كتب - عزت بولس
الزمالك ده مش مجرد فريق كورة، ده "تجارب أداء" لأعصاب الجماهير؛ الفريق الوحيد اللي ممكن يكسب بطل أوروبا وهو مش فايق، وبعدها بيومين يخسر من فريق لسه متجمع في الميكروباص وهو رايح الاستاد. الأداء عامل زي "مؤشر البورصة" في يوم انهيار عالمي، ملوش كتالوج ولا تقدر تتوقعه، يوم يخليك تحس إنك مشجع لأقوى فريق في المجرة، ويوم تاني يخليك تسأل نفسك: "هو أنا ليه عملت في نفسي كده؟".
أما بقى لما تيجي سيرة "القمة" قدام الأهلي، فالموضوع بيتحول لفيلم رعب كوميدي؛ الأهلي داخل المباراة بترسانة بطولات وتاريخ بيخوف أي حد، والزمالك داخل ومعاه "الضغط الجماهيري" اللي ممكن يهد جبال. المباراة بتبقى عبارة عن 90 دقيقة من شد الأعصاب، الأهلي بيعرف يخلص ويجيب نتائج كالعادة، والزمالك بيلعب "فن وهندسة" لحد ما فجأة تحصل لحظة "اللاوعي" اللي بتخلي الجماهير تروح تنام وهي بتغني "سنظل أوفياء" وهي بتعيط.
