د. أمير فهمي زخارى
سمعت قبل كده عن نقص هرمون الذكورة؟
ممكن يكون عندك معلومة عامة أو سمعت قبل كده هن "هرمون الذكورة" أو إنه له أهمية للصحة التناسلية لكل راجل، لكن ماعندكش تفاصيل كافية عن الهرمون ده ودوره، بالرغم من أن دي حاجة مهمة لكل راجل!
وعلشان كده موضوعنا النهاردة عن الهرمون الذكورة، وإيه بيحصل لما يكون فيه نقص فيه....
أولاً هرمون الذكورة بيتم إفرازه من الخصيتين، وهو اللي بيعزز الرغبة الجنسية عند الرجل، والمسئول عن سماتهم الجسدية زي شعر الجسم والكتلة العضلية.
أحياناً بيكون فيه شريحة من الرجال بيكون عندهم مشكلة في إنتاج كمية كافية من هرمون الذكورة، والحالة دي بنسميها "قصور الغدد التناسلية"، واللي بتحصل إما...
• نتيجة أسباب عضوية زي - مشاكل في الغدة النخامية أو الخصية:
وهناك نوعان من قصور الغدد التناسلية (الذي يؤدى الى انخفاض هرمون الذكورة):
- قصور أولى في وظيفة الخصيه، المعروف أيضا باسم فشل الخصيه.
- قصور ثانوي نتيجة وجود مشكله في الغده النخامية، وهي الغده التي تحفز الخصيتين لإنتاج هرمون الذكورة.
والأسباب العضوية بتكون نتيجة لعلاج كيماوي أو إشعاعي، أو نتيجة التهابات أو عدوى، وفي بعض الأحيان السمنة، وكل ده بيأثر على تحفيز الخصية للهرمون الذكوري.
• أو بسبب عوامل طبيعية زي تقدم العمر:
لأن معدل انتاج هرمون الذكورة بيقل مع تقدم العمر، يعني بمجرد ما الرجل يوصل سن الأربعين بيبدأ مستوى الهرمون يقل بمعدل 1 لـ 3% سنوياً.
وده اللي بيعرض بعض الرجال في سن متقدم للإصابة بأمراض زي (تقص كتلة العضلات، التعب المستمر وقلة الطاقة، تغير الحالة المزاجية، صعوبة الانتصاب، وانخفاض الرغبة الجنسية).
طب إزاي بنقدر نشخص مشكلة زي نقص هرمون الذكورة عند الرجل؟
في الحالة دي بنعتمد على معيارين عند الرجل بيساعدونا نقيس ونشخص هرمون الذكورة...
المعيار الأول، هو التحليل والقياس:
علشان نتأكد أن مستوى هرمون الذكوة أقل من 300 نانوجرام/ديسلتر، ولكن بسبب أن مستويات هرمون الذكورة بتكون متغيرة عند الرجل على مدار اليوم بشكل عام، وقتها بنطلب من المريض أنه يقوم بتحاليل مستويات هرمون الذكورة في فترة الصبح كشئ أساسي.
أما المعيار الثاني، فبيكون علامات ظاهرة على المريض:
بمعنى أنه بيكون ظاهر على الرجل علامات نقص هرمون الذكورة مبكرة (سواء كانت علامات مبكرة أو لأ)، واللي بتكون زي ما ذكرناها عبارة عن (انعدام الطاقة والتعب، ضعف الانتصاب، انخفاض الرغبة الجنسية، إلخ...).
وفي حالة وجود معيار واحد، وقتها مش بنحتاج لهرمون التستوستيريون.
وللحديث بقه...تحياتي.
