بقلم: مينا ملاك عازر
ماليش نفس آكل قلقاس وأمص قصب، ومين يجي له نفس في أيام سودة زي دي؟! ولكن من باب تطليع الغل ممكن نجيب لنا لبشة قصب نعصرها تحت أسناننا ونرميها بعد ما نمصها، ما هو ده حال الدنيا لما يعوزك حد يمصك ولو نفسه حلوة يبلعك ولو قرف منك أويي... المهم يكون استفاد منك.

وحكاية القصب دي بتفكرني بحكاية إتحكت لي.. تدور أحداث هذه القصة في مكان ما في مصرنا الغالية، أقصد حكاية بيع موبينيل الحكاية دي أثارت الفتاوى، إللي يقول ساويرس كان عايز يبيعها وإللي يقول المشكلة في السعر هو عايز يولعها وإللي يقول إن الرئيس باع ساويرس للفرنسيين لما سافر الريِّس لفرنسا، وهناك من يقول إن ضرائب الجزائر هي التي تقف وراء رغبة ساويرس في بيع موبينيل المصرية، ولا عليك أن تحاول أن تفهم لأن ببساطة لا علاقة بين ضرائب الجزائر وبيع موبينيل، خاصةً أن من قال هكذا قال أن ضرائب الجزائر مربوطة على موبينيل إزاي ليه من إمتى؟ مش مشكلة المهم يكون عنده بيئة خصبة للفتاوى، والفتاوى حلوة وإنت حلو وأنا حلو وموبينيل كمان حلوة يالا بقى والجزائر حلوة.

خليك معايا.. ساويرس طلع من مدة وقال أنا اختلفت مع الفرنسيين على سياسة الإدارة مع بداية نزول الشبكة التالتة للمحمول في السوق المصري، فاحتكمنا للمحاكم الدولية حسب نص العقود إللي بيننا حيث أنه إذا اختلافنا لازم حد يخلع من الشركة بحسب الحكم إللي حاتحكمه المحكمة، والمحكمة حكمت للفرنسيين بسعر غالي عليهم، فاستغل ساويرس الموضوع وتمسك بالسعر عشان يلوي دراعهم وما يبيعشي ابنه البكر في مصر، يبقى لما يقاوح في البيع ويقاوم بالمحاكم وغيره يبقى هو إللي عايز يبيع وهو المنتفع بالبيع، بالذمة مش حرام عليكم مش كفايانا فتاوى وخلينا أحسن في مصمصة القصب؟.

بحق.. جبتو قصب، جيبوه كلوه تأملوه وإنتم بتأكلوه، انظروا لذلك الكائن الدقيق المدعو سوسة وهو يشق طريقه في عود القصب رغم صلابته لا لشيء إلا لكي يصل للسكر متكبدًا مشقة التعب والحفر ليصل لهدفه ببطء، وأنا شخصيًا لا أمانع أن أكون سوسة تشق طريقها رغم العقبات على شرط أن يكون الحكم في الآخر عادل يعطيني السكر الذي استحقه.
ولا تنسوا أحبائي القلقاس وإلا تصبحوا من غير رأس والإنسان بدون راسه يكون لا شيء، فالرأس تعني الكرامة "ارفع رأسك يا أخي" وتعني العلم والثقافة والفهم وهم أسلاحتنا.

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :