د. أمير فهمي زخارى المنيا
خدوها نصيحة منى .. لو عايزة جوزك يشوفك كاملة الانوثة وفى ابهى صورك دايما حتى وهو بره البيت .يفتكرك ويشتاقلك ويبقى عاوز يرجع بفارغ الصبر ويبقى على أحر من الجمر ......
تجملى بالهدوء أثناء عصبيته ومترديش خالص خالص ..
وحاولى لما يتكلم معاكى فى موضوع مهم وشاغله تسمعيه دايما يعنى خليكى زوجة منصتة ليه بإمعان تام ووصليله كده خليه ياخد باله انك مركزة معاه ..
وحاولى متكونيش ثرثارة وكلامك يكون بس فى المنفعة والمفيد ..
واوعى تتكلمى عن جمالك قدامه لان ده بيقلل جمالك.. هو له عينين وشايف جمالك الخارجى ونفسه يشوف جمالك الداخلى وجمال روحك اللى بيوطد الصلة اكتر بينك وبينه وبيبرز أنوثتك أكتر ....
وفى حاجة كمان الراجل يحب الست الجميلة اه.... لكن يحب المثقفة أكتر , خليكى دايما ملمة بكل حاجة أخبار البلد وأى معلومات تبقى عارفاها باتقان وتعرفى تتكلمى معاه فى كل حاجة سياسة ..ثقافة ..اقتصاد ..مالية ..ادارة ..بنوك ..أى حاجة تبقى عارفاها أوعى تخليه يشوفك زى الاطرش فى الزفة ..
وطبعا كونك تبقى مطيعة ده بقي أبراز لأكبر أنوثة ودلال, وأوعى تكونى من النوع اللى بيبكى ع الفاضى والمليان لان ده بيطفش الراجل من البيت.
وعلاقتك بأهله خليها معتدلة .. لوحلوين : خليكى احلى . و لو وحشين : خليكى فى حالك وتابعى جوزك من غير مشاكل .
واهلك نفس الكلام مع جوزك برضه الاعتدال فى التعامل وبلاش التحيز اللى ممكن يخرب البيوت.
وحاولى فى خروجاتك معاه وعزوماتكم بره تكونى وضع شرف ليه ووسام على صدره خليه يتباهى بيكى قدام الدنيا برضه شكلا وموضوعا .. انا كده اتكلمت فى حاجات معينة بتقرب المسافات بينك وبين جوزك حاجات بنعيشها سنين مش لحظات ع السرير ...
الراجل عايش معاكى عمر بحاله فوق ارض الواقع , عيشيه احلى واقع وبالتالى هتعيشوا احلى واقع وخيال وعاطفة ورومانسية جوه احلى مدينة احلام هتعيشوها انتوا الاتنين بس , وهتبقوا متلهفين على بعض وبكل طاقتكم هاتختلسوا لحظات السعادة باى شكل وده لانك عرفتى توصلى لعقله قبل قلبه وهتبقى بالنسبة له اهله وعزوته ودنيته وام عياله وبنته وامه ومراته والدنيا باللى فيها وده لأنك اصبح رصيدك العاطفى والانثوى عنده عالى عالى اووووى وهايرد لك الرصيد ده بأكبر فايدة مركبة ممكنة من المعاملة والعلاقة والحب والمودة وفى الاخر هاختم كلامى ب 3 كلمات .........الراجل طفل كبير.
فهمتوا العبارة الأخيرة والا لسه" الراجل طفل كبير" ... تحياتي.
د. أمير فهمي زخارى المنيا
-----------------------------------------------------------------------------------
المصدر:
إيليا ثابت .... خدمة المشورة النفسية والأسرية وتربية الأطفال
