميل
الصوت كان صوت أم ابنها
صابه الموت ... مات

شفت دموع
من غير عيون
كنت شايف الألم
عارف الألم
لما يتألم؟
ويا ريت القلم
يقدر يخبر
عن أمر دمع اللى أتظلم
ولا يعبر
عن جمع جمر اللى ظلم
حتى علم الكلم
عجز عن كلام يصبر
بس ربك ... يدبر

اخدت من دمعها ودقت
وفقت
ولقيت
طعمه... شهد ممرر
شكيت ! في دمع شهى ؟
قد أيه فيكى مجد وجلال
يا كنيستي
قلت يا واد قدامك الدمع شلال
كرر
وبعدين قرر
وفوق وبدل ماتدوق اشرب
وشربت ولقيت طعم الشهد
برضه ممرر

تخيل بقى
اللي بكى
جماد حيط
نادم ومتأثر
وأنا اللي بني ادم
ومتأصل
مش نادم
مع أن قايمه المطلوبين
بتهمسلى أسمى
القادم.
....................
سبت حيط الكنيسة
بقلب دامع
وعارف مقامها
محفوظ
وكنست شارع
الجامع
المبنى قدامها
بخبث محفوظ
وبدم اللي ماتوا
بس الحدوتة في دينا مقلوبة
اللي يخسر حياته ... يفوز
ولو قلبتوا الحدوتة وأصحابها
بالسيف ... بالكنوز
بالسلطة . . . . بالنفوذ
دينا مش بيدينا ع الغلطة
لكن يعدلها ويعدلنا
ويرجع يقول
اللي يخسر حياته يفوز
..................................
وأكيد
بما أنى عنيد
هانضف المنطقة دية
ايوه نجع حمادي
قدام المطرانيه
ومن كتر عنادي
بقترح ننادى
شباب من كل البلاد
وننضف الشارع ليله
عيد الميلاد
هنضفه سبعه يناير
ألفين وعشره
اصحي ينايم
فوقوا يا ناس
معادنا بعد القداس
مسكت مكنستي مستعد للعمل
لنضافه الشارع اللي اتهمل
وفى عيوني ضحكه
وعلى وشى أمل
يوم العيد
هساعد عم اسمه القرابنى
واختارولى منطقتي قدام كنيستي
وقلت آمين
وطلعت و آه من اللي صابنى
على الأرض بدل الورق
مرمى بني ادمين
ييه حد ينام قدام الكنيسة
في بدايه العام
لا لا أنت كده تتعيب
قوم يا عم
روح لأبوك
قله كل سنه وأنت طيب
قوم أنت معندكش دم
قوم ..بس لقيته مش نايم دا مغيب
وطلع عنده دم ....دم كتير دم يشيب
طيب وأنت نايم ولا برضه ميت؟
انا مش اديتك من شويه
قربانه بعد صلاتك
وكنت راجع لمراتك
وعيالك
مالك ؟
ايه ؟بتتألم ليه وعلى ايه؟
صدرك؟
ورينى اللى فى صدرك
حب ... طهر... المولود اليوم نذرك
وطيبه ...واحساس ... وطلقه رصاص
قطعت ازاى جلدك
ودك
النحاس عضمك
وكنت فينك
لما شرحت شرايينك؟
وأضربت قدام عينك؟
يعنى كنت شايف نفسك
وأنت بتنضرب؟
في يوم عيدك
والدم اللي ف أيدك
دمك؟
طب مسكته ازاى؟
طب مين اللي طخ؟
لالا طب ليه طخ؟
طاب ليه طبخ السم؟
دا حتى لطخ
الجاكت
جاكت العيد الجديد
وأنت ساكت
ومطمن
من من أيه
والرصاصة في صدرك
جبت منين الابتسامة
وأيه مصادرك
غير انك هاتعيد مع السيد
...............................
وأنت أيه اللي جرالك
رصاصه في قلبك
ورصاصه في جنبك
طب أيه ذنبك؟
ولا ذنب ابنك
اللي مش مستني غير
ضحكتك في وشه
وقولك كل عام وأنت بخير
عشرين جنيه !
بتاع أيه؟
أيه معديه ... هديه
ااااه عديه
عشره لعيسى
وعشره لمينا
ياريتك اديتهالم
قبل ما تيجى الكنيسة
خايف ؟ خايف ليه؟
خايف علينا
متخفش اللي حماك حامينا
على كل حال
هوصل العدية
وهوصل لو طلع لدمك دية
ارتاح استحالة نقول عليك مات
ولو ماد الكون بيا
وأنا قعيد
هاثبت على انك شهيد
وابلغ ولادك
ابوكم استشهد في سبيل الدين
اليوم بدل ما كان عيد
عندكم عيدين
.....................................
يالى عايزين
الكل يسارع
ولو لزم الأمر - يصارع
لنضافه الشوارع
وأضافه لمحه جمال
تزيين
على وشوش
موحوله
وندارى خدوش
في النفوس محفورة
تزييف
لان الخدوش صدوع
..............................
يالى عاملين حمله
لنضافه الدولة
ونشيل الورق والزبالة
مش بالاولى
نستأصل
اصل
الحقد
وخيانة الامانه
ونكنس نار التعصب
ونصب
عليها حب
ونكنز في قلوبنا الحلو
عمر ما كان .... الحل هو
الهروب
ولا هو كلام شعارات؟
ازاى نبقى أيد واحده
وحقي منك مسلوب؟
ازاى كل يوم تنام ظالم
وأنا على امرى أنام مغلوب؟
ازاى لما اطلب حقي
ابقي مطلوب؟
ازاى تعدل صوره على الحيط
والحيط والبيت مقلوب ؟
أوعى تكون فاكر نضافه الشوارع
تعدل المقلوب
أوعى تكون فاكر نضافه الشوارع
تنضف جوه القلوب

تمــــــــــــــــــــت

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :