أمير فهمى زخارى 

من الزلوطه حتى الجنيه..
ومع البوست صور لها.  
⬅1 - (زلوطة ) وهى عملة تركية قديمه اتسكت من الفضة فى عهد السلطان سليمان الثانى على نمط العملة البولندية المسماة زلوطة ،واستخدم النوع ده فى مصر وأطلق عليه المصريون اسم « صلدى.
 
⬅ 2-(زر محبوب ) دى بأه عملة مصرية من الذهب ،وكلمة «زر» متاخدة من اللغة الفارسية بمعنى ذهب ،وكلمة « محبوب» جايه من اللغة العربية بمعنى « عزيز» ،فبعد استيلاء سليم الاول على مصر سنة 1517 ميلادية سك نقودا ذهبية اتسمت بأسم زر محبوب ،وبعد كده سماها المصريين « محبوب سليمى» نسبة الى السلطان سليم ، وبقى كل سلطان ييجى يسموها بعد كده على اسمه يعنى محبوب كذا ( اسم السلطان )
 
⬅3 –( السحتوت ) دى عملة قيمتها ربع مليم يعنى الجنيه بيساوى 4000 سحتوت وكان بيتكتب عليه عبارة ( من ربع عشرالقرش ) والاسم ده كان جاى من سوريا وفلسطين .
 
⬅4 – اما ( المليم ) فسموه كده على اسم الكلمة الفرنسية « Millieme» ،بمعنى ( جزء من ألف ) ،وكان الجنيه المصرى بيحتوى على ألف مليم ،وأول مليم مصرى تم سكه كان فى عهد السلطان حسين كامل ،سنة ( 1335هجرية-1917ميلادية)
 
 
⬅5 - (النكله ) دى كانت بتساوي مليمان يعنى 8 سحتوت ودى جت من الكلمة الانجليزية nickel ومعناها النيكل الانجليزى .
 
⬅6 -( الربع قرش ) مليمان ونصف المليم تساوى 10 سحتوت
 
⬅7 - ( التعريفه) خمسة مليمات وجايه من الكلمة الانجليزية tariff ومعناها الاجرة
 
⬅8 –اما ( الصاغ ) فهو أصله تركى،ومعناه( سليم ) فكانوا بيسموا القرش السليم قرش صاغ
 
⬅9 – اما ( النص فرنك ) هو القطعة المعدنية الفضية اللى قيمتها قرشين لان الفرنك الفرنسى ساعتها كان قيمته 4 قروش .
 
⬅10 - ، اما (الشلن ) فده فى الاصل عملة انجليزية، فالريال المصرى كان (20 قرشا) وكان بيساوى ( 4 شلنات) انجليزى shilling ،يعنى كل 5 قروش مصرى تساوى « شلن» انجليزى،فطلعوا عليه الناس اسم شلن
 
⬅11 - ( بريزة ) وتوازي عشرة قروش، وسميت بهذا الاسم حين طلب الوالي محمد سعيد باشا (1854-1863م) من "المسيو براناي" في باريس عام 1862م صك عملة مصرية جديدة تحمل اسمه وتاريخ ضربها، ولكن مات الوالي سعيد باشا قبل وصول العملة لمصر وتولى الحكم الخديوي إسماعيل عام (1863- 1879م) الذي رفض استخدامها تقربا للسلطان العثماني (عبد العزيز) حيث أنها لم تحمل اسم السلطان، وأعيد ضربها مع إضافة اسم السلطان وتاريخ توليه الخلافة، فلما تداولها المصريون أطلقوا عليها "الباريزة" نسبة إلى أنها ضربت في باريس
 
⬅12 –( الريال ) والاسم ده من زمان اوى من ايام الاساطيل الاسبانية اللى كانت بتيجى بالريال الاسبانى للدول العربية ومعنى كلمة ريال ( ملكى ) . وسموه المصريين على القطعة الفضة ام 20 قرش .
 
⬅13 - تسمية (الجنيه ) ليست عربية وإنما هي إنجليزية لعملة إنجلترا التي كانت متداولة بها منذ أربعمائة عام مضت وهي Guinea (ينطق: جِني بالجيم المصرية)، ومع أن الجنيه الإنجليزي كان غير مستخدم عند إصدار الجنيه المصري، إلا أنه كان مساويا له تقريبا من حيث الوزن. وأول سكة للجنيه كانت فى عهد محمد على باشا .
 
⬅14 - ( مصارى ) التى ترمز للنقود المصرية حتى الان فى الدول العربية فتعود الى كلمة « مصرية» التى أطلقها العرب على العملة المصرية ( البارة) .
مش بأقولكم البوست ده يعتبر موسوعه ثقافيه كامله ...