بقلم: مينا ملاك عازر
جاءت تصريحات السيد "مجدي راضي"- المتحدث الرسمي عن مجلس الوزراء- مطمئنة للغاية، ومزيلة لكل قلق من الممكن أن ينتاب المصريين بخصوص مستقبل البلد، وبالتالي مستقبلهم. فقد خرجت التصريحات تنُم عن وعي سياسي وإقتصادي وشعبي، وحس وطني عالي أوي أوي أوي.. الراجل بيسألوه عن سر ارتفاع الأسعار، قال: وأنا مالي، أنا راجل بتاع استثمار. ولما سألوه على القطن، قال: ناقص كمان تقولوا لي القطن طويل التيلة.. يا راجل الله يكون في عونك، إنت كمان حاتشغل بالك بالكوسة والفاصوليا والبادنجان؟! إنتَ في إيه ولا في إيه؟ إحنا برضه بتوع كده؟ وإللي زاد وغطى إنهم تطاولوا وبيسألوك على القطن، وإن سألوك على القطن قل لهم قطن إيه إللي إنتَ جاي تقول عليه إنتَ عارف أبلا معنى القطن إيه؟!
 
وهما طبعًا مجموعة من الجهلة المصريين كلهم يا باشا جهلة، ما يعرفوش معنى القطن إيه، ولا يعرفوا أهميته.. كانوا بيضحكوا علينا زمان بيفهمونا إن دي سلعة إستراتيجية مهمة لـ"مصر" بتجيب دخل كويس، والراجل الساذج "محمد علي" لما جابها لـ"مصر" عشان "مصر" تنافس بيها "أمريكا" كان مش فاهم وبيضيع وقته!!!
 
 يا راجل، الله يكون في عونك يا سيد "راضي"، بجد أنا لو منك كان جالي إحباط بقى، الحكومة وحضرتك معاها عمالين ترموا أراضي الدولة يمين وشمال ومصانعها، وبتحاولوا تبنوا منتجعات، وتحاولوا تيسروا هروب الناس بأموال البنوك، وتكافحوا من أجل رجال الأعمال، والناس الفاضية عقولهم وبطونهم دول بيكلموك على الطبيخ والقطن، عنهم ما أكلوا يا راجل، عنا ما بعنا قطن ولا زرعناه! يا ريت نزرع بدل منه كيوي، الكيوي حلو يا باشا تحب الكيوي على التورت، ولا تحبه لوحده يا باشا؟ تحب نزرع "مصر" إيه؟ ولا أقول لك، سيبك بلا زراعة بلا نيلة، يا عم دي حتى الزراعة وحشة وكخة، المهم الاستثمار بتاعكم يا باشا، وسيبك من نظريات الناس المتخلفة بتوع "ماليزيا" و"الصين" و"اليابان"، دي عالم عبيطة هما كمان!!
 
قال بيقولوا: إن المهم الاستثمار في البشر، بشر إيه يا باشا عنهم ما أكلوا، ده إحنا عندنا حتى بشر كتير يعني لو مات أد أربعين خمسين مليون واحد من الجوع مش مشكلة، وبعدين المثل بيقول يا باشا: ما حدش بيموت من الجوع، صح ولا لا، يبقى خلاص بقى، حانشغل بقى نفسنا بكلام فارغ ليه؟! المهم الناس لازم تفهم إننا بنضحي بكل شيء، المهم "مصر" تعيش، تعيش بقى من غير ناس، تعيش بناس قليلة، تعيش بناس معينة، مش مهم، المهم "مصر" والاستثمار، وسمعني أجدع سلام للاستثمار والمستثمرين؛ لإن الحكومة دي حكومة الاستثماااار فاهمين ولا لا!؟.

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :