بقلم :أماني موسى
(هما اللي قالوا لي)
- يتمتع المواطن المصري ببعض السلوكيات التي تميزه عن بقية الكائنات والمخلوقات، ومن ضمن السلوكيات دي أن الناس الوحشين الأشرار دول هما دايمًا اللي قالوا له، طبعًا أنت مش فاهم قصدي إيه؟ هقولك.... في الفترة الأخيرة من حياتي الكبيرة لقيت إن كل القطر المصري بيتكلم بصيغة (أصلهم قالوا، بيقولوا، سمعت أنهم قالوا) والسؤال يا إخوتي في الوطن هما مين بالظبط اللي بيقولوا؟؟ وبيقولوا إيه؟؟ وقالوه لمين؟
إلى أن تعرف الإجابة كدة وربنا يكرمك ابقى اتصل على 0900
=======
(لغة السيس والإزعاف)
- طول عمري أعرف إن اللغة هي مجموعة من الإشارات والرموز اللي بيستخدمها الناس عشان يفهموا بعض، تمام؟ لكن في عصرنا الحالي اللغة مبقتش واحدة وليها قاموس واحد لكن كل فئة من الشعب ليهم لغتهم وقاموسهم الخاص بيهم، فمثلاً الشباب ليهم لغتهم وإشاراتهم الخاصة بيهم زي (الواد دة سيس، بيس يا مان، متبقاش جرفتة، كبر الجي وروق الدي –أي كبر الجمجمة وروق الدماغ، البنت دي مكنة)!!
وعلى كلاً فاللغة دي ليها قاموسها التعريفي الخاص بيها وسط الشباب، وهناك لغة التجار (مش هبيع بأقل من أرنب، القلم دة بشلن –يعني خمسة جنيه- لأن الشلن انقرض من زمان طبعًا، الكتاب دة بـ بريزة –طبعًا عرفت البريزة دي إيه، عشرة جنيه، صح برافو عليك).
أما اللغة اللي لغاية الآن مش لاقية ليها تفسير أو معاني هي لغة الشعب زي مثلاً (الفيسا بدل الفيزا، الإزعاف وطبعًا المقصود بيها الإسعاف، البشمهندز خريج هندسة موزبيق يمكن، الميكروباظ دة بقى حتة الحديدة اللي بتنقل المواطنين اللي عالحديدة).
- قام المصريون بمظاهرات جامدة أخر حاجة عشان واحدة ست وانتفخت عروقهم ومؤخراتهم تأثرًا بالموقف، ولم نشهد لهم خيالاً ولا سمعنا لهم نفس واحد عن الطماطم وللا الخضار اللي سعره بقى للمواطن الهاي وهو بقى مواكن في الباي باي!!
==========
(مواطن على ما تفرج)
- كل يوم بيمر وبشوف حال المواطن المصري مقارنة بأوضاع أقرانه من المواطنين قاطني بلاد الفرنجة بتأكد أكتر إن المصري مش مواطن أوي لكنه مواطن على ما تفرج.
============
(انجازات سابقًا وأجازات لاحقًا)
- نعيش الآن شهر أكتوبر المجيد والفريد وطبعًا مننساش يوم 6 تحديدًا لأنه أجازة طبعًا مش لأنه بيفكرنا بالنصر، بيني وبينكوا حاجة حلوة خالص لما كل أيام الإنجازات في الماضي تتحول لأيام أجازات في الحاضر.
أدعوا معايا اللهم كتر من أجازتنا وأوعوا حد يفهمني صح، أنا قصدي طبعًا الإنجازات ومن ثم الأجازات.

 

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :