"أبو زعبل"

 يا ترى الاسم ده جه منين؟ و مين زعبل ده و إيه حكايته؟ 

 

أبو زعبل هي قرية قديمة تقع في مركز الخانكة بمحافظة القليوبية في مصر، وكانت تعرف سابقًا باسم "القصير" أو "بني صيرة" وفضلت تحمل اسم "القصير" لأخر أيام المماليك...

 

وأصل الحكاية انه كان فيها أراضي زراعية مملوكة لشخص اسمه "ابن قرجا التركماني" فى عهد السلطان "الأشرف شعبان"

 

"ابن قرجا" ارسل شخص للإشراف على زراعتها وجمع محاصيلها اسمه «زعبيل» ومع الوقت قام "زعبيل" ببناء بعض المنازل لأسرته والمزارعين, و اتعرفت المنطقة باسم "منازل أبو زعبل"

 

"أبو زعبل" اتبنى فيها في عهد "محمد علي" أول مدرسة للطب وكان عدد الطلبة 300 و تم اختيارهم من طلاب الأزهر

 

ده غير مستشفى كبير وعدد من المدارس في الصيدلة والهندسة الموسيقى وغيرها.

 

و في "أبو زعبل" تم إنشاء أول إذاعة وأكبر مصنع للإنتاج الحربي وأكبر مصنع للأسمدة الكيماوية.. ده غير كتير من الآثار الإسلامية اللي في غاية الروعة وخصوصاً الصهريج اللي على أعمدة رخامية من عهد صلاح الدين الأيوبي.

 

ده غير تاريخها الوطني الكبير في مقاومة الاحتلال الفرنسي وتعرضها للقصف في العدوان الثلاثي سنة 56 و في حرب الاستنزاف سنة 1970

 

"أبو زعبل" النهاردة بقت مدينة صناعية اتبنى على أرضها عشرات المصانع الكبيرة وارتفعت فى سمائها المداخن إللي بيعاني منها أهلها

 

"أبو زعبل" تاريخ عريق مش مجرد سجن بيُشار له في الأفلام و المسلسلات!

 

ومن هذه الافلام "سجين أبو زعبل" هو فيلم مصري عرض عام 1957، بطولة محسن سرحان ومحمود المليجي وزهرة العلا ومنيرة سنبل، ومن إخراج نيازي مصطفى.

والى اللقاء فى مقال جديد ...