بقلم: شريف منصور
يا سلام علي التفاني و النزاهة يا سلام علي الحرفية و سرعة التنفيذ يا سلام علي الامانه و الهمة.
هذا ما خطر علي بالي بعد قراءة خبرين في منتهي العظمة  في جريدة الأهرام الاخونجية .

العنوان الاول :
ضبط مصنع لتصنيع الأقنعة السوداء الخاصة بجماعة "البلاك بلوك" بالغربية
تمكنت مديرية أمن الغربية ، بالتنسيق مع مباحث المحلة من ضبط مصنع لتصنيع الأقنعة السوداء الخاصة بجماعة "البلاك بلوك" وضبط المحرض الرئيسي .
وكانت معلومات قد تلقتها مباحث الغربية بقيام شمس الدين عبد المعطي (62 عاما) صاحب مكتب استيراد وتصدير ومسجل خطر مخدرات وسبق اعتقاله في أحداث 6 أبريل بالمحلة بتصنيع وترويج أقنعة سوداء خاصة بجماعة "البلاك بلوك " لاستخدامها غدا الجمعة فيما يسمى ب" جمعة الخلاص ".
على الفور ، تم مداهمة المصنع وضبط الأقنعة واعترف صاحب المصنع بالواقعة ، حيث تم ضبط المتهم ، وحرر محضر ، وأخطرت النيابة العامة للتحقيق.

و الخبر اللي بعده الذ الذ الذ
العنوان
اعتقالات في صفوف البلاك بلوك أمام مكتب النائب العام
كتب ـ هاني فتحي‏:‏
 ألقت قوات الأمن أمام مكتب النائب العام أمس القبض علي خمسة شباب كانوا موجودين بين المتظاهرين بشارع‏26‏ يوليو‏,‏ وتم التحفظ عليهم‏,‏ وكان المقبوض عليهم يرتدون ملابس سوداء‏,‏ وبعض أغطية الرأس.
بعض افراد البلاك بلوك اثناء المظاهرة
واعتقد رجال الأمن أن المقبوض عليهم يتبعون حركة البلاك بلوك بسبب ملابسهم, فتم ضبطهم للتحقيق معهم حتي يتبين إلي أي جهة ينتمون, وكانت مجموعة من الشباب قد تجمعت مساء أمس أمام مكتب النائب العام بشارع26 يوليو للاحتجاج علي قراراته بضبط مجموعة البلاك بلوك, وقالوا: إن هذه القرارات أعطت الحق للشرطة في القبض علي الشباب علي الرغم من عدم انتمائهم لهذه المجموعة, وذلك لمجرد ارتدائهم الملابس السوداء وأخذ المتظاهرون يرددون الهتافات ضد رئيس الجمهورية, والمستشار طلعت إبراهيم النائب العام .وخلال المظاهرة ـ التي استمرت ما يقرب من ساعتين ـ لم يظهر أي شباب يرتدون زي مجموعة البلاك بلوك, في إشارة إلي مراوغتهم لرجال الأمن.,

بسم الله ما شاء الله ايه الهمة دي يا رجالة الآمن عرفتوا تقبضوا  علي البلاك بلوك . و السبب إيه ؟ علشان لابسين ملابس سوداء و اقنعه سوداء. مجرمين و مخربين و هم السبب في ان طائر النهضة فقد أجنحته و بيضه انفقع.

انتم واخدين بالكم من الخبر بتاع المصنع اللي بيصنع الأقنعة السوداء . صاحب المصنع مسجل خطر وهو صاحب شركة تصدير و استيراد ؟ و النبي بجد انا مش مصدق ان الداخلية بقت في يوم وليلة بالكفاءة دي ، يعني صاحب شركة تصدير و استيراد عنده سجل مصدرين و مستوردين وسوابق و عنده شركة و ملحق بها مصنع و كل ده و الداخلية أتحركت بس لأنها تلقت معلومات عن طريق مباحث الغربية . حاجة من أثنين يا الاهرام كذاب يا الداخلية ضباطها بقوا من أصحاب الاحتياجات الخاصة.

طيب يا سيدي انت وهو انتم تلقيتم معلومات عن مفجرين كنيسة القديسين ؟ الظاهر لا ولا يمكن المعلومات  كانت بلغة عربية فصحي فحضرة الضابط مفهمش المعلومات . يعني شوية ثوار يلبسوا اقنعة و يهتفوا ضد مرسي أحقر رئيس مر علي مصر تقبضوا عليهم بدون أي اتهامات ؟ وهو تصنيع اقنعة سوداء شيء مخالف للقانون ؟ تصنيع الاقنعة السوداء يمكن كان لحماس و مليشيات الاخوان و حتي تصنيع القناع نفسه جريمة ليه ؟ انا لو عاوز البس قناع و امشي في الشارع علشان النسوان متشفش وشي و ما تشتهينيش مش ده برضه زي النقاب ؟ ايه الخيبة دي يا وزير أهطل ايه المصيبة دي يا نيابة زنوبه يا مدعي عام باطل . بلاش مش فيه إعلام سوداء في الميادين يا عم الوزير ده شرعي و اللبس الاسود للرجالة كفر ...

بصراحة العالم بيتفرج علي مصر و اللي بتعمله حكومة الخوان المسممين و بيستعجبوا علي الهطل اللي حاصل في مصر. يعني فيه رئيس محترم يترك البلد وهي مولعة و 3 مدن فيها حظر تجول و ناس بتموت يمين وشمال و يروح يتمرقع في اوروبا .

طيب ياوزير الداخلية هو الطرحة اللي بيلبسها السلفيين دي بقت زي رسمي ؟ طيب ياعم مش دول برضة اللي منعوا قضاة الدستورية العليا من دخول مكاتبهم ؟ بذمتك ده ان كان عند اهلك ذمة ، البلاك بلوك منعوا البلطجية من التعدي علي الثوار فتقبض عليهم و اللي اعتدوا علي مصر و شردوا اهلها و جوعهم سايبهم يبرطعوا فيها .

اللي زور الانتخابات و طبع بطاقات الانتخاب في المطابع الاميرية و تلقي أموال من امير قطر بقي رئيس جمهورية و مرر الدستور بكل التزوير ده وسيادتك و النائب العام بتتكرعوا من شرب شربة الكرشة . و عامل فيها راجل وبتقبض علي الشباب علشان لبسين اسود ؟ لا بسين اسود حداد علي مصر اللي بلاها ربنا برئيس كذاب و جماعة من الخونه بيقتلوا الشعب في الشوارع .

 اللي منع الاعلام من مزوالة عملة وحاصر مدينة الإنتاج الاعلامي و حرق مقر الوفد وحاصر الاقسام بيبرطع فيها و بسببه اقالوا وزير الداخلية اللي قبلك و سيادتك شايف ان انت بتقوم بعملك .

و الله حيجي اليوم اللي حتشوف فيه أيام العن من أيام حبيب العادلي و يمهل ولا يهمل . نشوفك انت و حبيبك مرسي و معاكم الشاطر وفي  أيديكم بديع في قفص واحد و لا تنسي أن كانت دامت لغيرك مكنتش جت لك .

علي فكرة هو مش رجال الشرطة بيلبسوا اسود برضة ؟ شوف الخبر الساذج بيقول ايه " إن هذه القرارات أعطت الحق للشرطة في القبض علي الشباب علي الرغم من عدم انتمائهم لهذه المجموعة, وذلك لمجرد ارتدائهم الملابس السوداء"
بذمتكم مش هو ده الهطل بعينة .... حسبنا الله ونعم الوكيل فيكي يا مصر .