اجرى المساعد بعض الاتصالات بعدد من الأشخاص المقربين من الرئيس مرسى إلى ان تمكن بعد عدة أيام من الوصول اليه وابلاغه شخصيا برغبة مبارك فى الالتقاء به لكى يطلعه على بعض الأمور والإسرار الهامة .

فوجىء مرسى بطلب مبارك ورغم انه رأى ان مثل هذا اللقاء  قد يسبب له حرجا سياسيا بالغا ومشاكل مع قيادات الاخوان المسلمين المنتمى اليهم الا انه وافق بعد تردده ليفهم ويتعلم من الرئيس السابق  كيف كان يدير البلد ويتحكم فى كل صغير وكبيرة فيها وكيف ظل منفردا بالحكم وحده بلا منافس لأكثر من ثلاثين عاما بينما هو يعانى الأمرين ويجد صعوبة بالغة فى الامساك بزمام الامور وتيسير امور البلد.
 

وفى سرية تامة التقى مرسى بمبارك على انفراد فى مكان ما بعيدا عن الجميع تجنبا للإحراج والإشاعات والقيل والقال وما ان رأى  مرسى الرئيس السابق حتى بادره بتحية الإسلام ثم قال له:

- بلغني انك عاوز تتكلم معايا فى بعض الأمور الهامة يا فخامة الرئيس مبارك ..خير ان شاء الله ..تحت أمر سعادتك.

مرسى :يا سيادة الرئيس احنا ملناش ذنب فى اللى حصل ليك ..انت جمايلك على دماغنا وجمايلك مش ممكن ننساها ابدا.

قاطعه مبارك قائلا : ورد الجميل يا محمد انكم ترمونى فى السجن انا واولادى وتتهموني بقتل الولاد بتوع التحرير رغم انك عارف مين اللى قتلهم ؟

مرسى: تقصد ان احنا اللى قتلنا الولاد بتوع التحرير ؟

مبارك : ومحمد محمود والولاد المسيحيين بتوع ماسبيرو ولولاد اللى كانوا فى إستاد بورسعيد ..وغيرهم وغيرهم يامحمد ..انت عارف كويس مين اللى قتلهم كلهم .. عموما مش هو ده موضوعنا ..انا عايز اعرف ليه انتم عمالين تبهدلوا فى انا واولادى ..عايزين منى ايه بعد كل اللى انا عملته عشنكم ..نسيت ان انا اللى دخلتكم البرلمان وعطيتكم 88 كرسى ..نسيت ان انا سبتكم تتوغلوا وتنتشروا وتمسكوا كل حاجة فى البلد؟ نسيت ان كل الخير اللى انتم عيشين فيه كنت انا كنت السبب فيه ؟

مرسى : يافخامة الرئيس احنا مش نسيين حاجة ..بس الموضوع مش فى ايدينا ..ده قرار الشعب ..الشعب عاوز كده ولو افرجنا عليك الشعب ها ينقلب علينا ويدخلنا السجن مكانك .. وبعدين احمد ربنا ان احنا معماناش فيك زى ما عمل الليبين فى القذافى .. على الاقل انت عايش وكرامتك محفوظة وطلباتك كلها مستجابه حتى وانت فى السجن .

مبارك : يعنى مفيش امل اطلع من السجن يا محمد قبل ما اموت ..حرام عليكم ..ده كان فى ايدى انا اعدمك واحد وراء واحد بس مرضدش اعمل كده لانى كنت بخوف الامريكان والغرب بيكم عشان يبطلوا يتدخلوا فى شئون بلدنا .

مرسى : سيبنا افكر شوية  يا فخامة الرئيس يمكن الاقى حل ونفرج عنك من غير ما الشعب يهيج ويثور وينقلب علينا ..اوعدك انى ها اعمل المستحيل عشان اطلعك انت واولادك من السجن بشرط تبعدوا عن السياسة وتسيبونا ندير البلد بالطريقة اللى احنا عايزنها ..ها خلى الشاطر والحاج بديع يشوف لنا محرج وحل لموضوعك ..سيب انت الموضوع ده على وعلى ربنا .

مبارك : عاوز اقولك حاجة ومتزعاش منى يا محمد  ..
 

