عزيزى الحمار .... اسف اسف عزيزى الثائر عارف شعورك و مقدره انت حاسس دلوقتى ان الاخوان و الليبراليين و الجيش و الشرطة و المسلميين و المسيحيين ( حتى المسيحيين ) استحمروك  قولها ما تخفش دا الشعب كله استحمرك لكن و لا يهمك انا ها كتبلك دلوقتى روشتة العلاج من الاستحمار : 

ايوه كنت مستحمر لما قالولك ان مبارك عنده 70 مليار دولار و دا مبلغ تقريبا مش عند امريكا نفسها لكن صدقت و بعد كده طلع الوزير البريطانى للى قال كده قال لا ما كنش قصدى مبارك و عمك محمد حسنين هيكل قالك انا ما عرفش حاجة يا بيه دا هما للى قاللولى لكن انت صدقت و صدقت كمان ان كل دخل قناة السويس بيروح فى جيب مبارك و جيبت الالة الحاسبة و قعدت تحسب الفلوس دى لما ترجع و تتوزع على الشعب يا سلام دا نصيبك ممكن تعيش به سنين ملك و لا شغل بقى و لا مذاكرة . تنظيم الاسلام الفلسطينى التابع للقاعدة بيهدد فى 2010 انه هايفجر الكنائس علشان خاطر عيون الست كاميليا شحاتة و بعدها يفجروا كنيسة النجاة  فى العراق و يعلنوا انهم للى فجروها و بعدها بايام يفجروا كنيسة القديسين فى اسكندرية و انت بكل سذاجة لما الاخوان يقولوا ان مبارك و العادلى فجروا الكنيسة تصدق بكل بساطة بالرغم ان فيه واحد هددك و بعد كام يوم نفذ التهديد لكن انت صدقت  . صدقت ان فيه حاجة اصلا اسمها موقعة الجمل و ان امن الدولة هو للى هاجم الاخوان فى الميدان بالاسلحة و الاربى جى و الثوار و الاخوان كانوا يا عينى عزل لكنهم انتصروا عليهم و احتلوا الميدان منهم و مات منهم الشهداء طب ازاى ينتصروا عليهم من غير سلاح و ازاى يموت منهم كل دول و فى الاخر برضه هما للى يحتلوا الميدان مش مشكلة بس المهم انك صدقت . صدقت الاخوان لما قالوا مبارك كان مضطهدهم و ان الحرس الجامعى كان بيمنع تعيينات اى اخوانى و فجأة تكتشف ان امن الدولة كان بيضطهد المصرى الا لو اثبت انه اخوانى لان نصف اساتذة الكليات و ربع رؤساء الجامعات تقريبا اخوان بس انت صدقت و طالبت ان الجامعة تبقى سداح مداح من غير امن و لا امان  بالرغم ان مافيش مدرسة كتاب فى العالم كله من غير امن .

صدقت ان عصام شرف ثورجى و بتاع النظام الجديد و ايوه بقى و شيلتوا على كتافك فى الميدان و ما كلفتش خاطرك حتى تلعب على النت و تكتب اسمه علشان تعرف انه كان وزير مواصلات فى حكومة مبارك و للى اختاره مبارك و للى مشاه كان مبارك لانه اتسبب فى حادثة انقلاب قطار ( على فكرة انا مش شايف ان فى عيب انه يكون من نظام مبارك بس انت للى كنت شايف كده ). صدقت لما الاخوان قالولك انزل يا واد و اهتف باعلى صوت يسقط حكم العسكر و انت شغال و صوتك هايتقطع من كتر الهتاف كانوا قاعدين مع العسكر بيتفقوا معاهم تسيبونا البلد و تأخدوا كام ؟؟؟ .صدقت مرسى و عصابته لما قالولك مشاركة لا مغالبة صدقتهم لما قالولك لا مافيش رئيس هايبقى من الاخوان صدقتهم لما قالوا على كل واحد ضدهم انه فلول و انهم هما للى ثوريين و حطيت ايديك فى ايدهم و ركبوا عليك لحد ما وصلوا للكرسى نقول كمان بس استنى للمقال التانى .