بقلم: ميرفت عياد
باحلم برغيف عيش
من غير نخاله وخيش
وبعد ما أقف ساعات
ما سمع كلمة مفيش
عجبي!
****
بكفياك بقى يا صحفنا القومية
أخبار ومانشيتات وردية
يا ريتك تكتبي عن قضايا الفساد
ولا خلاص بلادنا خاليه من الحرامية
عجبي!
****
بسألك يا لسانى ليه دايمًا بتسب
بدل ما يخرج منك كلام الحب
رد وقال لى بدل ما تلومني
لوم عصبيتك اللي عليها الذنب
عجبي!
****
عجبي عليك يا إنسان في كل الربوع
بتبتدي حياتك بصراخ مسموع
كأنك عارف رحلة شقاك واحنا
فاكرينك صغير وبالحياه مخدوع
عجبي!
****
أنا وأنت قط وفأر دايمًا في خناق
من غير ود أو حتى لحظة وفاق
لكنك يوم ما بعدت عني
حسيت بمرارة طعم الفراق
عجبي!

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :