د. أمير فهمي زخارى المنيا
مفيش اي حاجة من الكلام ده مظبوط من الناحية الطبية.. هتقولي ازاي! تعالى اقولك
- الموضة الجديدة حكاية الابر دي.. أحب أقولك ان امكانيه استخدام "شك دبوس" تحت الجلد لتخدير انسان أو أن يتسبب في غيابه عن الوعي أو النوم غير علمي..
انت عارف علشان مخدر تاخده عضل تاخد ع الاقل كام مل؟ اقل حاجة ١٠ مل تخيل تفضل مش حاسس بحد ناكت الحقنة ف عضلتك.. يبقى ساعتها تستاهل انهم يقتلوك.
وعارف لو انت اخدت مخدر قوي انت هتموت يا معلم قبل ما تتخدر بسبب شلل العضلات "muscle paralysis"
وأيد ذلك أ. د. أيمن ثروت أستاذ التخدير والرعاية المركزة بكلية طب عين شمس..
من الآخر لكى يتم تخدير انسان يجب وضع المادة المخدرة داخل الوريد ويستغرق الأمر من 20 الى 30 ثانيه..
وأيد أيضا الدكتور جمال شعبان أستاذ كهرباء القلب وعميد معهد القلب سابقا تعليقا على الشائعات التى ترددت مؤخرا بوجود حوادث خطف الفتيات وتخديرهن بشكة دبوس:" استحالة شكة دبوس تعمل تخدير كلي، موضحا أن التخدير يحتاج إلى حقن في الوريد بجرعات معينة ليست قليلة، مؤكدا أن الأمر ليس بالبساطة ولا السهولة التي يعتقدها الناس.
- التخدير عن طريق الاستنشاق ده موال كبير محتاج جهاز بالماسك ... المواد المخدرة اللي بتتعامل بالطريقة دي أشهرها الكلوروفورم اللي بيتعامل معاملة المخدرات واجراءات الحصول عليه ف المستشفيات معقدة جدا.
الكلوروفورم ده علشان يتبخر ويوصل للماسك كبخار بيكون موجود ف اسطوانات وبيعدي ع دورة تبخير او vapourizers علشان تحوله لبخار حضرتك وانت نايم ف اوضه العمليات تستنشقه وبيكون ف دكتور تخدير وتلاتة معاه علشان يتأكدوا إنك اتخدرت والموضوع مش بياخد اقل من ٣ ل ٥ دقائق..
- اخر حاجة مافيا الاعضاء ...
انا بجد مكنتش متصور ان مستوى الجهل يوصل لكده ... بس تعرف صديقى العزيز ان مصر مفيهاش زراعة اعضاء اه والله زي ما بقولك كده يعني بالعافية عندنا زراعة قرنية وكلى وكبد. وللكبار مش الاطفال ... طب تعالى اقولك حاجة
فيه حاجة اسمها
Major histocombitability complex (MHC)
ده مسؤول عن مدى توافق العضو ... طب تعرف اننا بفرض لقينا المتبرع الموضوع بياخد من٣ ل ٦ شهور حد ادني عقبال ما تتم العملية ... بنعمل فيهم تحاليل واشعات وكفاءة قلب وفصيلة دم وتحاليل فيروسات ومسح ذري للكلى وادوية مثبطة للمناعة ...
وبعد كل ده يروح يعمل محضر بانه متبرع ويرجع يتعرض على لجنة طبية رباعية تقيم الحالة من اولها لأخرها وبعد كده يقرروا ياخدوا انهي كلية.
يجي يوم العملية يتفتح اوضتين عمليات على بعض بحيث يكون من اول ما ناخد الكلى من المتبرع نزرعها للمريض ف خلال نص ساعة علشان الكلى ليها حاجة اسمها ISCHEMIC TIME ده الزمن اللي بتفضل الكلية محافظة على وظائفها بعيد عن الامداد الدموي وده بيساوى ٣٠ دقيقة ده غير ظروف العملية نفسها والتعقيم.
وارجع اقولك مفيش حاجة اسمها عمليات زراعة للأطفال معندناش التكنولوجيا دي للأسف مفيش عندنا ميني بوكس من كريازي بنحفظ فيه الاعضاء ومينفعش اعضاء الاطفال نزرعها ف الكبار ... كل ده جهل ووهم يا جماعة ... اخيرا انا بتكلم من الناحية الطبية ...
لكن فيه خطف وفيه قتل لكن الاسباب واللي بيحصل دي الشرطة هي المسؤولة عن تفسيره...
أنا كتبت المقال ده بعدما تكرر تداول على مواقع التواصل الاجتماعى "الفيس بوك" و "الواتس آب" مقطع صوتي بشأن وجود عمليات خطف للفتيات وتخديرهن من خلال دبوس أو منديل به ماده مخدره حيث تغيب الضحية عن الوعي ونقلها لمكان مجهول لتغير ديانتها أو اغتصابها أو سرقه أعضائها...
كل الأمور دى لبث الرعب وعدم وجود الأمن في البلد ...
وعلق الأنبا يؤانس بقوله: لا يوجد شيء اسمه خطف بنات.. بل يوجد شيء اسمه إغواء بنات...
خد بالك من نفسك ومن أولادك ده مطلوب ولكن بالعقل .... تحياتي.
د. أمير فهمي زخارى المنيا
