شفاء المولود أعمى
 (يوحنا 9 )
    
(الشخصيات : يسوع المسيح ، الأعمى ، رجل مجتاز ، جموع )

(يفتح الستار على شخص شحاذ يستعطى ... جالساً و بيده طبق صغير به بعض عملات معدنية ترن مع حركة الطبق)

الأعمى وهو يحرك الطبق : حسنة قليلة ... أى حاجة  ... ساعدوا واحد أعمى

 (يدخل رجل يقترب من الأعمى ، يُخرج الرجل من جيبه قطعة معدنية ويضعها للأعمى فى الطبق )

الرجل :  .........
الأعمى : شكراً شكراً يا أخى
الرجل : العفو
الأعمى وهو يمسك بالقطعة المعدنية ويقلبها يمينا ويساراً : هى دى تبقى كام ؟
الرجل : دى تبقى ربع جنيه
الأعمى : كوارتر واحد ...ع العموم شكراً يا أخى
الرجل : العفو يا سيدى
الأعمى : هو الأخ العزيز من أى سبط
الرجل : من سبط بنيامين
الأعمى : أجدع ناس سبط بنيامين دول
الرجل : شكراً شكراً

(يحاول الأعمى أن يقف)

الأعمى محاولا الوقوف : خد بإيدى يا ابنى
الرجل وهو يمد يده : خلى بالك ... بالراحة
الأعمى وقد تثبت فى مكانه فاتحاً حواراً : هو النهاردة إيه من أيام ربنا ؟
الرجل : النهاردة السبت
الأعمى : السبت .. دا اليوم اللى المفروض متعملش فيه أى حاجة ... ولا حتى تمد إيدك وتقومنى
الرجل متلفتاً حوله : أووه ... الحق علىً ...
الأعمى هامساً : متخفش مش ح أقول لرؤساء الكهنة و الفريسيين
الأعمى صارخاً حوله : إنك مسكت بإيدى وقومتنى وإحنا فى يوم سبت
الرجل : وطى صوتك يا عم ... دا إيه اليوم النحس ده
الأعمى : ما تزعلش أنا بضحك معاك

 (يتحرك الأعمى من مكانه قليلا ليأتى على الجانب الآخر من الرجل )

