ديڤيد ويصا
إيه رأيكوا لو قلتلكوا ان الدينارين ..
اللي دفعهم السّامري لصاحب الفندق (لو١٠)
يرمزوا للآب والابن اللي دفعوا فينا تمن غالي؟
أو انهم يرمزوا لفترة ألفين سنة ..
هي المدة من مجيء المسيح الأول، لمجيئه التاني ..
لأن الدينار أجرة عامل ليوم، واليوم عند الرب بألف سنة؟
وإيه رأيكوا ان الدّابّة اللي حطّ عليها السامري الشخص الجريح ..
ترمز لجسد المسيح اللي حمل فيه خطايانا وأسقامنا؟
طب إيه رأيكوا لو قلتلكوا ان التُّور اللي حمل تابوت الرب (٢صم٦)
يرمز للمؤمنين الأقوياء اللي بيحملوا الحضور الإلهي؟
ولو طلّعتلكوا نصوص من أسفار الأنبياء أو سفر الرؤيا ..
بتتكلّم عن اللي بيحصَل في سوريا وألمانيا، وإسرائيل؟
عندي من العيّنة دي كتير لو تحبّوا تسمعوا!
--
تفسيرات شكلها حلو وبتتقال من ناس كتير زمان وحاليًا ..
دي كمان تفسيرات بتشدّنا وتبهرنا وبتخلّينا نصدّقها ..
عشان بتدّينا حاجة شكلها عميق، مع إن النَّص مش بيقولها ..
بس لو ركّزتوا فيها هتلاقوها تفسيرات ملهاش أساس ومعيار واضح ..
أي حد ممكن يمسك أي نَصّ، يطلع منه بأي حاجة، طالما شكلها حلو ..
ومقدرش اطلع منها بمبادئ اطبّقها على نصوص كتابيّة تانية، في خلوتي ..
وبالتالي هفضل مربوط باللي بيقولها، عشان يقولّي حاجة شبهها ..
ولو حاوِلت اعمل زيُّه هشوّه معاني نصوص كتير بضمير ميّت!
التفسيرات دي منتشرة على منابر كتير، في مختلف الطوايف ..
سواء في الطوايف التقليديّة، واللي في الآخِر ليها إطار بيحكمها ..
أو الپروتستانتيّة، وبالأخص الكاريزماتيّة واللي ملهاش حد يحكمها!
--
يا شعب الرب، يا كنيسة الله الغالية اللي افتداها بدمه ..
مسيحنا ومسيحيّتنا أعمق وأقوى وأرقى من كده بكتير ..
بلاش تسلّموا ودانكوا وقلوبكوا ومفاتيح عقولكوا لأشخاص ..
ولا لتفاسير (هحترمها واقول انها تفاسير) ملهاش علاقة بالكتاب ..
التفسير الكتابي ليه أصول ومعايير وضوابط ..
والأمثلة اللي قلتها دي مجرّد عيّنة من حاجات كتير منتشرة حوالينا ..
قليل منها هعتبره تأملات روحيّة قد تكون مفيدة أحيانًا ..
وكتير منها هو في حقيقته "اغتصاب" واستهانة بالكتاب ..
بلاش تسلّموا كيانكوا الغالي اللي الرب فداه ..
لأشخاص بيخاطبوا مشاعركوا وخيالكوا طول الوقت ..
عشان يحافظوا عليكوا في "حالة" من النّشوة الروحيّة المزيّفة ..
وقصادها بيدمّروا شخصيّاتكوا وتفرّدكوا ومواهبكوا وإمكانيّاتكوا ..
عشان تكون بتتشكّل وتتّلمذ على كلمة الله الصحيحة القويّة!
ومحدّش يخدعكوا لمجرّد انه ماسك الكتاب وبيتكلّم منه ..
وبالذات اللي بيدّعوا ان الكتاب مرجعيّتهم الوحيدة ..
وهُمّا أكتر ناس عملوا عشرات التفسيرات (المتناقضة) لنفس الكتاب!
إنتوا غاليين، بلاش تخلّوا حد يتعامل معاكوا برُخص!
--
اللي حابب ياخُد فكرة مبدئيّة عن بعض فواعد التفسير السليم ..
ممكن يشوف دول:
الطيبولوجيا الكتابية وسفر اللاويين | حسام حشمت
https://www.youtube.com/watch?v=jO_30bt-igY
التفسير التيبولوجي للكتاب المقدس (الجزء الأول) - دكتور عادل زكري
https://www.youtube.com/watch?v=GmDoe7D19dI
التفسير التيبولوجي للكتاب المقدس (الجزء الثاني) - د. عادل زكري
https://www.youtube.com/watch?v=HmceIYuvX9o
ديڤيد ويصا
