كتب - محرر الاقباط متحدون
قال المفكر والطبيب خالد منتصر :" نفسي أفهم ايه حكاية هستيريا عدم الترحم على المسيحيين المتوفين؟؟!!، عندما يقال على واحد مسيحي مات الله يرحمه تجد جارك وكأنه قد لدغه تعبان ،
تنفر عروقه ويتهدج صوته وحرام عليك ما تترحمش على واحد مش من دينك!!!.
مضيفا عبر حسابه على فيسبوك :" هو حضرتك لو قلت الله يرحمه أو يرحمها حتتشل مثلاً زي حسين رياض في رد قلبي؟! أو حييجي لك اسقربوط في معاميعك؟؟!! هو احنا ما نعرفش نعيش إلا في كراهية؟! دي بنت اسمها نورهان أنطون صدمها قطار في محطة كفر الدوار وده جروب ماميز كفر الدوار
مظاهرة ع الجروب إزاي تترحموا ع البنت المسيحية دي وهات يا مواعظ وخطب وعتاب ووعيد بجهنم وبئس المصير اللي منتظرة كل مسلمة تتلفظ بلفظ الله يرحمها!!!.
واختتم :" السؤال المحير : ليه التدين عندنا بقى مرتبط بالقسوة والجهامة وغلظة الاحساس وجلافة التعامل وانعدام الانسانية والتمسك بالهيافة والتفاهات والسفاسف وتبخر فكرة الوطن الواحد؟؟!!!.