الأعمى : انت قلتلى من سبط مين
الرجل صارخاً : قلت لك من سبط بنيامين ... بنيامين
الأعمى : خلاص سمعت .... أنا أعمى مش أطرش
الرجل محاولاً الهروب : أنا ماشى سلام
الأعمى : استنى بس
الرجل : عايز إيه تانى
الأعمى : خدمة بسيطة .... سؤال صغير
الرجل : أنا مش فاضى
الأعمى يخرج بعض العملات : كام دول
الرجل : 10 جنيه
الأعمى حلال عليك
الرجل وقد بدا عليه الفرح : خير عايز تسأل فى ايه
الأعمى : بما إنك إنت مفتح وانا مقفل .... عايز منك توصف لى شكل الدنيا
الرجل : الدنيا كلها ؟
الأعمى : أيوا كلها يا أخى ... ايه المشكلة .. النهاردة السبت وانت معندكش شغل
الأعمى يعلو بصوته : ولا تكون بتشتغل يوم السبت
الرجل : وطى صوتك ح تودينى فى داهية
الرجل مضطراً : عايز تعرف إيه من الدنيا
الأعمى : نبدأ بحاجة سهلة خالص .... الألوان ... إيه هى الألوان
الرجل متعجبا وعاجزا عن الإجابة : الألوان .... الألوان هى ألوان ... أشرحها إزاى دى
الأعمى : يعنى مثلا الأصفر لونه ايه ... قصدى شكله ايه
الرجل : الأصفر شكله أصفر  ... شكل قرص الشمس .... لون الليمون الأصفر ... والورد الأصفر
الأعمى : إنت قلت لى من سبط مين
الرجل : من سبط بنيامين
الأعمى : أذكى ناس سبط بنيامين دول ... هو انا كنت شفت شمس ولا ليمون و لا ورد قبل كده ... انا اتولدت أعمى يا ابنى
الرجل : معلش معلش حقك علىّ ... ما انا مش عارف اوصفلك ازاى الأصفر .. دا لون صعب
الأعمى : بلاها أصفر .... خلينا فى الأزرق
الرجل : اهو دا سهل ... السما اللى فوق دى كلها أزرق
الأعمى : يااااه .... كل اللى فوق دا أزرق ... دا اكيد لون جميل يا بختكم يا مفتحين
الرجل : والميه فى البحر لونها أزرق
الأعمى : يعنى الميه اللى بنشربها من البير لونها أزرق
الرجل : لأ ... الميه اللى بنشربها مالهاش لون
الأعمى : مالهاش لون ازاى ... يعنى ما بتتشافش .... محدش بيشوفها لا المقفلين ولا حتى المفتحين
الرجل : بلاش لون الميه ده علشان دا صعب عليك شوية
الأعمى : خلاص ... خلينا فى أخر لون ..... الأسود .... شكله ايه
الرجل : الأسود انت اكتر واحد تعرف توصفه .... اللى انت شايفه قدامك وبتنام وبتصحى فيه ... هو دا اللون الاسود
الأعمى : يااااه .... دا وحش قوى
الرجل : خلاص كده سلام
الأعمى : هات الفلوس ... انت معرفتش تشرح حاجة
الرجل : دا حقى ... انا شرحتلك وتعبت واشتغلت
الأعمى : عايز تقول انك بتشتغل يوم السبت ... يا رؤساء الكهنة ... يا اخوانا يا فريسيين
الرجل : خد فلوسك

(يخرج الرجل مسرعاً)

الأعمى وقد بدا عليه الحزن : كل الناس بتشوف لكن أنا لأ ... مش عارف شكل الشمس ولا البحر .... قالولى ان اللون الوحيد اللى ممكن أشوفه هو الاسود ... فى النهار وبالليل ... أصحى وانام  عليه ....حياتى كلها ضلمة .... اتولدت أعمى و ح اموت أعمى.

ينظر الى يديه :حتى شكل ايدى مش عارفه ....

يكمل : الناس حوالىّ بيضحكوا علىّ علشان أنا أعمى .

موجهأ كلامه الى الجمهور :قالولى انه فيه واحد اسمه يسوع بيشفى كل الناس العيانين .... فينك يا يسوع  تشفينى  عايز أشوفك واشوف السما وأشوف الشمس .....

الأعمى ينهار باكيا : فينك يا يسوع .... فينك يا يسوع

*******

(يدخل الرب يسوع وتلميذان معه)

تلميذ : من أخطأ ... أهذا أم أبواه حتى ولد أعمى
يسوع : لا هذا ولا أبواه ... بل لتظهر أعمال الله فيه
الأعمى يستشعر يسوع حوله : يسوع  الناصرى

(يقترب يسوع من الأعمى ، يتفل على الأرض ليصنع طيناً ويطلى عينيه)

يسوع : اذهب اغتسل فى بركة سلوام

(يتحرك الأعمى بعصاه يقوده أحد التلاميذ حتى يصل البركة ... يغتسل فتنفتح عيناه ويرى)

الأعمى : أنا شايف دى ايدى ... دى السما .. ودى الميه

(يتحرك الأعمى عائدأ إلى يسوع)

الأعمى : اشكرك يا يسوع لأنك شفيتنى
يسوع : أتؤمن بابن الله
الأعمى : من هو يا سيد لأومن به ؟
يسوع : قد رأيته ... والذى يتكلم معك هو هو
الأعمى ساجدا : أومن يا سيد

(الأعمى يسجد ليسوع)

(يظلم المسرح و ينزل الستار)
********

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :