كتب - محرر الاقباط متحدون
قال المفكر والطبيب خالد منتصر :" رداً على اللي بيقول لك وفيها ايه لما يكون فيه طب وهندسة الأزهر ، هو انت ضد العلم؟! ، أنا مش ضد العلم ، لكن أنا ضد عدم العدالة وضد الاستخفاف بقيم المواطنة وضد تدمير أسس الدولة المدنية والدستور القائم على المساواة وتكافؤ الفرص وعدم التفرقة على أساس الدين .
مضيفا عبر حسابه على فيسبوك :"لما جرجس ما يدخلش طب على نص درجة ، وأحمد يدخل طب الأزهر لإنه مسلم خريج ثانوية أزهرية وبدرجات أقل ، فده يعتبر إخلال جسيم بقيم المواطنة والعدالة، ما فيش جامعة في الكرة الأرضية بتضع شرط الديانة في القبول إلا كليات أصول الدين ..الخ ، لكن طب وهندسة الأزهر مش كليات عقيدة وفقه !! ولو حد رد وقال ما مصر مليانة مدارس مسيحية حاقول له بس مافيهاش كلية طب اكليريكية ، ولا هندسة أرثوذكسية !!، وكمان شوف مدارس الفرير والراعي الصالح وراهبات الفرنسيسكان والجيزويت والقلب المقدس…الخ فيها كام مسلم.
بل شوف نسبة المسلمين فيها واقبالهم على التعليم فيها لأنها مدارس غير عنصرية تقبل الجميع برحابة صدر ولا تفرق ولا تضع في معاييرها شرط الديانة
عارف إني حاتشتم وحيكفروني ويتهموني باني باقبض شيكات ماسونية صليبية…الخ.
واختتم :" لكني لن أقدم أبداً الأكاذيب المريحة حتى ولو كان الثمن خصم من جماهيرية أو وقاحات قطيع أو شخصنة ألتراس كل الحب للأصدقاء والمحبين الذين ما زالوا محتفظين بجذوة التنوير مشتعلة حتى ولو كانت خافتة في زمن الزيف.
