قابلته في مقهي بوسط القاهرة وبدا لي أنني عرفته من قبل، هو في أوائل الثلاثينيات كما يبدو من شكله، حليق الذقن ذو شارب حاد رفيع وشعر مجعد بإهمال وملابس غير متناسقة رغم يبدو أنها ليست بالرخيصة، وأخذ ينظر لي بتمعن كمن يحاول أن يعرف أين تقابلنا من قبل، وبدأ هو الحوار الذي دار بيننا:

- أهلا حضرتك بتشبه على؟

- آه

 

- وأنا كمان بأشبه على حضرتك!

- أنا سامي البحيري، وحضرتك؟

- أنا سعيد أبو المعاطي!

(إبتسمت)

- حضرتك بتبتسم ليه؟

- أصل أنا  لي رواية يتيمة إسمها "سعيد أبو المعاطي المواطن الديموقراطي"

- ما أنا "سعيد أبو المعاطي المواطن الديموقراطي"

(رفعت حاجبي غير مصدق)

 

- وأزاي خرجت برة الرواية؟

- ما أنا عملت ثورة وقمت بقيادة كل شخصيات الرواية للثورة على روايتك وقررنا الخروج من صفحات كتاب الرواية ألي الحياة الحقيقية الرحبة، ياه ده أحنا كنا مزنوقين جدا جوة روايتك المتواضعة

- على العموم كثير من القلة إللي قرأوا الرواية بعتبروها رواية ركيكة وقلة بتعتبرها رواية رقيقة

- وأنت رأي سيادتك إيه؟

- أنا أعتقد أنها رواية ما بين الركيكة والرقيقة، عشان كده أنا أقول عليها أنها رواية ركيقة! أو رقيكة!!

(يضحك سعيد وأضحك معه وأبادره بالسؤال:

- إنما إنت فين دلوقتي وفين باقي شخصيات الرواية؟

- إختى نور العيون جالها عقد عمل في دبي حتمثل في مسلسل تليفزيوني ومبسوطة هناك، وأمي تعيش إنت.. ماتت في حادثة قطار، وباقي أخواتي ما أعرفش فين أراضيهم

 

- وإيه أخبار سلوى أصغر أخواتك

- سلوى أتجوزت واحد سلفي من حزب النور أكبر من جدها

- ياخسارة، دي كانت آخر أمل، دي ما كملتش 14 سنة، إزاي تعملوا فيها كده؟ 

- الراجل دفع فيها 10 فدادين وعايش معاها في أسيوط دلوقتي مع ثلاث زوجات!!

- وأنت لسه بتشتغل في قصر الثقافة في رشيد؟

- لأ أنا سبت قصر الثقافة بعد ثورة 25 يناير، لأن الثورة إللي أنا عملتها على روايتك وقمت بتحرير كل الشخصيات كانت متأثرة جدا بثورة 25 يناير وتم تحرير شخصيات روايتك في نفس الوقت إللي تم تحرير شعب مصر

- طيب وأنت بتشتغل فين دلوقت؟

- أنا بأشتغل ناشط سياسي

- يعني إيه ناشط سياسي، دي وظيفة على درجة ولا إيه بالضبط؟

- لأ مش وظيفة ولا حاجة، أنا راجل حر أعمل إللي أنا عاوزه

- أيوه لكن عايش إزاي وبتصرف منين

- أنا عايش في غرفة وحمام في حي السلام، وبأكسب من الظهور في التليفزيون بيدفعوا لي كويس كل مرة أطلع في برامج التوك شو وبأتكلم بصفتي ناشط سياسي

 

- بس الفلوس دي كفاية؟

- لأ مش كفاية، لكن أنا بآخد إيجار العشر فدادين إللي خدناهم في جوازة سلوى

- خسارة يا سعيد عايش عالة على أختك إللي جوزتها طفلة لواحد أكبر من جدها، وسبت شغلك وعايش صياعة ومصدق إنك ناشط سياسي، لو كنت أعرف أنك حتثور على شخصيتك بالشكل ده وتتغير كده كنت قتلتك في آخر الرواية!!

