جيه قلوب بتحبك أهي، ومستنية يا عدرا ظهور،
فوق القبة رايحة وجاية، زي حمام أبيض بيدور،
وإحنا نرنم للصبحية، تهلّي علينا نشوف النور،
أو وسطينا دي ماشية أهي، ولما تجينا نشم بخور
جيه قلوب محتاجة السندة، وقت الشدة يا أم النور،
قاسية حياتنا تملي معاندة، بس شفاعتك تهدم سور،
يسمع ابنك يمحي الشدة، لما نجيلك نلاقي عبور،
ننسى آلامنا ومطمنّا، حبك لينا في كل عصور.
جيه قلوب ودي حابة صفاتك، كل حياتك نور من نور،
لما اتجلى ظهر في حياتك، واختار مريم كان مسرور،
قلبك حلو كمان متواضعة، لا ونقية، مفيكي غرور،
منك اتجسد، كنتِ الخاضعة لكل مشيئة رب غيور.
جيه قلوب بتحب ديارك، ويا كنايسك جاية نزور،
وتولّع لأيقونتك شمعة، تطلب طلبة وجايبة نزور،
دير العدرا منور بيكي، وادي زوّارك شايفة النور،
إحنا نحبك علشان ابنك، وصّى عليكي يا بكر بتول.
✍️ ممدوح الديري✍️
