قبرك فاضي يا مريم ليه؟
يلا قولولنا دي راحت فين
جه واخدها يسوع لسماه
وادي توما من الشاهدين
شاف المنظر يا ما أحلاه
والزنار أديته يعين
قبرك فاضي يا بكر بتول
يا اللي حملتي الرب الأمين
شلتي لاهوته، حملتي النور
ليكي كرامة وعرش ثمين
مهما بنذكر، مهما نقول
ليكي شفاعة، وهو يعين
قبرك فاضي يا مريم ليه؟
والتلاميذ صاموا طالبين
إن يشوفوا جمال المنظر
بعد أصيامهم شافوا بالعين
مريم صاعدة في وسط ملايكة
واستقبلها وجالها أمين
قبرك فاضي وليكي كرامة
واللي يطوّب مريم مين؟
عرس القانا وديا علامة
يسمع ليها يا بشريين
لما نكون في ضيق وملامة
نطلب مريم تيجي تعين
قبرك فاضي يا مريم ليه؟
يا اللي صفاتك حلوة وزين
مرّة بتظهر فوق القُبّة
جايبة رسالة للخاطئين
مرّة بتظهر زي حمامة
يحل سلامها في غمضة عين
✍️ ممدوح الديري ✍️
