بقلم:  فايزالبهجورى

مصطفى شاب مصرى يعمل صبى (جارسون ) فى \" مقهى نجمة خلوصى \"بحى شبرا بالقاهره . وكان رواد المقهى ينادونه باسم \" درش \" كان درش شابا محبوبا من زبائن المقهى الذين كانوا يصفونه بأنه \" دمه خفيف \" . فقد كان يقوم بابلاغ طلباتهم لعامل البوفيه بالغناء بصوت جميل ، ولا يخلو من مداعبة الزبائن ، بما يشيع بينهم جوا من المرح . وكانو يضحكون كثيرا عندما يسمعونه يعلن عن طلباتهم بطريقته الخاصة : • واحد \" ينسون \"... لشاكر أفندى ...أجدع زبون . • واحد \" كركديه \"... لحسنى بيه ...أطول بيه . • واحد \" قهوه ساده \"... للريس برعى... اللى حلاوته زياده. • واحد \" قرفه \" .. للأسطى المجدع ... على أبو شفه. • واحد \" شيشه اسطنبوللى \"... للمعلم الكبير... الحاج متولى. • واحد \" شاى \" ... للكومندا بشاى . ثم يتوقف لحظه ويقول : \" شاى \"... \" بشاى\" . هيييه ... بصره.... ( والبصره بلغة ورق الكوتشينه هى تطابق ورقتين من أراقها معا . (ولد ) مع (ولد ).( آس) مع (آس) . (سبعه) مع ( سبعه)...وهكذا ) وعلى هذا النحو كان درش يلبى طلبات زبائن المقهى. زواج درش وانجابه توأمين ومنذ عام تزوج درش من\" شلبيه \" بنت الجيران التى كان يحبها . وكانت تلوح له دائما بضفائر شعرها من خلف زجاج شباك شقتهم المواجه لشقة والد درش ، فيرد عليها هو بمداعبة \" شنبه \". ومع بداية هذا الأسبوع أنجبت شلبيه له توأمين ، \" ولد \" و \" بنت \" وأطلق على الولد اسم \" مخيمر\" وهو اسم أبيه . وأطلق على البنت اسم \" فتكات \" وهو اسم أم زوجته. وذهب مصطفى الى السجل المدنى وقيد أسماء التوأمين فى دفاتر المواليد لاستخراج شهادة ميلاد لكل منهما . *** بعد أيام من قيدهما بالسجل المدنى تلقى مصطفى استدعاء من قسم البوليس لسؤاله عن الأسماء التى أطلقها على توأميه . وتم عمل محضر له . وتحول المحضر الى النيابة . ثم حولت النيابة المحضر الى المحكمة .

وتحول الموضوع الى قضية المتهم فيها مصطفى مخيمر عبد الرسول . *** وفى المحكمة سأل مصطفى القاضى : انتو جايبينى هنا ليه ؟ وأنا جريمتى ايه ؟ ورد عليه القاضى بقوله :أنت متهم بأنك أطلقت على ابنك وبنتك أسماء \" غير مناسبه \" ومخالفة للمادة ( 70 ) من الدستور التى تنص على أن \"لكل طفل فور الولادة الحق فى اسم مناسب \" وأنت خالفت ذلك . فلم تعط ابنك وبنتك الأسماء المناسبة !!!!! وقال مصطفى للقاضى : اسم \"مخيمر\". ده اسم والدى .

واسم \" فتكات \" ده اسم والدة زوجتى . ومحدش منهم اتعملت له قضيه وجرجروه فى المحاكم . ورد عليه القاضى : الكلام ده كان قبل صدور الدستور الحالى اللى صدر فى ديسمبر 2012 وألغى الدستور اللى قبله بتاع والدك وحماتك . واستمرت المناقشة بين مصطفى والقاضى لبضعة دقائق قرر القاضى بعدها تأجيل القصية للنطق فيها بالحكم بعد أسبوعين .

*** قضية مصطفى تتحول الى قضية رأى عام وبدأت قضية مصطفى - صبى المقهى البسيط - تتحول الى قضية رأى عام ، بدأت بحوارات حادة بين كل رواد المقهى محروس المكوجى وابنه \" فلوكس\" وابن أخيه عويس ودار حوار بين محروس المكوجى وحسين البقال . قال محروس لحسين تعليقا على ما حدث لمصطفى: يا داهية دقى . دا أخويا من أسبوعين جاله ولد سماه \" عويس \" على أسم مدير المصلحة اللى بيشتغل فيها . وأنا بحب الفنان \" فلوكس\" وأحب أشوف فى التلفزيون الحلقات اللى بيمثل فيها . والأسبوع اللى فات جانى \"ولد \" سميته \" فلوكس\" على اسمه . و رد عليه حسين البقال : يبقى رحتم فى داهية انت و أخوك . الأسماء دى \"غير مناسبة \" ومخالفه للدستور !!!! وقال محروس : ما أنا مكنتش أعرف انهم حيكتبوا دستور يقول لنا ده \"اسم مناسب: وده \"اسم مش مناسب\" . ورد عليه حسين :هما كتبوا \"الاسم المناسب\" وبس ، لكن ما قالوش ايه هو الاسم المناسب ده. وأضاف حسين: على العموم ، ومن باب الاحتياط ، الحق نفسك ياحلو . روح للراجل اللى قاعد قدام باب المحكمة بيكتب العرضحالات واساله عن \"الاسم المناسب\" ايه .. واجرى انت وأخوك على السجل المدنى وغبروا أسامى ولادكم . وأخذ محروس المكوجى يضرب كفا على كف وهو يقول : دى مصيبة ايه دى اللى جاتلنا على آخر زمن . المعلم سلطان الجزار والمعلم شحته الفاكهانى وبنته موزه وفى ركن آخر من المقهى دار حوار آخر بين المعلم سلطان الجزار والمعلم شحته الفاكهانى وقال سلطان لشحته: وانت يا أبو \" موزه \" حتعمل ايه فى المشكلة الجديده اللى جاتلك دى .

اسم بنتك \" موزه \" ده \"مش مناسب\" ومخالف للدستور. ورد عليه شحته قائلا : مين يقدر يقوللى انه مش مناسب ومخالف للدستور؟؟؟ . ما أهو حاكم قطر متجوز واحده اسمها \" موزه \" . حد يقدر يقول له ان اسم مراتك \" موزه \" ده مخالف للدستور ؟؟؟ ورد عليه المعلم سلطان : \" الشيخة موزه \" زوجة أمير قطر مش عايشة فى مصر عشان يطبقوا عليها الدستور المصرى ، يا حلو . وهنا سرح المعلم شحته الفاكهانى لحظه وقال للمعلم سلطان الجزار وبعدين ياسلطان . أحل المشكلة دى ازاى ؟؟؟ رد عليه سلطان : أولا تلحق نفسك وتروح السجل المدنى وتغير اسمها \"باسم مناسب\".

وثانيا.. أوعى تدى لأى بنت أو ولد يتولدوا جديد ليك أسماء زى تفاحه وبرقوقه وبطيخ و بقية أسماء الفواكه اللى عندك صالح الفطاطرى وعبود الفسيخانى ودار حوار ثالث بين صالح الفطاطرى وعبود الفسيخانى الملقب ب \" أبو كعبوره \" قال صالح لعبود: دا انت وقعتك سوده ياعبود . اسم ابنك \" كعبوره \" ده مش ممكن تعتبره الحكومة \" اسم مناسب\" ... وحتروح فى أبو نكله . لكن قوللى . انت اخترت لأبنك الاسم ده ازاى ؟ قال عبود : مش أنا اللى اخترته . ولا حتى أمه . اللى اختارته له هى \" الداية \" اللى سحبت رجله من \" بطن \" أمه . ( والداية هو اللقب الذى يطلق على المولدة فى الأوساط الشعبية ) و سأل صالح عبود : ازاى ؟ وحكى له عبود الحكاية . أصله احنا ما كانش بيعيش لنا عيال . كانوا بيموتوا فى السنه الأولى من عمرهم . فاقترحت الداية اننا نسمى عيالنا باسماء منفرة تبعد عنهم العين والنظرة . واختارت للواد ده اسم \" كعبوره \" .

وعشان كده عاش . وعلق صالح على هذا الكلام بقوله : بس ما كنتوش تعرفوا أنه حيجى يوم يطلع فيه دستور يقول لكم ان الاسم ده \"غير مناسب \" ومخالف للدستور. ورد عبود : هو حد بيعرف الغيب يا حاج صالح !!!. وقال صالح : ليك حق . بس المهم دلوقتى تشوف لك محامى يخرجك من الورطة دى . وكمان تاخد بالك المرة الجاية وتختار لعيالك \" اسماء مناسبة\" وسيبك من كلام \" الداية \" دى . وهنا تدخل فى الحوار معهم جابر أبو اسماعيل صبى الفطاطرى وفال : واحنا حنعرف ازاى الاسم المناسب من الاسم اللى مش مناسب ؟ ورد عليه صالح : الموضوع ده يتسأل فيه المحامى .هو اللى بيفهم فى الدستور .\"\"!!!! عوضين النجار ودفع الله النقاش ودار حوار رابع بين عوضين النجار ودفع الله النقاش. وقال عوضين لدفع الله : حتكون وقعتك سوده يادفع الله لو طبقوا عليك الدستور الجديد. حيقولولك الاسم ده \"غير مناسب \" ازاى يسموك \" دفع الله \" ؟؟؟؟ هو الله سبحانه وتعالى \" بيدفع \"؟؟؟ ودفع كام ؟؟؟ ولمين ؟؟؟ ... وهات ياسين وجيم معاك لحد ما يودوك السجن قال دفع الله : أنا اسمى دفع الله بشير الديك.

أبويا سودانى الجنسية متزوج من فتحيه توفيق المصرية. وأحمل الجنسية المصرية من أمى و الجنسية السودانية من أبوى . ولو جم وقالولى اسمك \"غير مناسب \" ومخالف للدستور المصرى أطلع لهم الجنسية السودانية. أو اروح السودان وأشتغل بحرفتى . هنا نقاش وهناك نقاش . وأسيب لهم دستورهم يعملوله \" بخره \" . فتح الله الحلاق وجابر المحلاوى وفى ركن آخر من أركان المقهى دار حوار خامس بين فتح الله الحلاق وجابر المحلاوى.

وقال فتح الله لجابر : الدستور ده ادانى فرصة أنتقم من الفنان الكوميدى الكبير محمد سعد اللى مرضيش ياخدنى \" كوافير\" معاه أو حتى \" كومبارس \" فى الفيلم بتاعه اللى سمى نفسه فيه \" عوكل \". أهو \" عوكل \" ده طلع اسم \"غير مناسب\" ومخالف للدستور. يبقى خد على قفاك من الدستور يا محمد ياسعد . ورد عليه جابر: متفرحش كده ياحلو . محمد سعد مش هو اللى سمى نفسه \"عوكل \" . اللى سماه \"عوكل\" هو مؤلف قصة الفيلم . ودى مش مسئولية محمد سعد . ورد فتح الله بحسرة : ياخسارة .

كنت حأوديه فى داهية بقوة الدستور خوف عبد المسيح من فتاوى شيوخ الاسلام وفى ركن متطرف دار حوار سادس بين عبد المسيح باشكاتب المحكمة وبرسوم الترزى وشنوده صليب المحاسب . وقال عبد المسيح : ياخوفى لتطلع فتوى من شيخ من اياهم من الاخوان المسلمين أو السلفيين وتقول \" كل أسماء النصارى واليهود \"غير مناسبة\" ومخالفة للدستور الذى ينص فى المادة التانبة على أن \" الاسلام دين الدولة . ومبادئ الشريعة الاسلامية المصدر الرئيسى للتشريع \" ويطالبوا بتطبيقها على المادة الخاصة باسماء المواليد تحت بند \"الاسم الماسب\" ويخرجوا أسامينا من \"الاسامى المناسبة \" . وعلق برسوم على ذلك بقوله \"تبقى ياداهية دقى . وتقوم حرب أهلية بين المسلمين والمسيحيين بسبب \" دستور مرسى والاخوان المسلمين \" ويسيل الدم للركب . وعلق شنوده على ذلك بقوله : الكلام ده مش ممكن يحصل .

وللمسيحيين رب يحميهم . قال لهم\" أنا معكم الى الأبد والى انقضاء الدهر \". و\" لن تسقط شعره من رؤوسكم الا باذن منى \" الخوف من الأثر الرجعى لأحكام الدستور وفى ركن مقابل لركن عبد المسيح جلس ابراهيم مدرس المحاسبة بمدرسة التجارة وسامى مأمور الضرائب ودار بينهما حوار سابع فى مجال الاقتصاد . وقال ابراهيم لسامى : تعرف ياسامى أنا خايف من ايه ؟ خايف يحصل تعديل فى نص المادة ( 70 ) من الدستور التى تنص على أن \"لكل طفل فور الولادة الحق فى اسم مناسب \" و يعملوها بأثر رجعى على كل المصريين . بس حتكون المشكلة يمتصوا غضب الشعب ازاى فى الحالة دى ؟ قال سامى : بسيطة .مصر بتمر بأزمه مالية . وممكن الحكومة تطلع قانون يدى فرصة للى عايزين يبدلوا اسماءهم \" الغير مناسبة \" ب \"اسماء مناسبة \" تتفق مع الدستور. وذلك بتقديم طلب رسمى عليه طابع دمغة بعشرة جنيه . حيلموا فلوس ياما ، ويحلو مشكلة ديون مصر .

وعلق ابراهيم على هذا الرأى بقوله : دانت طلعت داهية مسيحة ياسامى . انتم كده يا بتوع الضرايب . شهيتكم للضرايب مفتوحه على آخرها . حوارات المثقفين حول الاسم المناسب وفى ركن جانبى من المقهى جلس مجموعة من المثقفين حول \" ترابيزتين \" متلاصقتين . وضع عليهما درش المشروبات التى طلبها كل منهم حسب رغبته . وكان بين هؤلاء المثقفين بعض المصريين المهاجرين الذين حضروا من استراليا وكندا والولايات المتحدة الأمريكية فى زيارة لذويهم فى القاهرة. ودار بينهم حوار بحثى حول الغموض الشديد فى نص المادة (70 ) من الدستور التى تنص على أن \"لكل طفل فور الولادة الحق فى اسم مناسب \" وماذا يعنى المشرع \"بالاسم المناسب\". قال سامى عطوان : أنا نفسى أعرف ايه قصد المشرع بعبارة \" الاسم المناسب \" .

والمناسب لمين ؟ للأب والأم والأسرة ، وللا للمدرسة ، وللا للناس فى الكفر والقرية والمدينة اللى عايشين فيها ؟ وكلمة المناسب تعنى انه فيه \"اسم مناسب\" ، وفيه \"اسم غير مناسب\" . طب ايه الفرق بينهم ؟؟؟ وازاى المواطن العادى البسيط يعرف ان ده \"اسم مناسب\" ، وده \"اسم غير مناسب\"؟؟؟ رد عليه سليمان يوسف : أعتقد ان \" الاسم المناسب \" هو اللى ما يكونش اسم حيوان: زى أسماء فهد وجحش وجمل و نمر وسبع وأسد والقط والفار والحنش وخلافهم .

وما يكونش اسم طائر: زى صقر وعصفور وهدهد وبلبل وحمامه وبطه ووزه ...الخ وما يكونش اسم نبات زى ورده ونخله وشجرة الدر وبرقوق وموزه وبصل وجرجير وبقدونس وبطاطس ....الخ كمان ما يكونش من أسماء الأيام والشهور والفصول والسنين زى خميس وجمعه وسبت ، وربيع وشتا وخريف ، وشعبان ورمضان وذو القعده وذو الحجه وغيرها. وهنا سأله صفوت : هو فيه حد اسمه \" خريف \" أو \" ذو القعده\" أو \" ذو الحجه\" ؟ ورد سليمان ضاحكا : ما دام فيه اسم \"ربيع\" و\"شتا\" ايه اللى يمنع أب من انه يسمى ابنه \"خريف\" أو \"صيف\" ؟ وما دام فيه اسم \"شعبان\" و\" رمضان \" و : \" أمشير \" ايه المانع من أن أب يسمى ابنه \" ذو القعده \" و \" ذو الحجه \" . مش فيه اسم \" ذو الفقار\" ؟ وقال لطيف شاكر : أنا بأعتقد ان المشرع بيقصد استبعاد الأسماء الفرعونية زى: مينا ورمسيس وأحمس وغيرها وكمان الأسماء القبطية : زى سرجيوس وتواضروس وكيرولس وبرسوم وشنوده وغيرها علشان الأسماء دى مش ماشية مع الشريعة الاسلامية اللى نص عليها الدستور فى المادة التانية (الاسلام دين الدولة , واللغة العربية لغتها الرسمية، ومبادئ الشريعة الاسلامية المصدر الرئيسى للتشريع \" وكمان المادة (219 ) اللى بتأكد على الشريعة الاسلامية. ثم أن الأسماء القبطية والفرعونية مش ماشية مع اللغة العربية بتاعة قبيلة قريش ،وعرب الجاهلية ، زى جحش وكبيش وكليب ويعرب وعفان وأبو لهب وخلافهم .

وقال صفوت برسوم : أنا بأخمن أنه بيقصد استبعاد الأسماء المستوردة من الخارج ، من أوروبا وأمريكا وآسيا واستراليا وأفريقيا وبيعتبروها \" أسماء غير مناسبة \" زى مثلا : أسماء ولسون واسكندر وشارل وهتلر وكاظم وعدنان وخلافه أما الأسماء المناسبة فهى التى تحمل \"عبق الوطن\" و\"النكهة المصرية \" . وضحك الحاضرون من حكاية \"عبق الوطن\" و\" النكهة المصرية \". وعلق سليمان عليها بقوله: يبقى معنى كده تبقى الاسماء زى \" قشطه\" و\"حلاوه \" و\"نعناعه \" و\" فله \" و \" ريحانه \" \"وفواكه\" و \"مهلبيه \" أسماء مناسبه ورد صفوت قائلا : مش ده المقصود . انا قصدى الأسماء التى تعبر عن القيم المصرية الأصيله زى قيم الحب والطيبه والتسامح والوفاء والتفاؤل ، زى أسماء : سامح وسميح وصالح وصلاح وصادق وأمين وحليم وعادل ومحب وشاكر ومخلص و وفاء واخلاص وأمثالها . وقال اوليفر : أنا بأعتقد انه من خلال ما نراه من تتابع وتسارع الأحداث فى مصر . واننا بنخطو خطوات سريعه ، وللأسف هى خطوات للخلف . يعنى عكس التيار . وكل يوم نقترب أكثر وأكثر من الحياة فى الجاهلية . اللبس بتاعنا ده ما ينفعش ، ولازم نرجع للحجاب والنقاب والجلبية والتقاضى فى المحاكم ما ينفعش .

ولازم نرجع للمجالس العرفية. ونظام الحكم الجمهورى والديمقراطيه ده حرام وكفر. ولازم نرجع لنظام الخلافة وولاية الفقيه . ومن هذا المنطلق أعتقد أن المشرع يرى أن معظم الأسماء الشائعة \" غير مناسبة \" ولذلك نص فى الدستورعلى حق المواليد فى \"الأسماء المناسبة\" . وأظن أنه يقصد الأسماء التى كانت سائدة فى الجاهلية ، بين عرب قريش. ومنها على سبيل المثال : جهم و شلقم وعكرمه وكعب وكبش وجحش ومسيلمه وهريره ( تصغير هره بمعنى قطه ) والزبير وعفان وأبو سفيان وأبو لهب وابن كثير وقتاده وخوله وأمثالها . وكذلك الأسماء التى تأخذ صيغة الأفعال مثل : يزيد ويعرب ويعفور وهكذا . وعلق سامى عطوان على هذا الرأى بقوله : هواحنا لما بنقرا بيت شعر غامض مش بنقول ان المعنى فى بطن الشاعر ؟ وهنا نفس الحكاية \" الاسم المناسب \" نص غامض . يبقى نقدر نقول \" المعنى فى بطن المشرع . وضحك الحاضرون من هذا التعليق . ثم بدأ حنا المحامى يعرض تفسيره القانونى \"للاسم المناسب \" : أعتقد أن المشرع كان يقصد \" بالاسم المناسب\" أن لا يكون الاسم مركبا من اسمين اعتاد الناس على التعامل معهما منفردين وعلى سبيل المثال محمد / وحسنى / وأنور / وأحمد / وفؤاد / وأمثالها فاذا افترضنا أن أب اسمه أنور . ووالده اسمه فؤاد. وأطلق الأب على ابنه اسم حسنى. يصبح اسم الابن حسنى أنور فؤاد وكان هناك أب آخراسمه محمد أنور. ووالده اسمه أحمد فؤاد. وأطلق الأب على ابنه اسم محمد حسنى. يصبح الاسم الثلاثى للابن هو محمد حسنى محمد أنور أحمد فؤاد. وكان هناك أب ثالث اسمه حسنى . واسم والده محمد .

وأطلق الأب على ابنه اسم محمد . يصبح اسم الابن محمد حسنى محمد فنحن نلاحظ هنا فروقا واضحة بين أسماء الثلاثة تربك المتعاملين معهم، وقد تؤدى الى مشاكل قانونية لأنها تسمح لهم بالتحايل على القوانين والقيام بعمليات تزوير . بالاضافة الى ذلك أن قارئ \"الأسم المركب\" لا يستطيع أن يفرق بسهولة بين اسم الابن واسم الأب واسم الجد . ** وينطبق ذلك أيضا على الأسماء ذات الدلالة على المثنى ، زى محمدين وحسنين وعوضين وأمثالها . فهى أسماء غير مقبوله ، وكثيرا ما تثير السخرية من حاملها ** وكذك الأسماء التى تتكون من ثلاثة كلمات مثل \" عبد رب مريم \" و\"عبد رب النبى \"و \" محمد صلاح الدين \" وما على شاكلتها . وعلق صموئيل تاوضروس على كلام \"المتر\" حنا قائلا : أنا بقى مش عايز أقول ان اللى يحدد\" الاسم المناسب \" هو عدد كلماته . جايز أن المشرع كان يقصد \" عدد حروفه \". يعنى الاسم اللى يكون عدد حروفه 2 أو 3 أو ممكن 4 يبقى \" اسم مناسب\" .زى \" عز وبكر وجحش وحسن ونصر ومحمد وسرسق وخنفر.... ألخ والاسم اللى يكون عدد حروفه أكتر من 4 يبقى \" اسم غير مناسب\" .زى ممدوح ويعقوب وجورجيت وسبعاوى ...الخ وليس فى عبارة \" الاسم المناسب \" ما يتعارض مع هذا التفسير . وضحك سمير حبشى عند سماع تفسير صموئيل وقال \" طب ايه رأيكم أنا عندى تفسير أدق من تفسير صموئيل : فأنا أخمن أن المشرع كان يقصد \"عدد النقط \" فى الاسم . ف \" الاسم المناسب \" هو الذى لا يحتوى على \" حروف منقطة \" زى حروف ( ب ت ث ج خ ذ ز ش ض غ ف ق ن ) زى أسماء عصام وكمال وسعد ومرسى وحلمى وخلافه . هى دى الأسماء المناسبه و\"الاسم غيرالمناسب\" هو الذى يحتوى على \"حروف منقطة\".زى عنتر ويعقوب وتناغو ونتنياهو وكلما زاد عدد النقط فى الاسم ازداد الاسم سوءا . لأن النقط فوق الحروف كثيرا ما تؤدى الى الوقوع فى الحطأ . فمثلا اسم \" عنتر \" . النقطة فى الحرف الثانى \" النون مجاورة للنقطتين فى الحرف الثالث \"التاء \" .وهذا التلاصق يجعل من الممكن أن تقرأ الاسم \" ع ن ت ر \" أو \" ع ت ن ر \". واسم \"نتنياهو\" ممكن أن تقرأه \" تننياهو\" أو \"ننتياهو \" الخ . وضحكت المجموعة من هذا التفسير الغريب . ولكنه يمكن أيضا أن يدخل تحت مفهوم \" الاسم المناسب \" .

وهنا قال الشيخ خالد عطعوط : ياجماعة أنا لاحظت انكم شطحتم بعيدا . والمسألة واضحة كل الوضوح .مثل ضوء الشمس فى وضح النهار !!! الدستور يقول \" الاسلام دين الدولة \" .و\" مبادئ الشريعة الاسلامية المصدر الرئيسى للتشريع \" والحديث يقول: \" خير الأسماء ما حمد ( بضم الحاء وتشديد الميم وتحتها كسره ) وما عبد (بضم العين وتشديد الباء وتحتها كسره ) وهذا يعنى أن \" الاسم المناسب \" هو الذى يحتوى على الحروف الثلاثة ( الحاء والميم والدال ) مثل محمد وأحمد ومحمود . والأسماء التى تحتوى على كلمة ( عبد ) مثل عبد الله و عبد النبى و عبد الرسول وبقية أسماء الله الحسنى وما هو غير ذلك لا يندرج تحت عبارة \" الاسم المناسب \" ويتعارض مع الدستور . وعلق سمير حبشى على هذا الرأى بقوله : معنى كده ياشيخ خالد ان اسمك انت لا يدخل فى دائرة \"خير الأسماء \" لأنه لا فيه (حمد ) ولا فيه (عبد) . وضحك الحاضرون على هذه القفشة من سمير .

ولاحظ لطيف شاكر أن الشاعر فايز البهجورى لم يعلق - على غير عادته - على ما كان يدور من مناقشات حول غموض نص \"الاسم المناسب\" فى الدستور ، وكان بين وقت وآخر يمسك بالقلم ويخط سطورا فى ورقة أمامه. ونكشه لطيف بسؤال : يعنى يابهجورى محدش سمع لك تعليق على كل ما قيل . فين صوتك ؟ ورد فايز بعفويه : أصلى نسيته فى البيت . وهنا انفجر الحاضرون من الضحك على هذه الاجابه غير المتوقعه. ثم أضاف فايز : بداية لا بد أن نعترف أن هناك بعض الآباء يطلقون على أبنائهم أسماء تفتقر الى الذوق والحس الجمالى .ومنها على سبيل المثال : بريقع وسرسق وشرفنطح وخنفر وحيدر وحكشه وعجرمه وكاريوكا وفتح الباب وسر الختم وغطا الزير وغيرها وقد يكون السبب وراء ذلك هو الجهل أو المعتقدات الشعبية أو البعد الدينى فى ثقافاتهم أو ايا كان . وعلاج هذه المشكلة لا يحتاج الى نص فى الدستور ، لأن الدستور يتعامل مع مبادئ عامة وقوانين تحدد العلاقات بين الدولة والمواطنين . والحريات والعدالة والحقوق والواجبات وما فى هذا المستوى من التعامل . ولا يتعامل الدستور مع مبادئ الذوق العام والقيم الجمالية التى تدخل فى علم الأخلاق وعلم الجمال . وعلاج مشكلة مثل هذه الأسماء لا يحتاج الى أكثر من قرار ادارى من مسئول فى وزارة التعليم لواضعى المناهج الدراسية لتضمين هذه القيم فى مقررات مواد \"علم الأخلاق \"و\"علم الجمال\" و\"التربية الوطنية\" ، على أن تدرس للأطفال فى المرحلة الابتدائية والاعدادية . وعندما يصبح هؤلاء الأطفال \" آباء وأمهات\" سيختارون لأبنائهم أسماء جميلة. وتختفى مثل هذه الأسماء التى نشكو منها اليوم .