مرسى : اتفضل قول ومش ها ازعل منك  

مبارك : خلى بالك من الامريكان يا محمد .. الامريكلن اللى حطوك فى قصر الرئاسة مش ها يسيبوك فى حالك ..انت وعدتهم بالكثير ولو نفذت وعودك ليهم ها تخرب مصر وتقسمها زى ما حصل فى السودان والعراق والصومال ويوغسلافيا ..الامريكان حطوك فى الكرسى عشان تدى سينا الى الفلسطنيين عشان ينتهوا من وجع دماغهم ويريحوا اسرائيل ..اياك تعمل كده يامحمد ..اياك 

مرسى غاضبا محتجا : الشعب هو اللى انتخبنى وحطتنى فى السلطة مش الامريكان 

مبارك : يا محمد مش ها نضحك على بعض الامريكان لعبوها معاكم صح ..لولاهم ولولا طنطاوى الله يسامحه كنت زمانى عدمت نصفكم والباقى كنت رجعتهم السجون والمعتقلات من جديد بعد ما سليمان بلغنى با تصالاتك السرية معهم ..

صمت الرئيس مرسى العياط وكاد ان ينهى اجتماعه مع مبارك من شدة الغضب وضيقه من كثرة الاتهامات التى وجهها اليه الرئيس السابق مبارك الا ان رغبته فى معرفة كيف كان مبارك متحكما فى البلد طيلة 30 عاما واكثر منفردا بالحكم دون منافس له دفعته هذه الرغبة لكى يكظم غضبه ولا ينهى الاجتماع حتى يسمع باذنية الاجابة من مبارك شخصيا.
 

ازاح الرئيس مرسى علامات الغضب من على وجهه وسأل مبارك :

عاوز اسألك سؤال فخامة الرئيس بس ياريت تجوبنى عليه بصراحة

مرسى : ازاى كنت متحكم فى البلد لاكتر من تلاتين عام ..مكناش بنشوف فيها المليونيات والمظاهرات والفوضى والعصيان والتمرد والتسيب اللى مبطلتش من يوم ما انا مسكت الحكم لحد دلوقت ؟ 

خليك زى ما انا كنت .. لاتنش ولا تهش .. عيش حياتك واتمتع بمنصبك على قدر المستطاع ..سيب اللى حواليك يشتغلوا ويغلطوا وبعدها ادخل وعاقب المخطىء منهم وقوم بتصحح الاخطاء لكسب رضا الشعب ..وهو تبقى فرصه انك تبان قدامهم  كرجل حكيم سياسى محنك ..اوعى تخلى شعبك يتوحد عليك ..خليهم دائما منقسمين على انفسهم لانهم لو اتحدوا عليك لن تبقى فى كرسيك لمده طويلة ..اشغل المسلم بالمسيحي والمسيحي بالمسلم ..خلى السنى ياكل الشيعى ..فى اختصار اتبع سياسة فرق تسد بين المصريين لانه مينفعش معاهم اى اسلوب تانى .

قاطعه مرسى: طيب ودول الغرب والامريكان اللى كل شويه يوجعوا دماغى بحقوق الانسان والاقباط والاقليات والاصلاحات ..مش عارف اعمل معاهم ايه ..زهقت من كتر طلباتهم ..قولى بالله عليك اسكتهم ازاى ؟ 
 

مبارك : بسيطة ..حلها سهل خالص ..زى ما كنت بخوف الامريكان والغرب بيكم وكنت بقول لهم لو انا تركت الحكم ها يجى الاخوان المتطرفين المتعصبين اللى بيكرهوا اسرائيل وها يعملوا لكم ولمصالحكم مشاكل لا اول ولا اخر لها ..اعمل زى والعب بورقة السلفيين والجهاديين وشويه العيال البلطجية بتوع الداخلية ها تلاقى الامريكان والغرب سكتوا على طول وها يسيبوك فى حالك على الاقل عشرين او تلاتين سنه .

بدا الارتياح على ملامح وجه الرئيس مرسى وقام بشكر الرئيس السابق حسنى مبارك على نصائحه الغالية وفى نفس الوقت وعده باطلاق سراحه هو واولاده فى القريب العاجل ثم عانقه بحرارة وانصرف متجها الى العربة التى كانت فى انتظاره لتعود به الى قصر الرئاسة .