د. أمير فهمى زخارى
يعنى ايه معنى كلمه مقويات ومنشطات ومسكنات وخافضات للحرارة ... تعالوا نصحح بعض معلوماتنا المغلوطة في هذا المقال...
1- مفيش حاجة اسمها "مقويات"، وهذا المصطلح لا يعرفه الطب لان القوة العضلية هي حصيلة التدريب البدني، اما الكبسولات والبرشام والاكلات والخلاصات والمكملات جميعها لا تمنح القوة، وحتى السعرات لا تمنح القوة الا بعد ان ترشحها العضلة للاحتراق في عملية الانقباض، لكن تاخد 8000 سعر حراري وتمدد على الكنبة ... إنسي.
2- مفيش حاجة اسمها "منشطات" تاخدها قوم يروح منك الكسل، ويضيع الوخم، وبعدها تقوم تفز من تحت الغطا تخش على مواعين المطبخ تشطبها، وتطلب من مراتك مضرب السجاد و...و.. تؤتؤ مش هيحصل.
النشاط ده حالة من الصفاء الذهني يدفع الجسم لان يقدم طاقته البدنية لإتيان امر يسعد صاحبه.
3- مفيش حاجة اسمها "مسكنات" في غياب الالم، يعني مفيش تسكين للألم يمنع وقوعه.
يعمل المسكن في وجود الألم، لان المسكن يعمل على كيمياء الألم التي يفرزها المخ.
وللعلم، حتى المخدرات تمنح نفسها الأولوية لقتل الألم وتتجاهل إشباع الاحتياج المزاجي في وجود الألم، ولذلك التداوي بها لا يحدث الإدمان في وجود الألم، ولكن اول جرعة مخدر بعد زوال الالم تنزل ضيفا على مستقبلات المزاج وتؤتي الإدمان.
4- مفيش حاجة اسمها "خافضات الحرارة" في عدم وجود ارتفاع بحرارة الجسم، وحتى الأسبرين لا يخفض الا الحرارة الاعلى من 37°م، يعنى لو اخدت علبة اسبرين كاملة هاتتسمم بس حرارتك مش هتنزل ولا شرطة.
وللحديث بقية ... ثقافه المعرفة جميله.. تحياتى.
