هات ولد

وصل له إنه أعقل وأحكم من أخته وأمه وبنته وزميلته فى المدرسة ومن زوجته المستقبلية ومن أى ست حتى لو كانت وزيرة..

 

وصل له كمان ان المرأة موضوع جنسي.. كل ما فيها مثير للشهوة.. ومحرك للجنس.. وانها مسئولة عن أى حد يثار جنسياً حواليها أو يتحرش بيها، أو يغتصبها، أو يتعصب عليها، أو يقتلها..

 

علمه بقى إن مراته لو ماسمعتش كلامه وقالتله حاضر.. أو لو ناقشته وقالتله (لأ) فهى ناشز.. ومن حقه يعاقبها ويؤدبها وصولا إلى الضرب.. لكسر كبرياءها..

 

وقوله إنه لو طلبها للجماع ورفضت لأى سبب مايعجبهوش، فهى هاتبات ملعونة طول الليل من رب العالمين..

 

وخلى كمان حد يفهمه كويس إن أهم وظائفها بالنسبة له إنها وعاء لتفريغ شهوته.. وإنها زى العربية اللى ماينفعش يسيب بابها مفتوح.. وإنها لو رفضته فهو يقدر يكسرها ويجبرها على ما يريد.. وإنها طالما تزوجت، فهى تنازلت عن حقها فى الحرية..

 

وفيه حاجات تانية كتير غير دى.. وللأسف كلها بتوصل كذباً وزوراً باسم الدين..

 

- ازاى هايحترم أخته وأمه ومراته وزميلته فى الشغل وأى واحدة ماشية فى الشارع؟

 

- إيه نوع النظرة اللى هاينظرها ليها؟

 

-  ليه مايقومش بالتحرش والاعتداء على واحدة شايف انها كان لازم تاخد بالها من لبسها وخصلات شعرها ودرجة وقوة عطرها لحسابه، وإلا تبقى بتفتنه وتغويه وتدعوه للزنا..

 

- ليه مايبقاش شايف إنه من حقه يغتصب زوجته ويحصل منها على ما يريد، سواء بالعنف والإجبار، أو بالابتزاز النفسي، أو بالتخويف والترهيب والإِشعار بالذنب.. إذا كان وصله إن ربنا نفسه هايبقى غضبان عليها، والملايكة هايتفرغوا طول الليل للعنها.. 

 

- ليه مايبقاش عنده كل هذه الكم من الاستحقاق، والشعور المتضخم بالذات، والصورة الذاتية المشوهة المريضة؟ 

ليه؟ بجد ليه؟