ديڤيد ويصا
لو بتخدِم في اجتماع شباب وشابّات ..
هييجي يوم هتُفاجأ فيه بأسئلة منهم ..
هتحِس قُداّمها بالعجز أو التّهديد ..
لأن معندَكش ليها إجابة ..
ساعتها مش هيكفي انك ..
تلجأ لحد يدّيك إجابة سريعة ..
لأنها مش هتِشبِع أسئلتهم العميقة!
ولا هينفع تقعَّدهُم مع حَدّ شاطر لمرّة واحدة ..
لأنهم ممكن يستقبلوها كما لو كنت بتحاول تردُّهم للإيمان ..
وهُمّا مش شايفين نفسهم ارتدُوا عنه، لأنهم فعلًا مش كده!
--
لكن هتحتاج انت شخصيًّا تقرا وتسمع وتتعلّم ..
لأن انت اللي باقيلهم وبتخدمهم خدمة قريّبة ..
وبالتالي أغلب قعدِتهم وتحدّياتهم ..
هتكون قُصاد عينيك ومنتظرة رعايتك!
عشان كده نصيحتي ليك ..
لو بتخدم خدمة دايمة في كنيسة ..
اتعامِل مع الخدمة زي خُدّام مدارس الأحد ..
خدمتهم منهم فيهم، وقليل لما بيستعينوا بخادم من برَّه!
--
إوعى تستنى لما اللحظة دي تيجي، وبعدين تفوق ..
لكن ابتدي من دلوقتي انك تسأل نفسك الأسئلة دي ..
وتجتهد انك تدوَّر ليها على إجابة ليك، قبل ما تكون ليهم!
إنت ليه مسيحي؟ ويعني إيه اصلًا مسيحي؟
ليه متكونش حاجة تاني؟
وإيه أفضليّة المسيحيّة اللي بتميّزها عن أي حاجة تاني؟
بتؤمن بإيه؟ وبتؤمن بيه ليه؟ وبتؤمن بمين أصلًا؟
أعتقد الأسئلة دي هتفتح قُدّامك بيبان كتير ..
وهتساعدك تقف على أرض صلبة ليك ..
قبل ما تقدر تساعد غيرك انه يقف على نفس الأرض!
لو بتخدم ..
أرجوك متستنّاش، وابتدي دلوقتي قبل بُكره!
ديڤيد ويصا
