بقلم: أماني موسى
إن الشعب المصري من أقدم شعوب العالم حضارةً وتاريخًا وأصالة وترجع أصول المصري القديم إلى عصر سيدنا خشبة، وامتاز المصري عن غيره بالعديد من الصفات التي أكتسبها من البيئة التي يعيش فيها والتي حباها الله بصفات رائعة كالجو المعتدل الحار المشمس شتاءً.
سيبك من كل الكلام الحلو اللي فوق دة واللي درسناه بالابتدائية ولما تتخرج بتكتشف أن المصري حاجة تانية خالص غير اللي في الكتب، واضح أن عوامل التعرية والرطوبة أثرت عليه والحمد لله.

والآن عزيزي القارئ إليك بعض الصفات التي يتميز بها الشعب المصري والتي حباه الله بها والحمد لله ولا حول ولا قوة إلا بالله:
- المصري هو الكائن الوحيد اللي لغاية دلوقتي مش قادر يفرق بين الكباري العامة والمبولة العامة!
-  المصري برضه هو الكائن الوحيد اللي طول الوقت بيستخدم الميه في الأكل والشرب وتغريق الشوارع وناسي تمامًا أنها مهمة وحيوية لعملية الاستحمام واللي بيمارسها كل عيد مرة، والنتيجة طبعًا أنتوا عارفينها... أقلك أركب أي وسيلة مواصلات عامة وأنت تعرف النتيجة وتشمها بنفسك كمان.
- الشعب المصري عنده أعلى نسبة تدين وفي نفس ذات الوقت عنده أعلى نسبة تحرش وسرقة وفساد بكل ألوانه.

- الشعب الوحيد اللي انتخاباته منتهى النزاهة، ودة لأن نتايجها معروفة مسبقًا أو لأن محدش بيروح ينتخب من الأساس.
- المصري هو الوحيد اللي ماشي وشايل طبلة في إيده بيسقف بيها لكل واحد شوية، عاش الملك مات الملك.
- يتمتع المصري بالضحكة رغم كم المآسي والأهوال التي يعانيها في يومه.
- يتمتع أيضًا ببصيرة مستقبلية يرصد بها مستقبله المظلم ويناقش بيها مشاكله التي تبدو أحيانًا من غير حل ولكن البسمة أيضًا تعلو شفتيه، وأنت متقدرش تفرق هل دي بلاهة ولا رحمة القدر؟!

- المصري معاه وصفة دقيقة وتفصيلية لكل شوارع وحواري مصر، ولو سألته على أي مكان في أي وقت هيوصفهولك حتى لو مش عارفه، معطاء بقى ومش بيرد سأليه... غريبة جدًا.
- الشعب الوحيد اللي ليل ونهار بيناقش قضايا المجتمع في الأفلام والمسلسلات والمقالات وبرامج التوك شو ودائمًا وأبدًا لا يتعدى مرحلة الكلام، لتظل المشاكل قائمة دون حلول.
- الشعب المتميز في نوبات الصحيان بعد فترة من النوم خخخخخخخخ ، فتلاقيه يهب إذ فجأة لحل مشكلة ما وبعدها يرجع تاني لنوبة النوم وكأن شيئًا لم يكن، غريبة برضه صح؟
 

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :