ماجدة سيدهم
إهداء للضمير في شوارعنا خاصة لنسويات المحروسة بمناسبة اليوم العالمي للمرأة وكمان يوم المرأة المصرية..

  * مارس دا  كله شهر للستات..شهر تاء التأنيث ..نون النسوة والتاء المربوطة.. وأغلب المناضلات عن حقوق الستات والعنف ضد المرأة بيزعلوا  أوي من التاء المربوطة باعتبار التاء دي مقيدة لحرية المرأة وضد النضال النسوي لسنين طويلة أوي

أُومال مين اللي متمرمطين بالكوم في المحاكم والأعداد في زيادة مخيفة ..مين اللي بيتضربوا  وبيتقتلوا بأبشع الجرائم  وبيتولع فيهم وبيتسحلوا في الشوارع عيني عينك  وبيسيح دمهم وبيتعرضوا لكل أنواع القهر والعنف الأسري والمجتمعي كل لحظة ..

مين اللي بيتعرضوا للإستغلال والاغتصاب من أول طفلة البامبر لحد أي ست بتمر علي على شوية ذكور ولو صدفة  ..

كام ست وبنت في المحروسة ماتعرضتش للتحرش بكل سنتيمتر متاح في الشوارع  

على فكرة الجرائم دي سيئة السمعة جدا ومعيبة جدا وفضيحة فعلا لتأكيدها أن شوارعنا مش آمنه للستات والبنات خالص ..!

** أراء الذكور اللي بتهاجم المطالبة بإخصاء أو بإعدام المغتصب ومبررهم  :
* نفسية المغتصب ..!!

*  شهوة مالوش ذنب فيها  وظروف الزواج صعبة ..!!
* الإدمان هو السبب خاصة الشبو ..

* دا معاق ..(يعني معاق في مخه ومش معاق في اعضائه )  

 والرد على الأسباب المنطقية دي .. إطمنوا خالص المغتصبين في آمان وبالإخصاء هايتظبطوا وهايبقوا زي الفل ..

دي لو حالة واحدة بس برضه الإخصاء أفضل حل  ولكم في نائب رئيس مجلس الوزراء الإيطالي إسوة حسنة لما طالب بإخصاء ٧مصريبن مرة واحدة بتهمة اغتصاب طفلة إيطالية ١٤سنة ..

 *** سؤال..
متى يقع تحت طائلة القانون كل من تسبب وساهم في حالة الانحطاط القيمي والتعليمي والثقافي  اللي خربت شوارعنا  وكل من أيد بتسهيل جرائم الاغتصاب والتحرش بنشر أفكار سلفية قبيحة ودعّم  سيادة الحثالات بشوارعنا بالتساهل  القانوني وغيرها الكثير أيضا ..

* ياتري  جريمة الاغتصاب دي واللي انتهت بموت الطفلة الضحية (من رحمة ربنا بيها )

هل تعتبر  جريمة اغتصاب بس ولا وقتل كمان ..؟؛
طيب المشروع القبلي والسلفي الخاص بتصالح  الجاني ودفع دية لأهل المجني عليه نظامه إيه في الحالة  دي واللي هزت الرأي العام كله ؟!
شوية ضمير مش أكتر

* الإخصاء للمغتصب