بقلم: أشرف فايز
إبكي كمان ياراحيل
نوحي وزيدي عويل
غربة ليلك أهي محاصراكي
آهة ويلك ماشية معاكي
دم أولادك سايل لسة
بيروي أرض النيل
وابكي كمان ياراحيل

إبكي كمان وكمان
واتغطي .. بالأحزان
ابنك طالع يوم العيد
راجع ليكي وهو شهيد
أو ...
 زي ماقالوا قتيل
وابكي كمان ياراحيل
 

إبكي على الأحباب
والوطن الكداب
اللي لف بيكي ودار
واللي رماكي ف وسط النار
واللي ساقيكي الويل
وابكي كمان ياراحيل
 

إبكي على الغاليين
واسألي راحم فين؟
آه ياولادي ويانار حزني
وإمتى هاخدكم تاني ف حضني
ولا فراقكوا طويل
وابكي كمان ياراحيل
 

إبكى باستمرار
إبكي في ليل ونهار
م اللي باعك واللي خانك
واللي بيشكك في إيمانك
بغدر ماله مثيل
وابكي كمان ياراحيل

ياراحيل لمي الدم بإيدك
ياراحيل اطفي شمعة عيدك
ياراحيل إبكي وكالمعتاد
لفي الدار بسواد في سواد
حزنك حزن تقيل
وابكي كمان ياراحيل

ياراحيل لسه باقي دموع؟
ونبض في قلبك الموجوع؟
ظلم الشر مهما إن صابك
عمره مايقدر يقفل بابك
وخدي الماضي دليل
وماتبكيش ياراحيل

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :