بقلم: سوسن الجمل
  بشتغل فى شركة متوسطة الحجم، حوالى 60 موظف وموظفه منهم 3 مسيحيات ، من ضمن المسيحيات بنوته صغيره فى حدود ال25 من عمرها وتستعد لزفافها بعد ثلاث اسابيع بعد العيد مباشرة، بالطبع فرحها حيكون فى احدى الكنائس ودى حاجه مافيهاش مناقشه، المهم البنت عزمت الشركة كلها وهنا بدأ الجدال فى ادارتنا واحتمال فى ادارات تانيه فى الشركه، نروح الفرح ولا حرام!
- مش عارفه اعمل ايه فى موضوع الفرح ده؟
- ايه مشكلة الفرح ؟
- بصراحه ماكانش مفروض تعزمنا
- ليه، البنت فرحانه ونفسها زمايلها كلهم يكونوا معاها
- يا ستى تفرح هو حد قال لها ما تفرحش ، تفرح مع اهلها واصحابها
- وليه مش معانا احنا كمان؟ وبعدين البنت عمرها ما فوتت مناسبه لحد فى الشركة إلا لما جاملته وكانت واقفه معاه سواء فرح او عزاء او عيد ميلاد
- خلاص نرد لها مجاملاتها بهديه
- نجيب لها هديه ونروح الفرح برده
- هو انتى مش عارفه انها عازمانا فى كنيسه
- عارفه طبعا
- يعنى انا على اخر الزمن ادخل كنيسه؟
- اه تدخلى كنيسه ما تدخليش ليه؟
- لا طبعا وانا ايه اللى يودينى الحتت دى
- حتت! ايه الكلام الفارغ ده
- اه حتت، احنا مسلمين موحدين ربنا ما بنعبدش بنى ادمين ولا بنشتغل فى السحر
- بس بس بس، انتم اكيد اتجننتوا
- معلش يا ستى احنا اصلنا متخلفين
- طبعا متخلفين، وبعدين ما انتم رحتم قبل كده عزاء جوز مدام ايفون فى كنيسه برده ايه اللى حصل لكم، سحروكم؟ سخطوكم قرود؟ ولا علشان مدام ايفون مديره فى الشركه
- لا علشان ماكناش نعرف اللى بيحصل فى الكنائس
- والله انتم المناقشه معاكم خساره
دخلت علينا العروسه فسكتت عن المناقشه العقيمه دى ولكنى فوجئت بالآتى:
- معلش يا إيناس ماتزعليش مننا يا حبيبتى احنا مش حنقدر نيجى الفرح
- لا انا جايه يا إيناس
- اه هى حتيجى علشان مش متخلفه زينا، لكن انا وسلوى وميرفت ومحمود وعبد الحميد ومنى مش حنيجى
- ليه انا مش فاهمه حاجه؟
- بصى يا حبيبتى احنا على المستوى الشخصى بنحبك والله وبنعتبرك اختنا الصغيره
- انا كمان بحبكم ونفسى تكونوا معايا يوم فرحى
- ايوه بس احنا ما نقدرش نروح كنيسه
- هو دخول الكنائس حرام فى الاسلام؟
- ايوه
- هو ايه اللى ايوه، ما تبطلوا مغالطات بقى وسيبوا الاسلام فى حاله
لاحظت دموع فى عيون ايناس وهى بتقول
- يا جماعه ده فرح انتم حتقلبوا الفرح كمان لسياسه؟
- يا حبيبتى مش مسألة فرح ولا سياسة بس احنا ماينفعش ندخل كنيسه واحنا نبصلى وبنتوضى، بصى ما تزعليش مننا وربنا يسعدك
- وايه علاقة الكنيسه بالصلاه والوضوء؟
- بصراحه مرواحنا حتت زى دى يبوظ علينا صلاتنا وينقض وضوءنا
الدموع تحولت فى عينى إيناس إلى بكاء حقيقى وخرجت من الاوضه، بكاء وجع قلبى وقهرنى، حسيت بقهر على العروسه اللى بينكدوا عليها متعمدين فى اجمل ايام حياتها، ما فهمتش ايه اللى حصل فى الناس وايه التوحش ده، خرجت وراها حاولت اهدى البنت على اد ما اقدر
- ما تزعليش، انتى مش صغيره وفاهمه ان المجتمع بيتغير وبيتغير للأسوأ وماتاخديش الموضوع شخصى
- ياريته كان شخصى كان بقى اهون بكتير، لكن دول بيكرهونا
- يا بنتى مافيش حاجه اسمها دول واحنا، صدقينى دى مرحله وحتعدى وحتشوفى كمية المسلمين الحقيقيين اللى حيحضروا فرحك فى الكنيسه حتبقى اد ايه
حاولت ترسم على وجهها ابتسامه مصطنعه، ما قدرتش انا ارسمها، دموعها كانت بتحرقنى وقهرتها كانت بتقتلنى، ايه الغل والكره اللى جواكم ده، اخدتم ايه من قهر البنت، اى جنه اللى فتحت لكم ابوابها بعد ما كسرتوا قلب عروسه فى عز فرحتها، الحمد لله لا مفاتيح الجنه فى ايدكم ولا طريق السعاده من عندكم.