د. ماريان فايز
ترند التمانينات اللي انتشر في ثانية…وقبله ترند الفراعنة، وقبله...وكل شوية موجة جديدة وكلنا بنجري وراها.
بس عمرك وقفتي وسألتي نفسك:
إيه اللي بيخلينا نختار ترند ونمشي وراه؟
الترند ظاهرة نفسية واجتماعية بتكشف لينا عن احتياجات عند الناس.
السؤال ليه الناس بتجري ورا الترند؟
في رأيي فيه كذا حاجة بتحصل في نفس الوقت لما يطلع ترند:
1. الاحساس الدفين بالحاجة للانتماء أنا منكم.
الترند بيعمل حاجة اسمها social belonging.
لما كل الناس تستخدم نفس الصوت، تلبس نفس الستايل، تعمل نفس الـchallenge أو تتكلم بنفس اللغة، بيبقى عندي إحساس مشبع جوايا :أنا جزء من حاجة أكبر مني.
وده احتياج إنساني أساسي. أحيانًا الشخص مش بيكون متعلق بالترند نفسه، لكنه متعلق بإحساس الانتماء اللي الترند بيديهوله.
2. الحاجة للهوية أنا مين وسط كل ده؟
الترند بيديني فرصة أجرب هوية جديدة لفترة قصيرة.
مرة أنا ثمانيناتي مرة فرعوني مرة vintage مرة رياضي كروي مرة minimalist…
كأني بقول خليني أشوف نفسي من خلال عدسة مختلفة مش يمكن الاقيني حاجة ثانية ...وده سببه احتمال اني فاقد هويتي اصلا او اخيرا لقيت هوية انتمي ليها.
وده مهم جدًا خصوصًا في زمن السوشيال ميديا، لأن الهوية أصبحت قابلة للعرض والتعديل والمشاركة.
3. الحنين Nostalgia وده واضح جدًا في ترند التمانينات. لكن الحنين مش بالضرورة حنين للثمانينات نفسها خصوصًا إن ناس كتير بتشارك في الترند وهي أصلًا ماعاشتش الفترة دي ولا فاهمة الصور اللي بتحطها.
أحيانًا إحنا بنحن لفكرة الماضي: لمجرد انه كان زمن أبسط وفيه علاقات أكثر دفئ والموسيقى بتاعته محفورة في الذاكرة وصور العيلة واللمة اللي بقت تختفي والطفولة البريئة أو الأمان ويمكن إحساس إن الدنيا كانت أبطأ. يعني الترند ممكن يلمس احتياج للحالة الشعورية المرتبطة بالماضي، مش للماضي نفسه.
4.او يمكن فراغ وحاجة لاحساس خفيف بيسببه اللعبPlay كاننا بنعمل play therapy كدة بنعالج جراحنا بالغاب تجمعنا
وبالمناسبة اللعب مهم وبننسى اهميته في العصر السريع اللي عايشين فيه اللي بنلغيه اصلا عند الاطفال مابالكم بقى ان الإنسان البالغ محتاج يلعب ويجرب ويعمل حاجات مالهاش هدف إنتاجي او achievement
لما ألبس لبس من عصر مختلف أو أعمل صور بشكل معين، أنا للحظة بلعب اهه اي لعب وابتسامة وضحكة وده ممكن يكون مريح نفسيًا جدًا.
5. العدوى الاجتماعية Social Contagion
لما أشوف 100 شخص بيعملوا حاجة مخي يبدأ يقول: واضح إن فيه حاجة هنا فايتاني وده peer effect.
حتى لو أنا ماكنتش مهتم أصلًا بالموضوع.
وده مرتبط بفكرة social proof: لو ناس كتير بتعمل الشيء بيزيد احتمال إني ارغب في اني أجربه.
والسوشيال ميديا بتضخم ده جدًا لأننا بنشوف دليل اجتماعي متكرر خلال دقائق.
6. الخوف من اني يفوتني حاجة FOMO ودي مختلفة عن الانتماء. مش: أنا عايزة أكون جزء منكم.
لكن: هو أنا الوحيد اللي مش عارف الترند ده؟ انا الوحيد اللي مش هنضم وهنا الترند ممكن يتحول من اختيار إلى ضغط اجتماعي ناعم خصوصًا لما يبدأ الشخص يشعر إن عدم مشاركته معناه إنه: مش مواكب. مش فاهم.
خارج الدائرة او مش interesting.
7. الترند بيخلق لغة مشتركة لما كلنا نعرف نفس الأغنية أو نفس الصورة بيبقى عندنا رمز مشترك. شخصين مايعرفوش بعض ممكن يضحكوا على نفس ال reference.
فالترند بيعمل نوع من: Shared cultural language
يعني: إحنا الاتنين فاهمين الحاجة دي. وده بيخلق اتصال سريع جدًا بين البشر.
8. أحيانًا الترند بيكون وسيلة للتعبير عن شيء صعب نقوله مباشرة الشخص ممكن مايعرفش يقول:
أنا محتاجة أرجع أحس بالأمان. لكن يشارك في ترند nostalgic. وممكن مايعرفش يقول: أنا محتاجة أنتمي.
لكن يدخل في ترند جماعي. وممكن مايعرفش يقول:
أنا تعبت من صورتي الحالية وعايزة أجرب نسخة مختلفة مني. لكن يعمل transformation trend.
السلوك هنا أحيانًا بيعبّر عن احتياج الشخص نفسه احيانا بيكون مش واعي بيه. وده يخلينا نسأل سؤال أهم:
هل أنا اخترت الترند؟ ولا الترند لمس شيئ في؟
لأن مش كل ترند بينتشر بنفس الطريقة.
الترند اللي بيعيش وينتشر بسرعة غالبًا بيكون فيه شيء قابل للالتقاط النفسي والجماعي: عامل ذاكرة + عنصر انتماء + احساس بالهوية +فقرة براح و لعب + فضول + ورغبة في المشاركة.
علشان كدة الترندات بتظهر وتختفي وبتتغير كل يوم
علشان المحتوى بيتغير، لكن الاحتياج الإنساني اللي تحته اللي بيحركه ويخليه ترند بيفضل ثابت.
والسؤال هنا ايه الحاجة اللي الترند ده لمسها جوايا؟
لأن أحيانًا اللي بنسميه Trend هو في الحقيقة احتياج إنساني لابس شكل جديد.