- ما تظلمنيش يا أستاذ سامي قبل ما تسمع أنا بأعمل إيه بس كناشط سياسي، وبعدين مش معنى إنك وضعتني في الرواية إني إشترتيني أنا ثرت عليك وعلى روايتك التعبانة وقلت أشوف نفسي بقى

- قل لي يا سي سعيد، إطربني قل لي بتعمل إيه بالضبط، هل إنضميت لأي حزب

- أنا أصبحت عضو في إئتلاف الثورة

- هو فيه حاجة إسمها إئتلاف الثورة؟

 

- أيوه طبعا، ما هي مشكلتك إنك مش عايش في البلد، ومش داريان باللي بيحصل وعمال تكتب من بلاد برة أي كلام

- طيب وإئتلاف الثورة ده بيعمل إيه ومين رئيسه

- إحنا ما لناش رئيس، كلنا رؤساء وكلنا أعضاء

- ما شاء الله

- وإيه نشاطكم؟

- نشاطنا الأساسي إننا نشطاء سياسيين، وبعدين فيه جزء معتصم في ميدان التحرير وفيه جزء معتصم في الإتحادية أمام قصر الرئاسة

- وعاوزين إيه بالضبط؟

- شعارنا إن الثورة مستمرة

 

- مستمرة إزاي يعني؟

- مستمرة لحين إسقاط حكم الأخوان والرئيس مرسي

- طيب مش الرئيس مرسي كسب إنتخابات حرة وبفارق بسيط جدا، يعني هو الرئيس الشرعي إللي الناس كلها ضروري تمشي وراه 

- تمشي وراه إيه؟؟ ده رئيس فاشل وضعيف وبيرجع في كلامه كل شوية

- طيب إنت إنتخبت مين في الرئاسة

 

- أنا إنتخبت مرسي للأسف بعد ما عصرت على نفسي لمونة كبيرة

- آه هو أنت من بتوع اللمون؟؟ ولو مرسي رفض يمشي لأنه الرئيس المنتخب ناوي تعمل إيه

- يبقى الثورة مستمرة لغاية ما يمشي، ويا أحنا يا هوه، ربنا ياخده، ومش بعيد الجيش يشيله

- الجيش برضه، مش إنتوا إللي كنتوا قارفين الناس كلها بهتاف :"يسقط .. يسقط حكم العسكر"؟؟

- أيوه غيرنا مواقفنا دلوقتي ما فيش قدامنا إلا الجيش

- وأنتوا متصورين إن الجيش أهبل عشان يسمع كلامكم بعد ما لعنتم سنسفيل جدوده وطالبتم بإعدام رئيس الجيش

- أحنا واثقين في الجيش

 

- أنتوا حقيقي لو ليكم وجود في الشارع كنتوا دخلتوا الإنتخابات بدل ما تقاطعوها، لكن إنتم وجودكم في الشارع محدود جدا

- محدود إيه مش شايف المظاهرات في بورسعيد والمنصورة والسويس والمحلة

- دي كلها مظاهرات تعبانة مدمرة ما تزيدش عن مئات في كل مظاهرة لكن صوتهم عالي

- طيب وأنت رأيك أيه

 

- أنا رأيي هو تشكيل وزارة محايدة فنية مؤقتة لإدارة الإنتخابات ولتكن برئاسة الجنزوري، وبعد الإنتخابات الحزب أو الإئتلاف إللي يكسب أكبر عدد من الأصوات يشكل الحكومة والبلد يمشي حالها، وإللي مش عاجبه الأخوان ما ينتخبهمش وإللي مش عاجبه مرسي ما ينتخبوش الفترة الجاية 

- خسارة يا أستاذ سامي أنا ما كنتش فاكرك من الفلول، وأنا سعيد أني ثرت على روايتك وخرجت منها، أنا ما يشرفنيش أني أكون شخصية في روايتك

- القلوب عند بعضها يا سي سعيد والمركب إللي تودي ، واالله يخرب بيوتكم حتودوا البلد في داهية!!

samybehiri@aol.com

وتابعونا على تويتر

@samybehiri