أما عن الانطباع الذى تركته قى نفسى هذه المادة فى الدستور، فقد عبرت عنه بهذه القصيدة : رسالة من أب الى ابنه كان نفسى أقول لك... زى ما قلت زمان... لخواتك بحجيلاتك .. برجيلاتك ... ياسلام سلم... على شرباتك كل الخفه.. معاك فى اللفه .. خلى شويه.. يا واد لخواتك كان نفسى أختارلك ... اسم يلعلع ...زى خواتك تفرح بيه .. .واحنا نغنبه ... لك... فى مناسباتك لكن خايف ...أختار اسم ...بجيب لى مصايب يطلع اسم ...فى نظر الدوله... ما كانش مناسب والدستور... قال تختار لابنك ...\"اسم مناسب\" وكل ما تيجى... سيرة اسمك ... ويا صديق يصرخ فيا... ويحذرنى ... \" أوعى \"... و \"حاسب\" الدستور ...قال تختار لابنك ...\" اسم مناسب \" وكل ما يجى ...على بالى اسم ... يزيد من حيرتى أفضل أقول... الاسم ده \" سكه \" ... وللا مناسب . والدستور ...قال تختار لابنك ...\" اسم مناسب \" أسأل ده... وأشاور ده ...أنه يفسر لى ايه مواصفات \" الأسم الرسمى \"... عشان أختاره يطلع برضه ... ما هواش فاهم... زى حلاتى وزى ما اسمك... جابلى الحيره ...هما احتاروا أنا مش عارف ...حد يقوللى ...ايه أوصافه فيه كام حرف ...عليهم نقطه ... واللا ما فيهشى حروف منقوطه وفيه كام كلمه ... وفيه كام فتحه ...وضمه ... وكسره وفيه كام شده ... وللا حروفه ... كده مفروطه حد يقوللى ...ويكسب فيا وفينا ثواب وأنا حدعيله ... بقلبى وعقلى .. ربنا يفتح له الأبواب *** وفى أركان أخرى من المقهى دارت حوارات أخرى بين فلان وفلان . وبين فلان وعلان , وعلان وفلتكان .ولا زال الجدل بينهم مستمرا بحثا عن تفسير \"للاسم المناسب \" فى (المادة 70) من الدستورالمصرى .

*** كما انتقل الجدل حول \"الاسم المناسب للمولود\" الى العاملين بمكتب السجل المدنى المجاور للمقهى . فعندما رزق الشيخ عبد المعزعبد الكافى الزعبلاوى بمولوده الأول، بعد أن توقفت زوجته عن الانجاب لمدة ثلاث سنوات ، أراد أن يطلق على ابنه \" اسما متفردا \" لم يسبقه اليه أحد ، ولن يشاركه فيه أحد . واستوحى من اسمه أن يعود الى أسماء الله الحسنى. واختار من بينها اسم \" المذل \" وأطلق على ابنه اسم \" عبد المذل \" . وذهب الى مقر مكتب السجل المدنى ، وقدم الاستمارة الخاصة بقيد اسماء المواليد الجدد للموظف المختص ، لاستخراج شهادة ميلاد له . وقرأ الموظف الاسم . ونظر الى الشيخ عبد المعز فى دهشة وقال له : عبد المذل ...عبد المعز...عبد الكافى ... الزعبلاوى ؟؟؟ ورد عليه الشيخ : أى نعم عبد المذل ...عبد المعز...عبد الكافى ... الزعبلاوى .وماذا فى ذلك ؟؟؟ واجاب الموظف : لكن اسم \"عبد المذل\" ده اسم غير مناسب ومخالف للدستور!!! قال الشيخ : وما الذى يجعله \" غير مناسب ومخالف للدستور\" ؟ أليس \"المذل\" اسما من أسماء الله الحسنى مثل المعز و القوى والجبار والرحمن والرحيم... الى غير ذلك ؟ واحتد الجدل بين الموظف والشيخ . وتدخل مدير المكتب لفض الخلاف بينهما. وطلب من الشيخ أن يعود الى المكتب بعد أسبوع ليعرف ما استقر عليه رأى الجهات العليا فى هذا الشأن .وهل ستتم اجازة هذا الاسم أم سيطلبون منه تغييره ؟ وانصرف الشيخ الزعبلاوى . ولكنه ترك اسم ابنه ليكون حديث كل العاملين بالمكتب . وتضاربت فيه الآراء . منهم من أقره . ومنهم من اعترض عليه . ومنهم من اقترح استفتاء فضيلة شيخ الأزهر وفضيلة مفتى الديار المصرية . ومنهم من اقترح ارساله الى مجلس الشورى لمناقشته وأخد الآراء فيه. ولا زال الجدل مستمرا حتى كتابة هذه السطور، حول \"الاسم المناسب للمولود \". الذى نصت عليه (المادة 70) من الدستورالمصرى انتاج عام 2012 . فايز البهجورى عضو الاتحاد الدولى للكتاب الصحفيين -------------------- 31 ديسمبر 2012 قالوا عن القصة : قرأت القصه الرائعه لأستاذى فايز البهجورى وجمالها أنها ببراعة صنعت الواقع والتصّور لما قد يدور من دردشة فى بوتقة واحده وإمتازت بخفة الدم فى النقد وتعرية الأحداث – وقد إستمتعت بها . وقراءة أجزائها التى تتوالى فى إنسياب رشيق . سليمان يوسف *------------* الفنان المبدع الأستاذ فايز البهجوري ما أروع القصة التي اشركتنا فيها جميعنا.و رغم أن قلمك الذهبي هو البطل الحقيقي للقصة إلا أنك لم تتردد في إضفاء أسماء حقيقية لتهب الشخوص حياة تخرجها من الخيال إلي المعايشة. هذا يا سيدي الفاضل درس في الكتابة .

