نشرت إحدى الفتيات تدعى شروق أيمن عبر صفحتها الشخصية بموقع التواصل الاجتماعي فيسبوك، منشورًا يفيد بتعرضها لمحاولة قتل على يد سائق تابع لشركة أوبر، بمنطقة العبور بالقليوبية.
وقالت الفتاة في منشورها: النهاردة الصبح الساعة 10 كنت عند نادي العبور، وحاودت أطلب عربية ديدي وان درايف، وقعدت أكتر من ربع ساعة مكنش في عربيات، وكنت عند بوابة 2 ومنطقة ساكته خالص، فاضطريت أطلب أوبر وقعدت 10 دقايق على ما جالي عربية، و10 دقايق كمان مستنياها.
وأضافت شروق أيمن فتاة العبور: ركبت أنا ومعايا أختي وبقوله هقف لحظة عند إيتوال أجيب حاجة، لاقيته عمال يزعق فيا وبيقول لي ومين قالك إنها هتبقي دقيقة، وهتدخلي تقعدي ساعة جوه وكل ده بيزعقلي وبيقولي كلكم كده كل واحده تقولي دقيقة، وتدخل تقعد ساعة على ما تنقي وتختار وتتفرج، يزعق يقولي مش هترضي تدفعي وكلكم كده، هتدخلي تقعدي ساعة جوه، وعمال يزعق فيا بقوله مين قال أنا مش هدفع حضرتك اللي هتطلبه، أنا هدفعه وأنا متكلمتش كل ده أنا ساكتة قالي كلكم بتقولوا كده.
كما زعمت شروق: وقفني قدام إيتوال اللي هو بينه بين بوابة النادي دقتين بالظبط، وأنا قعدت جوه دقيتين بالعدد معايا فاتورة إيتوال، وزعق فيا وشوح بإيده اتفضلي إنزلي سكت ونزلت وأختي فالعربية وأنا جوه كلمت زوجي، وحكيت له اللي حصل وقولت له اطلع لي عشان الراجل شكله غريب ومش مبطل زعيق فيا.
وتابعت: وصلت عند البيت زوجي كان مستنى قدام الباب نزلنا بيقول له أنت بتزعق لها كده ليه، والله بيتكلم بهدوء وبأدب وأنت بتكلمها كده ليه، راح خد آخر الشارع ولف ورجع وقف قدام البيت، ويىقوله أه أنتم مش هتجيبوا فلوس أنا كنت عارف أنكم مش هتدفعوا فلوس، هتجيب الفلوس ولا لا، وزوجي قاله فلوسك أهي وحطها له في العربية راح رجع حدف الفلوس فوشنا وقال لنا لفظ خادش.
وأشارت فتاة العبور: جوزي رجع له وبيقوله أنت بتقول ايه بتتكلم كدا ليه راح نازل جايب الكوريك، وجري ورانا بيه ورافعه علينا، ووقع جوزي فالارض، وبيقوله هقتلك، وأما وقعه وكان هينزل الكوريك على دماغه، أختي صرخت وقالت له أنت هتعمل إيه إبعد عنه جيه يجري عليناـ ويقولها هقتلك أنا هموتك وأما صرخت بيقوا لي اسكتي لأموتك وهقتلك، وأنا هقتلكوا كلكوا وقعد يزعق ويصرخ، أنا هقتلكم كلكم، وأول ما لقي عربيات الجهاز دخلت الشارع خد بعضه وجري، وعملت شكوى في أوبر طبعا مستنيه الرد، وجوزي دراعه فيه كدمه وجسمه كله كدمات.
واختتمت: أنا معايا نمر العربية، وأكيد هيعمل أكونتات تانيه وأنا دلوقتي بحذر منه إن حد يركب معاه لأنه واضح أنه مش مظبو، هروح أعمل محضر والله بس قولت انبه الأول.
