د. أمير فهمى زخارى
الحل: هو إنك اول ما تجيبي الخضرة.. اغسليها ونشفيها، وهاتى علبة متوسطة من علب التلاجة البلاستيك الي عندك.. وحطي في الارضية بتاعها ورق كلينيكس او ورق مناديل مطبخ السميكة دي، وحطي بعدها الخضرة او البقدونس .. وحطي بعد ما تخلصي وقبل ما تقفلى العلبه ورق فوق تاني غطي بيه باقي البقدونس .. كده هيعيش معاكي فترة اطول ويحتفظ بخضارة وميصفرش ولا يبوظ.
- لو عندك توم ناشف وفصوصه صغيره انقعيه فى شوية ميه وبعدين قشريه هيبقى سهل.
- لما يكون عندك وصفه فيها تحمير بصل وتوم نزلي البصل الاول عشان التوم سهل يتحرق بسرعه.
- سخني الفرن قبل خبز الكيك بعشر دقايق ولما تستوي اقفلي النار وسيبي الكيكه جوه الفرن والباب موارب عشان درجه حرارتها تهدأ تدريجيا ومتهبطش.
- دايما استخدمي دقيق متعدد الاستخدامات للكيك عشان يبقي هش ولونه فاتح.
- متطبخيش اللحمة وهى مجمده ...خليها تفك شويه وبعد كده سويها براحتك.
- دايما خلي اللحوم والفراخ تستوي على نار هاديه عشان تطلع دايبه ولو فيها اى صوص يكون مركز.
- زودى على المعجنات زبادي او لبن بودره هيخليها هشه زى القطن.
- الرز يتشوح الاول فى زيت ورشه ملح وفى نص السوا شيلي الغطا وحتي الزبده او السمنه بالمعلقه على وش الرز ...هتلاقي ريحه ونتيجه روووعه فى الطعم.
- لو جيتي تسلقى بيض .. خرشوف .. كرنب .. اي حاجة من الحاجات الي بتطفى شكل الحلة بعد السلق دي .. وعاوزة الحلة ترجع زي ما كانت .. حطي فيها ماية و حطيها عالنار .. وحطي في الماية قشور لمون .. وبعد ما تاخد غلوتين تلاتة .. اغسليها عادي هتلاقيها رجعت جديدة زي ما كانت.
- لو قلقانه من الخضروات و الفواكة و انتي بتغسليها انها برضه مش نضيفة ..
اتعودي دايما تجيبي الحلة او الطبق الي هتغسلى فيه الفاكهة و الخظار و حطي معلقة واحدة كبيرة خل في الماية الي هتنضفى بيها الخضار و الفاكهة .. الخل هيقتل اي جراثيم ممكن متموتش بالغسيل العادي
- لو عندك بيض بقاله مده في التلاجة وعاوزة تستعمليه وعندك شك ان كان بايظ ولا لاء
هتجيبي البيضة و تجيبي كوباية مية ساقعة مدوبة فيها معلقة ملح .. وحطي البيضة في الكوباية .. لو طفت على السطح .. تبقي باظت .. لو وقعت و سقطت تحت تبقي بنت حلال واصيلة ولسة كويسة.
- لو عاوزة تسلقى بيض وانتي بتحطيها في الحلة اتشرخت شرخ بسيط ...حطي في ماية السلق معلقة خل او شوية ملح في ماية السلق .. و بكدة هتستوي جوا قشرتها ومش هتبوظ ولا حاجة.
- لو بتسلقى بقوليات .. زي الفاصوليا البيضا و اللوبيا...
متحطيش الملح إلا في الاخر خالص بعد ما الاكل يستوي .. لان لما بتحطي الملح .. مدة السلق بتطول اوووووي بعكس لما متحطيش الملح و تستني لما تستوي.
وللمقال بقيه...تحياتى.
