فن الامتنان .. د.مجدى إسحق
لما الدنيا تمشي بالعكس ؛ و تطلع من ضيقة تخش علي اللي اكبر منها : من أزمات لخلافات لتعب لمرض ..

و وسط ده كله تطلب و تصلي و تتوسل و لا توجد أي استجابة ..

و احيانا كتير تصلي اكتر ، مش عاوز غير ان الألم بس يخف شوية ، تلاقيه يتزايد و يتضاعف..

هنا جرب تبطل كل حاجة ..

بطل تشتكى ، و بطل تطلب من الله حل ، و بطل تحاول تفهم انت ليه بيجرى لك ده كله .. 

و أعمل حاجة واحدة بس : امتن !!

و الامتنان هو الشكر الوفير الكتير ..

سمعتني كويس ؟؟ اشكر كتير و انت موجوع ، و انت مش فاهم ، و انت ساكت ..

ح تسمع صوت هادى بيقول لك كتير عن اللي لازم تعمله : تصلح تصرفاتك ، ترد حق سلبته ، تنصف مظلوم قهرته ، توقف انانيتك ، ترضي و تفرح باللي عندك حتي لو قليل .. 

الشكوي تزود تعبك قدام عقلك و قدام الناس ..

و الامتنان يخللي قلبك يهدى ، و عقلك يرتاح و حياتك تفرح ..