بقلم: مرثا فرانسيس
ليه يابن بلدي قلبك قسي وأصبح حجر
 رغم ان بيجري في عروقك وعروقى دم مصر
شايفك اتغيرت ،وبتطعن في الضُّهر،منين عرفت الغدر؟
انا عارفك؛ أخويا وزميلي، وبقابلك كل فجر وعصر
ليه يابن بلدي نسيت عشرتنا ،وهان عليك العيش والملح
 انا بجري عليك ياجاري وقت تعبي ووقت الجرح  
ليه يابن بلدي قدرت تشوفني عدوك وانا ابن بلدك
كان أوْلى تمد لي ايدك نعمر ونبني  بلدي وبلدك
ولا توجِّه عليّا سلاحك ؛ وتضيِّع عمري بإيدك وتضيِّع نفسك
بنادي عليك ياصاحبي وزميلي ،جاوبني من قلبك 
هل ربك بيطالبك بدمي؟ وينفع تقابله وايدك عليها دمي ؟
ولا أحسن نقابله وايدنا في ايد بعض، ومعانا ابنك وابني
انا معاك وليس ضدك ولا ضد ايمانك، لك حرية وانا ايضا ليّ
انا بحبك ، ومسامحك، لكن برفض يكون السلاح  لغة بيننا
افتح عينيك وشوف اعمالك ؟ اسمع ضميرك ،ويكون حَكَم بيننا 
الأرض تكفينا انا وانت ، ليه رافضني اكون معاك فيها،وهي أرضنا
ليه تقبل ان ولادنا يفقدوا الأب  أو حنان الأم  و يكبروا  كارهين حياتهم
من منظر القتل والدم والعنف ،وتتشوّه نفوسهم من صدمتهم في جيرانهم واصحابهم
الأرض تكفينا انا وانت،وولادنا يكونوا اصحاب،ولا خايفين من بعض ولا بيغدروا ببعض
 تعال معايا نمسك ايد بعض ونكمل حياتنا، نحترم حرية ورأي بعض 
ونرفض كلنا  اي حاجة تفرق بيننا، ونعيش سوا وولادنا يحبوا بعض
نعلمهم ازاي عشنا طول عمرنا، ، اصحاب وجيران؛ نحترم الإنسان
 صحيح مختلفين، لكن محبين ، مسالمين، ، وبنملا بلدنا حب وحنان
نحب بلدنا  وأرضنا بجد؛ نملاها زرع وحب وألوان ، بدل الدم ما اصبح في كل مكان
مصر تستحق نحبها، تستحق نزرع ارضها، ونحصد سوا زرعنا
مصر جميلة يابن بلدي، ليه نخرّبها ونضيِّعها ونضيِّع عمرنا
ليه نكسر قلب امنا ، ليه مصر تخسرنا كلنا 
مصر ممكن تبقى جنة بينا ، بيك وبيا وبأحمد ومينا
هل تقبل يابن بلدي ؟
محبتي للجميع

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :