بقلم القس سامح فوزي
ياكابتن حسام إحنا كلنا في ضهرك بس مش كده خالص ياراجل، وبلاش ندخل الدين في الرياضة دي في الأول والآخر اسمها لعبة كورة قدم أنت ياكابتن كنت متقدم 2 صفر لغاية الدقيقه 70 ، كان عليك في هذه اللحظه أن تنظر إلي الملعب علشان تشوف إيه إللي بيحصل فيه وإللي يخليك تتصرف بعقل بحيث تحمي فريقك من الانهيار ، إنما إنت مبصتش للملعب ، إنت بصيت لفوق علشان تشكر ربنا علي النتيجه وعلشان تطلب منه إنه يعديلك الأمور علي خير وتطلع فايز .بصيت لفوق يعني ما شوفتش إيه إللي بيحصل في أرض الملعب علشان تعرف تتصرف وتحمي فريقك من الانهيار. ربنا ما بيلعبش معاك الكوره ، ولا هو إللي بيدخل الإجوان ، ولا هو إللي بيمنع دخول الإجوان ، الثقافه دي ثقافة إتكالية تواكلية بعيريه معناها إلغاء العقل ورمي الحمول كلها علي الله زي ما بيقولوا ، الله مع من يستخدم عقله ويجتهد ، يعني الله ينتظر منك نتيجة جهدك لكنه لا يصنع لك النتيجه ، بعني تشتغل وتبذل أقصي ما عندك من جهد وتستخدم عقلك وبعد ما تخلص شغل بغض النظر عن نتيجة شغلك تبص لفوق وتقول شكرا يا إلهي ، إنما ترمي عقلك في الزباله وبعدين تبص لفوق وتطلب من ربنا إنه يعملك نتيجه حلوه دي ثقافه بليده راكده . كان ممكن تحافظ علي نتيجة 2 صفر لو بصيت في الملعب وشوفت إللي بيحصل واستخدمت عقلك وعملت شوية تعديلات بسيطه تمكنك من استهلاك العشرين دقيقه المتبقيه وانت متقدم 2 صفر .
لكن إللي حصل هو إنك قعدت بره تقرا الفاتحه وتدعي ربنا إنه يحافظلك علي النتيجه ، وواحد من مساعديك رفع المصحف في اتجاه الملعب علشان يكلبش أقدام لعيبة الارجنتين.
الثقافه البليده دي هي إللي صنعت الفرق بيننا وبين بقية العالم إللي قطع أشواط واسعه في التقدم والتحديث . الاستغناء عن العقل والاتكال علي الدعاء وتوهم إن الدين له علاقه بالكوره مش هايقدمك خطوه واحده ، الدين يحقق لك نتيجه كويسه في علاقتك مع الله ، إنما الدين ملوش علاقه بالكوره ، وملوش علاقه بنتيجة المباريات. طبعا الكلام ده هايزعل ناس كتير ، إللي يزعل يزعل وكفاية بقا نفوق شوية ، كفايه انحطاط ، ياتفوقوا ياتروحوا في أي حتة تانية.
عموما الفريق المصري حقق إنجاز هائل وطلع من كاس العالم بطريقه مشرفه يستحق عليها التقدير ، وأثبت الفريق المصري البطل أنه لا ينقصنا شيء غير تغيير بسيط وهو منح العقل فرصة إنه يشتغل . أنا معاك إننا اتظلمنا، ومعاك أننا في منظومة فاشلة، ومعاك إن الحكم ضميره مات ولكن: ياكابتن أنت باقي على الماتش عشرة دقائق بالظبط ويخلص إيه لزمة تدخل زيزوا دلوقتي وتجامل الأهلي؟! مش وقت مجاملات خالص دلوقتي!! ليه حسام عبد المجيد إللي مكسبك آخر ماتش تسيبه برأ احتياطي!!!!؟؟ ليه كده بكل بساطة كنت كملت وقفلت دفاعك كويس وراء وكنا عدينا، ياسيدي الفاضل سيب السياسية والدين عشان تنجح أنت مدرب حلو وحامي بس خد بالك خليك حامي كرويا وسيب الحمية الدينية لناسها. وفي الاخر ربنا كبير يرد للمظلوم حقه وهارد لك.
