د.امير فهمي زخاري
يعني إيه أعصاب ؟
الأعصاب ببساطة كابلات كهرباء بتوصل الإشارات في اتجاهين من الكوموندان (المخ) لباقي الأعضاء وبالعكس من الأعضاء للكموندان.
عشان حضرتك لما تلمس كوباية شاي سخنة بتلمسها بإيدك فأعصاب أيدك تبعت للكوموندان 🧠 (المخ) اشارة بدرجة الحرارة (في الإتجاه الرايح للمخ) يقوم المخ يرد بسرعة (في الاتجاه النازل من المخ) ويؤمر الأعضاء دي بانها ترمي الكوباية وحضرتك تقول يح سُخنة 😁 وده بيتسمى رد الفعل.. وده من أكبر نعم ربنا على الإنسان.
فيه أمثلة تاني على رد الفعل ده اللي بتبين سرعة الإشارات في الأعصاب؟
رد الفعل ده مُختصر في كلمة (ربنا سترها) وأمثلة على كده.. حد حدفك بحاجة في عينك 👀.. بسرعة لا إراديّاً بتقفل عينك وتحرك راسك بعيد..
لو انت سايق 🚗 وحد بيعدي مرة واحدة فتقوم دايس فرامل بدون تفكير (ده اشارات العين بعتت للمخ والمخ بعت لرجلك يدوس على الفرامل بدون تفكير). وخد من ده أمثلة كتير لما تتشك بأبرة تدوس على حاجة سخنة وهكذا.
يعني ايه بقى التهاب الأعصاب الطرفي؟
مش هاقولك 😃إلا لما تعرف يعني ايه الأعصاب الطرفية والمركزية.
الجهاز العصبي المركزي :
المخ والحبل الشوكي (اللي في سلسلة الضهر).
الجهاز العصبي الطرفي :
كل الأعصاب اللي برة المُخ والحبل الشوكي.
⬅️ طيب تمام يعني ايه بقى التهاب الأعصاب الطرفي؟
✅ مش هاقولك 😃 إلا لما تعرف أقسام الجهاز العصبي الطرفي عشان تفهم الأعراض ده تقسيم بسيط مختصر عشان الفهم لكن مش تقسيم طبي.
الجهاز العصبي الطرفي بينقسم إلى قسمين مهمين جداً هما:
القسم الحسّي :
وده الجزء الجاسوس🕵️♀️ اللي بينقل للمخ المعلومات عشان المخ يتخذ القرار المناسب معلومات زي (الإحساس بالحرارة / بالوجع / بالضغط / بالشكة / بالاهتزاز) خلي بالك عشان بدأنا ندخل في الأعراض 😉
⚠️ القسم الحركي :
وده الجزء اللي نازل من المخ للأطراف والأعضاء الإرادية (لتنفيذ أوامر المخ) بعد ما اتبعتتله المعلومات عن طريق الجواسيس.. والجزء ده مسئول عن تحريك أعضاءك الإرادية (زي الايد والرجل).
القسم اللاإرادي:
وده المسئول عن حركة أعضاءك اللاإرادية (زي الغدد العرقية والمثانة وغيره و الجهاز الهضمي والعرقي وغيره).
ماشي قرينا وفهمنا ايه بقى التهاب الأعصاب الطرفي ؟
التهاب الأعصاب الطرفي ده التهاب يصيب الأعصاب الطرفية في أي جزء من الأجزاء اللي شرحناها .. كل عصب هايصاب بالالتهاب يبقى الجزء المغذّى بيه هايتأثر.. أمثلة على الأعصاب وأعراضها صحصح بقى:
التهاب عصب طرفي في منطقة الرجل في القسم الحسّي؟
الأعراض : في الرجل هايقل الإحساس بالضغط والشكة والحرارة والوجع وهاحس بحرقان.. ولذلك لما تروح للدكتور هاتلاقيه بيختبر رجلك بفرشاة صغيرة وإبرة وهكذا.
التهاب عصب طرفي في منطقة الإيد 👐 في القسم الحركي؟
الإيد هاتضعف ومش هاقدر احرك ايدي بشكل سليم.
