حل الفنان بيومي فؤاد ضيفًا على برنامج "حبر سري" تقديم أسما إبراهيم ويعرض على قناة "القاهرة والناس".
وتحدث الفنان بيومي فؤاد عن أزمته مع الفنان محمد سلام ودافع عن الفنان محمد أنور الذي جاء بديلًا لـ "سلام"، وكشف عن العديد من التفاصيل لأول مرة في فقرة بعنوان "قد الكلام".
وعن أزمته مع الفنان محمد سلام قال: "هو نزل صور مسلسل الكبير بعد فيديو الاعتذار عن المسرحية والتزم بعقوده ووعوده في الكبير، وجالي تليفون من محمد نصار منتج المسرحية قالي الحق سلام اعتذر وكانت طيارتنا 10 صباحًا وكلمني 3 فجرًا ومسألتوش ليه، وليه هو كلمني أنا؟، وليه أي حد في الدنيا لما بتحصله مشكلة مع سلام بيكلموني أنا؟، عشان انا كبير سلام واسألوه، وروحت رفعت التليفون أول رنة رد سلام قالي عم يوكا والله العظيم أنت أول واحد كنت عايز أكلمه بس قولت زمانك نايم، قلت له لأ يا حبيبي أنا بحضر الشنط عشان خايف الطيارة تفوتني وبجهز".
واستكمل: "خير يا ابن اللذينة المرة دي، لأني متعود بيبقى يا خناقة على فلوس أو أفيش عادة، قالي مش قادر وشايف اللي بيحصل والأطفال اللي بتتدبح، قلت له احنا بايدينا ايه سلام انا أول ما عرفت منكم مفيش صلاة بصليها إلا لما بدعي لهم قبل ما بدعي لاولادي ان ربنا يعافيهم ويثبتهم وربنا يحرق كل اللي واقفين مع الصهاينة ويخلصنا منهم على خير بس يابني ده أكل عيش وفي ناس كتير أنت تعرف بيوتهم مفتوحة من الحاجات دي قعدنا حوالي من 10 ل 12 دقيقة وفي اخر المكالمة قولت له ترشح مين؟، قالي خد أي حد من مسرح مصر دول قرود وبيحفظوا بسرعة وينجزوكم ومقالش أنور بالاسم".
وأضاف: "قفلت معاه، وكلمت المنتج نصار تاني قولت له خلاص الواد اعتذر كلموا أوس أوس أنا برشحه، فنصار عشان أنا أقسمت أني أقول الكلام صح يعني شتم وانفعل وقالي قوله يرفع الفيديو ده دلوقتي حالا، قلت له فيديو ايه، قالي انت ماتعرفش الدنيا والعة، وعقبال ما بعت لي الفيديو وصلي 4 5 مكالمات من الزملاء شوف الواد عمل ايه الحق الحق ما أنا المرجعية والأب الروحي، وكلمت سلام بعدها وقلت له مش عاوز تروح المسرحية بس أرفع الفيديو ده وقالي لأول مرة أنا هقولك أنا اسف مش هقدر وقلت له براحتك تصبح على خير يا بني".
وتابع: "أقسم بالله العظيم انا اتشرفت ان كان ليا 5 مسرحيات في المملكة هذه كانت أول مسرحية، في نجوم صف أول قالولي احنا بنصرف على بيوتنا وأهالينا والفلوس دي بتفرق معانا ومساعدين اخراج كانوا بيحضنوا أنور ويعيطوا عشان المسرحية ماكنتش طالعة، ومن يوم ما رجعت من السعودية ماكلمتش سلام، وطلبت من القائمين المحترمين على مسلسل الكبير أوي ان احنا مانتقابلش ابدًا، وممكن اعتذر عن المسلسل وأرجع لكم كل الفلوس ولو فيه شرط جزائي تحت أمركم ارجعوا لكن مش عاوز أشوفوا في اللوكيشن خالص، واللي فهمته أن أعيدت كتابة الحلقات عشان ينفذوا رغبتي، ومكي حاول يصلح بيننا ورفضت لأنها مش هتخلص كده هتخلص عند الله وكل واحد ياخد حقه".
وتابع: "المشكلة مش بيني وبين سلام والمشكلة أكبر من كده بس أن يتسبب في ما حدث وما يطلعش يدافع عن أنور، وأنا ما طلعت واتكلمت وعكيت من وجهة نظر الناس واتبهدلت وعشت أصعب 5 أيام في حياتي أنا وولادي إلا دفاعًا عن أنور ولما كنت بقول للناس كتر خيركم عشان الناس دي كانت بتقول لأنور أنت في بيتك أنت في وسط اخواتك يا أنور أنت حبيبنا يا أنور".