و إبداع في الفن ، و طفرة في الكوميديا السياسية. شكراً لإشراكك لي في جلسة المبدعين الذين ذكرت أسمائهم. أظن أن رأيي هو إلغاء النص الدستوري بل و إلغاء الدستور بأكمله فهذا هو حل المعضلة.و لكن ما كتبته بقلمك علي أنه رايي يعكس تعايشك مع كل شخصية قبل التحدث بإسمها . و هو ما أهنئك بنجاحك فيه جداً. أوليفر لينتظر المولود موت الدستور الأستاذ المبدع فايز البهجوري كم هي جميلة قصتك التي مزجت بين الخيال و الواقع .و أجلست النشطاء معاً في ورشة عمل خيالية ليحلوا المعضلة التاريخية بإختيار إسم للمولود...و ليته ما ولد في كنف هذا الدستور .فلينتظر الطفل موت الدستور ثم يولد .و أظنه لن ينتظر طويلاً. علي أية حال أمتعتنا برشاقة التنقل بين الحقيقة و الخيال بمهارة فذة لكاتب طالما أمتعنا بأدبه و شعره. لك تحياتي و محبتي ( تعليق آخرلأوليفر على موقع الأقباط الاحرار ) *------------* عزيزى الاستاذ فايز: هذا مقال ساخر وله عمق رائع يعبر عن وهن الاعضاء الذين اشتركوا فى طبخ هذا الدستور . وأعجبتنى جدا الملاحظه القانونيه التى قد تفوت على كبار المحامين. شكرا على هذا الجهد الرائع. حنا حنا المحامى *------------* الحوار في القصة شيق يحمل فلسفة ما وراء الكلمات من معني يعتمل في داخلنا والحوار يعبر عن مدي تفاهة مواد الدستور الفاسد والحوار له ابعاد عميقة وضحتها الكلمات الذهبية بالقصيدة المميزة لشاعر عميق الفكر وثاقب الرؤية لطيف شاكر *------------

* الشاعر العظيم الأستاذ فايز البهجوري قرأت القصة اللطيفة واندمجت فيها تماما . وتخيلت فعلا أنها ليست قصة بل جزء من الواقع الذي نعيشه في مصر، وكان من الممكن أن يحدث شيء مثل هذا في الدستور الجديد من جهابزة مصر الذين وضعوا هذا الدستور .. إنك دائما بارع في كل ما تكتبه . وتمتعنا به. والشعر جاء لطيفا جدا .. ونطلب منك دائما المزيد لتمتعنا به أكثر وأكثر. عريان جرجس *------------* DEAR FAIEZ IT IS A GREAT STORY I LOVE IT THE DESTOR IS BIG JOKE AND ALMOST THE EGYPTIAN REJECTED THEM .BRAVOO. • Nader Guirguis ========================== للتعريف بالكاتب فايز البهجورى • أديب وشاعر وروائى وباحث • موجه أول فلسفة يالقاهره ( سابقا ) • عضو الاتحاد الدولى للصحفيين • عضو نقابة الصحفيين فى نيو جيرسى بالولايات المتحدة الأمريكية • عضو نقابة الصحفيين بسدنى باستراليا • يكتب الشعر باللغتين العريبة والانجليزية وله 4 دواوين باللغة العربية و 3 دواوين باللغة الانجليزية • له أكثر من 300 مؤلف بين روايات ومجموعات قصصية وكتب وأبحاث • ألف وطبع ونشر كتابه الأول وهو طالب فى المدرسة الثانوية 1952 • يكتب فى عدة صحف منها صوت بلادى وصوت المهادجر وعضو مجلس ادارة جريدة الحرية قبل توفقها