التهاب عصب طرفي في الجزء اللاإرادي في المعدة؟
يبقى هاحس بانتفاخات وعُسر هضم مثلاً وصعوبة وانتفاخات وهكذا.
ودي فكرة عامة عن المشاكل والأعراض لكن مش دقيقة ده بشكل مبسط فقط عشان نعرف ايه اللي بيحصل.
ايه بقى أشهر أسباب التهاب الأعصاب الطرفية؟
✅ السكر الغير منتظم (باكرّر الغير منتظم) مش أي حد عنده سكر بيجيله.. طبعاً الناس اللي بتهمل في نفسها بس هي اللي هاتلاقي بعض الأعراض اللي قلنا عليها فوق زي قلة إحساس في أماكن معينة الخ واحنا عارفين ان اللي عنده سكر لازم يقيس السكر ويضبطه يوميّاً.
✅ الناس اللي بتاخد علاج كيماوي شفاهم الله وعافاهم.
✅ شرب الكحول.
✅ بعض أمراض المناعة الذاتية.
✅ لو واحد حصلتله إصابة واتخبط مثلا في مكان معين وضغط على العصب.
✅ نقص بعض الفيتامينات زي فيتامين ب بعائلته وفيتامين E
✅ بعض الأمراض زي الكبد الوبائي سي أو الحزام الناري.
⬅️ طيب هل عصب واحد بس اللي بيحصل له كده ولا أعصاب متعددة؟
✅ طبعاً مفيش قاعدة عامّة ممكن يصيب عصب واحد في الرجل, ممكن يصيب عصبين متماثلين يعني الرجلين او الايدين .. ممكن يبقى مختلط (يعني حركي وحسّي ولا إرادي) يعني قلة إحساس في الرجلين والإيد مع بعض وهكذا.. وده بيكون بناءً على نوع المرض.
طيب هل التهاب الأعصاب ده له مضاعفات؟
✅ تخيل لما حد يكون عنده الاحساس قليل جداً في رجله ايه اللي يحصل؟ ممكن يتعور وما يحسش والتعويرة دي ممكن تكون ملوثة .. لذلك من المضاعفات الجروح غير المحسوسة وتلوثها.
✅ لو حد عنده ضعف في الإحساس في الرجلين أو الجزء الحركي مثلا في الرجل هايحصل ضعف في العضلات وممكن يقع كتير..
✅ ممكن الشخص يتلسع من غير ما يحس لنفس السبب بتاع قلة الإحساس.
⬅️ طيب نعمل ايه لو حسينا بأي حاجة من الحاجات دي؟
1️⃣ لو عندك سكر : اضبط سكرك ومش هاكرر على الكلمة دي ألف مرة. تضبيط السكر عايز حرفيّة ومش بيتضبط زي الساعة بيكون عايز تجارب كذا يوم لحد ما توصل للمضبوط والرقم المضبوط (ماتخليش سكرك في أي فترة في اليوم يعلى عن 180 مؤقتاً لحد ما الدكتور بتاعك يضبطهولك).
2️⃣ نركز على الأغذية المهمة والخضروات المفيدة اللي فيها فيتامينات ومعادن.
3️⃣ ناخد فيتامين مركب ب يومياً مرتين (قبل او بعد الاكل مش فارقة).
4️⃣ نبعد عن العادات السيئة زي التدخين (نعم التدخين) وشرب الكحول و القعدات اللي بتؤثر على الأعصاب بشكل سيئ زي اللي يقعد مربع كتير ويتني رجله الى اخره.
5️⃣ أحياناً لو فيه حرقان الطبيب بيوصفلك مسكن كويس لكن مع المسكن ده يرجى الالتزام بالخطوات اللي فوق.
6️⃣ نروح لأخصائيين العلاج الطبيعي هايعملولنا تدريبات رياضية مناسبة تساعد على تحسن الموضوع ده.
7️⃣ المحافظة على الضغط مضبوط والوزن المضبوط من العوامل المهمة جداً.
المصادر:
مركز الاستشارات الطيبه الامريكيه ..
اتمنى الصحه والسعادة للجميع...
د.امير فهمي زخاري المنيا
