د.امير فهمي زخاري

مشكلة ٩٠٪ من رجالة مصر أمهاتهم مخلوهمش يشيلوا أي مسئولية ف بيوتهم، دول حتى ما علموهمش يحطوا طبقهم ف الحوض! أنتي عايزة واحد مش عارف عواقب ان طبقه يفضل ف مكانه يعرف يشيل مسئوليه؟
 
ما تصحيش من النوم علشان تسخني الأكل لابنك مايهز طوله  وعرضه ويسخن لنفسه..
 
ما تخليهاش حاجة عادية أنه يطلب من أي حد ف البيت يجيبله كوباية المياه او يعمله شاي او اى حاجه يقدر يعملها بنفسه..
 
لو سافرتي المفروض ابنك يعرف يشغل الغسالة لهدومه وينشر، عادي.. مش صح انك ترجعي من السفر تلاقي سبت الغسيل مليان بهدومه وتيجي تغسيليهم انتي وتنضفي وراه اوضته لان هو المفروض مسئول عن ترتيبها ونضافتها..
 
ابنك المفروض هو اللي  يفتح الباب..وهو الي يجيب طلبات البيت
 
ابنك المفروض يقف مع العمال، مش انتي ولا اخته علشان هو نايم.. عشان هيتجوز ست ويقولها مبحبش وقفة العمال وتبقى شايفاه مش راجل!👎
ما تخربوش على ولادكم بدلعهم، علشان الستات بقوا بيعرفوا يستغنوا عن الرجالة من كتر ما الرجالة بقت عالة ع الستات..
 
الراجل عنده مسئوليات ودور فى بيته ودي حاجة لا تقلل ولا تنتقص منه..
 
علموهم ينشروا الغسيل ويساعدوا في الطبخ وياخدوا بالهم من أخواتهم الصغيرين لو عندهم اخوات أصغر .. عشان بعد كده لما يكبر ويخلف ميبقاش حاسس ان ولاده عبء ومصدر ازعاج وان مراته بس هي اللي مفروض تغير وتأكل وتلبس . 
 
علموهم يتحملوا المسؤولية عشان لو ف يوم م الايام سافر يدرس لوحده ولا اتغرب عشان يشتغل ميغرقش ف شبر مية.
 
علموا ولادكم يبقوا رجالة مش بيبهات في جسم شحط زى الحيطة  طول بعرض مش ناقص غير انك تغيريله بالمرة 
 
 يا إما في بنت هتدعي عليكي لما تتدبس فيه 😑
 
يارب الأمهات تنفذ الكلام ده وتعلموهم يبقوا قد المسئولية من صغرهم ...
 
تحياتى للجميع..